ورقہ 383

7179
کوئی صلح دی گل نہ ہوئی مچیا شور ہنگامہ
کینے روہ کیتے دُپیارے سرجند جُثہّ جامہ
7180
مہر محبت گئی جہانوں پیو پت ہوئے ویری
بھائی وانگ قصائی ہوئے مول نہ منگن خیری
7181
یاراں یار پچھانن ناہیں کیا صورت اشنایاں
فتنے شور فساد خصومت انتوانتاں چایاں
7182
اوڑک آن چڑھو چڑھ ہوئی مارے گج نقارے
دھولے تیک پُچائے ڈھولے ڈنڈ کہاء ککارے
7183
پِیلاں اُپرپا کھر وجےّ گھس گھس لگے لاگے
ڈھاہیں مار اُٹھے خر مُہرے جیونکر ویر وراگے
7184
منہ اسمان بنے کر بولن کوک اٹھائی طرُیاں
تیغاں بجلی وانگن ہویاں تیغاں وانگن چھُریاں
7185
دھونسے دھونس اوازوں چاڑھی شُتری شور مچایا
طُرم طنبوراں تے کرنائیں غل جگت وچ پایا
7186
یونانی ایرانی باجے ترکانے کرنائیں
گا ڈوماں کن ڈورے کیتے وجن تھاؤں تھائیں
7187
کورڑیاں دے سخت کڑاکے نکل جان اسمانوں
پتھر بھن اواڑے کڈھن تازی مار سماں نوں
7188
کمچی دا شونکار اُٹھائے سل پتھر دے گھوڑے
چابک دست چلاون چابک ہوش پٹاکا تروڑے
7189
شیر جواناں دی مُچھ پھڑ کے سن سن شور دمامہ
رن وچ تازی جنبش چائی چبن سار لگاماں
7190
زمیں زمن وچ پکا ککارا ترکاں دی ہنکاروں
سیمر غاں تن تران ترٹا لشکر دے للکاروں
7191
مشکاں وانگر مُشکی چمکن نُکرے سچے موتی
مارن دنب اٹھاون گردن پھڑکے اَکھ کنوتی
7192
چاچا سنب کریندے مجرے ایڑن نال پہاڑاں
ڈنڈ گھمنڈ کرن جیوں رن وچ شیر بھنے اگواڑاں
7193
پایا زور رکاباں اُتے آسن ملّ سواراں
نیزہ باز قواعد کر دے ازماون ہتھیاراں
7194
ہائے ہائے کر چھیڑن گھوڑے شپ شپ چلن واراں
للکر کے پڑوڑن بہادر چِھڑے منند ڈڈاراں
7195
دھوڑ و دھوڑ ہوئے منہ متھے گرد چڑھی سرخوداں
پندراں ہوگئے اس جنگ وچ طبق آہے جو چوداں
7196
غلط لکھے میں پندراں ناہیں دھرتی اک گھٹی سی
گردوں انبر بنیا جیہڑی سُماّں نال پٹی سی
7197
قہر غضب دے نعرے سن سن پھٹ پھٹ پئے کلیجے
ہتھیاراں دی تابش کولوں بل اُٹھے ہڈ بھیجے

لفظالی:
روہ= غصےّ، دُپیارے= اوپرے ۔ پرائے۔ مہر محبت توں خالی، خیری نہ منگنا= بھلائی نہ چاہنا، دُھول= زمین دے تھلے بلد جس دے سنگاں تے دھرتی قائم اے، خصومت= دشمنی ، انتوں انتاں چایاں= آخری حد تائیں اپڑ گیاںفتنے شور فساد تے حد نوں ہتھ لادِتا، چڑھو چڑھ ہوئی = حملے دا حکم ہویا، ڈھولے=ڈھول نے ، ڈنڈ= شور ، ککارے = کوکاں دا شور، پِیلاں = ہاتھیاں ، پاکھر= ہاتھی اُتے پایا لوہے دا جال زدہ بکتر، لاگے= لادو جانور دی کنڈ دازخم، دھونسے= نقارے، کرنائیں=قرنائیں سِنگ دے بنے دھوتے، ویر وراگے= دنیا دیاں لذتاں چھڈن والے بہادر مرد، اواڑے = چنگیاڑے، تازی = عربی گھوڑے، کمچی = قمیچی، ہنٹر = چابک، سل پتھر دے گھوڑے= سوار دے حُکم نال قابو آئے ۔ گھوڑے جیہڑے حُکموں باجھ ذرا وی حرکت نہ کرن، پٹاکا= قمچی لگن دی آواز، مُچھ پھڑ کے= جنگی جوش ظاہر کر کے ہِلے، جنبش چائی= جوش پیدا ہویا، سار لگام = لوہے دا کڑیا لا، ترکاں= ترکی گھوڑے، ہنکار= ہنکن دی آواز،مُشک = کالی زلف ، مشکی=کالے چمکدار رنگ دا گھوڑا، آسن = کاٹھی دی سِیٹ ، ڈنڈ گھمنڈ کرنا= جسمانی ورزش دے کرتب دکھانا،گنج نقارے= ہاتھی تے لدی نوبت،