ورقہ 385

7217
کجھ مقدور کسے دا ناہیں انگل کرے اُچیری
جو سر کڈھے تیغا وڈھے چاہے جنگ ہنیری
7218
نیزے سل سل ٹانگے لاون سیخاں سلّن سانگاں
مُردے ہاڑلُگّے وچ رن دے لوہو چڑھیاں کانگاں
7219
بھلے بھلے تن سلےّ بھلّے بُھلّے ٹبرّ ٹیراں
چھُریاں چیر نکالے پتےّ سروں تکبّر تیراں
7220
پیش قبض دی قبض چروکی کھُلیّ اوس دہاڑے
ماری بُوک لہودی پِڑوچ پیٹ پنجر پَڑ پاڑے
7221
چلی سیف صفاء صفائیوں صفن صاف کریندی
چیر لویر کرے کوہ قافاں سچی لاف مریندی
7222
موجاں مار چلے ہڑھ خونی دم دم وچ چڑھاواں
تھم تھم کے تھم جھنڈیاں والے رکھن کھلے تڑانواں
7223
مہر محابا رہیا نہ قطرہ نہ غم خطرہ جانوں
امن امان خلاصی نٹھے واسے چھوڑ جہانوں
7224
چھم چھم وسّن تیز خدنگی جیوں رتھ پھاگن والے
چِھک کماناں پئے جواناں ہتھیں پُر پُر چھالے
7225
ایسی گرم لڑائی گوُہڑی دوہاں پہاڑاں چائی
نعلاں وچوں ڈھہن اواڑے اگ وسے ہر جائی
7226
اُدھروں ہاشم شاہ مریندا پھر دا وچ سپاہے
گجدا مار نہ رجدا خونوں وانگر شیر سیاہے
7227
شارستانی مارن کارن لاوے زور جوانی
لمےّ ہتھ کرے پڑ ہتھی بنیا بہمن ثانی
7228
جدھر ہتھ کرے سِر وڈّھے لوں نہ چھڈے اڑیا
جس جس پاسے حملہ کیتُس تن تنے پر چڑھیا
7229
بہتے شارستانی مارے ہاشم نے کرہلےّ
ہلےّ نہ اک قدم پِچھیرے پھٹ موہاں پر جھلےّ
7230
اس پاسوں شاہپال بہادر قلزمیاں پر بھارا
پھڑ ہتھیار قیامت کردا ڈردا لشکر سارا
7231
دوہیں ہتھیں کوشش کردا مت پڑ مینوں لبھے
وڈھ وڈھ دشمن ستھر پائے کیا سجےّ کیا کھّبے
7232
ویری اُتّے واراں کردا دوہیں ہَتھیں تلواراں
دوہاں دے وڈھ چار بنائے اٹھ کریندا چاراں
7233
ہاتھی سنے سوار عماری جس تے ہتھ چلائے
کر دوٹک اٹک کر رہندی تیغ زمیں لہہ جائے
7234
قلزم دے دریائے اُتے جے غصہ کر آوے
جلدی اگ کڈھے دریاؤں شور ندی وچ پاوے
7235
اگا ویکھ جواناں ہتھوں ڈھیہن ہتھیار پُولادی
جیوں شیراں دے ویکھدیاں ہی بول نکلدا مادی

لفظالی:
مقدور= طاقت ۔ ہمت، ٹانگے لاون= ٹانگ پتن تے لے جاون۔ پار لا دین، سلّنا= موری کرن لئی چُبھنا، سانگ = وگاہتا مارن والا نیزہJavelin، لویر کرنا= لیر کرنا، بھلاّ= بھالا ۔ نیڑیوں مارن والا نیزہ، پیش قبض= نیڑیوں کھوہبن والا خنجر، بوُک= بھوکنی۔ دھار، پَڑ= پانی ہانڈے تائیں دھرتی داچھِلّڑ، صفا= رلے توں پاک کرنا، صفن صاف= صفاً صفا بالکل برباد ۔ رڑا میدان ، سچی لاف مارنا= عملی طور تے کم کر کے دکھانا، تڑانواں= تنانواں ، مہر=محبت ، محابا= لحاظ۔ دھیان راکھی، خلاصی= آزادی، واسا= رہائش ، رتھ پھاگن والے موسم= موسم بہار وچ ہندو رتھاں دا جلوس کڈھدے نیں اوس تہوار تے رتھاں دی چال تے گنتی ول اشارہ اے، پُر پُر = پور پور سریر دے ہر تھاں تے، پہاڑاں= اپنے اپنے تھاں تے سخت رویے تے قائم رہن والےاں، پڑہتھی = پڑھتھا جانن والا ، بہمن=قدیم ایرانیاں دا فرضی جن جو ذہانت طاقت لئی منیا پرمنیا اے ، اواڑے = چنگیاڑے ، شیر سیاہ= حبشی افریقی علاقے دا شیراے ، اڑیا= مقابلے وچ دٹیا، تن تنے پر چڑھیا= بھگدڑ مچن تے بندے اک دوجے تے چڑھ گئے،