ورقہ 384

7198
گل گھوٹو دی موت دیاں نوں پائی آن کمنداں
نیزے سیخے لاون بیرے تیغاں کٹن بنداں
7199
گرم ہواڑھ مونہاں دی کولوں اُٹھی دُھؤاں دھاری
لائی اگ جہانے اندر لنب کڈھی تلواری
7200
لوتھاں وچ زمین نہ میون جاناں وچ ہوائے
خاک لہو دا گارا بنیا پیر نہ دھریا جائے
7201
ہاشم شاہ بی فوج سواری جیونکر آہی کاری
سجی صف بنائیوس اوّل بہت زورا ور بھاری
7202
کھبے پاسے صف سنگاری کندھ پکی فولادی
اگا پچھا راس بنایا راہ جیوں استادی
7203
اس پاسے میدان سُہایا شارستانی شاہے
اگے دیو بہادر رکھے ہتھ گھتن جو ماھہے
7204
وچلی فوج سواری تکڑی کوٹ بناء کھلوئی
کِیڑا لنگھ نہ سکے وچدوں بھیڑ اجیہی ہوئی
7205
پچھے اگے صفاں بنایاں کندھ جویں ہشتاتی
وچ شاہپال بہادر آپوں جیوں دل اندر چھاتی
7206
بردی تے ہتھیار سپاہیاں جو لوڑے سو دِتے
دے دلاسے مارو دشمن جیؤ نکر عاشق پِتے
7207
سجا کھبا پاس سُہایا زِرہوں خودوں تیغوں
جیونکر باغ ارائش پھڑدا بارش بے دریغوں
7208
گردے لشکر ہاٹھاں گھنیاں بنھ کے گھٹاں کھلویا
وچ شاہپال بہادر گجے رعد موافق ہویا
7209
جاں دو لشکر ہوئے سوہنجے ملیا حکم شہانہ
دھیر اتے تدبیر نکھُٹی کیتی میر جواناں
7210
مارو مار اسمانوں آئی کہہ کے دوس شہانوں
پیا ہنیرا تے رُشنائی نٹھی دور جہانوں
7211
اتنے خون زمیں پر ہوئے باہر انت شماروں
گندھک سرخ ہوئی اوہ دھرتی تتی تیز انگاروں
7212
تلواریں دے پپل پترے کھلے ہوئے سن اِتھے
مکھی مچھر اُڈنہ سکن وچ جنگے دے کھتے
7213
چمکو چمک وجن تلواریں نویاں سان چڑھایاں
رتی رحم نہ زخم کرن تھیں زہروں پان چڑہایاں
7214
گوشے جوڑ کمان کمینوں مارے تیر خدنگاں
لیندے خبر زمان زمینوں بھجن مثل نہنگاں
7215
باشک ناگ کمنداں والے کنڈل کھولن مارن
لشکر دے گنج لُٹن کارن آرن منہ کھلارن
7216
وجن تیز شپاشپ تیغاں تیر نہ دیون واری
دوئے ہاٹھاں گھل مِل آیاں لتھا مینہ ہتیاری

لفظالی:
گل گھوٹو= پشواں دا روگ جس وچ گل گھٹیا جاندااے، کمند= دشمن دے گل و چ بھسن والا رسا جیہڑا دوروں ای سٹیا جاندااے، لوتھ= لاش، بنداں=سریر دا بند بند، سُہایا= سجایا، ماھہ= گرمٹ ۔ ورما، بردی= وردی۔ یونیفارم، عاشق = سالک ۔ فقیر، پِتے = نفس غصے، پاس = پاسا، زرہوں=زرہ نال ، خود=ہیلمٹ، ہتھ گھتن جو ماھے= جیہڑے گرمٹ تھلے ہتھ دے کے سی نہ کرن، ہاٹھاں = سنگھنے گوڑھے بدلاں وانگوں ، سوہنجے=ساریاں انگاں ( مدگار فوجی جتھیاں) نا ل مکمل، دھیر= دھیرج سکون شانتی، نکُھّٹی = مک گئی ، میر کرنا= وار وچ پہل کرنا، پپل پتر ے= تلوار دی چُنج جیہڑی پپل پتے دی نوک وانگوں ہوندی اے، کھتے= خطے علاقے،گوشے جوڑ= کمان نوں چوکھا کھچن نال دونویں کنارے جُڑ جاندے نیں تیر دور جاندااے، زہروں پان چڑھایاں= ننگی تلوار نوں لوہار دی بھٹھی وچ لال کیتا جاندا اے مارو زہر گھلے پانی وچ ڈو ب کے ٹھنڈا کیتا جاندااے،کمینوں=گھات وچوں، نہنگ= (١) مگر مچھ (٢) سکھاں دا سرفروش مجاہد، باشک ناگ= گل وچ پھساون والے رسیاں نوںآکھیا گیااے، آرن= رن وچ آ کے، لتھا مینہ ہتیاری= ظلم دا مینہ دسنا شروع ہو گیا،