ورقہ 386

7236
ہاشم شاہ اگے ونج کو کے لشکر دے سر کردے
کر بند بست شتابی شاہا دیو تیرے سبھ مردے
7237
خالی کردا ہاڑ اکلاّ شاہ بہادر جنگی
نال اوہدے کد پوری پیندی بھلی پناہ ہن منگی
7238
ہاشم نے فرمایا اگوں ڈریو نہیں دلیرو
کٹھا ہو پوو سبھ لشکر شاہپالے نوں گھیرو
7239
گھیرا پا چوطرفوں فوجاں آن پیاں شاہپالے
کر کر چھُٹ سٹاں وٹ مارن کِس کِس دے پھٹ ٹالے
7240
جاں شاہپال ڈٹھا اوہ غوغا للکریاں تد فوجاں
جوش خروش کریندے پُہتے جیوں دریاویں موجاں
7241
آخر فوج اکٹھی ہوئی جیوں کیڑے یا مکڑی
ہوندا جائے جنگ لڑائی پل پل اندر تکڑی
7242
شمشیراں فولادی چمکن چلن تیر خدنگی
اک کیڑے دے چلن جوگی زمیں نہ لبھے ننگی
7243
سر پر چھاؤں کیتی ہتھیاراں سورج اکھ چھپائے
مچھر نوں پر مارن جوگی تھاں نہ وچ ہوائے
7244
زہری پین زنبوراں وانگن کر کر ہتھ کرارے
پھٹے گڈے ہون اگیرے چھوڑپچھیرے مارے
7245
پنبے اُڈ دے جان تناں دے جیوں تیلی روں تُنبے
نیزے برچھے جا جا رگڑن انبر اتے سُنبے
7246
والوں والوں مڑھکا آیا ڈریا دھول وبالوں
ہتھیاراں دے کنڈے چُبھن انبر اڑیا چالوں
7247
برچھی سانگ موہوں منہ وجے ساہ نہ نکلن دیندی
جھٹک نہ رہندی اٹک کٹاری وتدی کٹک مریندی
7248
خنجر سنجر پنجر اندر کڈھ کڈھ آنے بوکے
ہر پسلی تھیں ہسلی خونی وگدے وہن نہ ٹوکے
7249
جھمدڑ جمدڑیاں دا ویری واری دے نہ مُولے
جیوں بھٹھی وچ چھولے تیویں تڑفن رت بچھولے
7250
پھَل پھلاں وچ سنبے ساراں وانگ گلابے خاراں
ڈھالاں اوپر ڈھالاں کھڑکن وانگن لالے زاراں
7251
نسّن والا نسّ نہ سکے تھاں نہ پَیر ہٹن دا
نہ نسّن نہ چھپن ہوندا وقت نہ جھٹ کٹن دا
7252
سارا روز نہ مٹھے ہوئے تیر انداز مریندے
ترکی تازی تازے تازے ترک وتاز کریندے
7253
بازاں وانگر باز نہ آون نیزہ باز شکاری
کھنڈے مول نہ ہوون کھُنڈے تلواری خمداری
7254
ایسی کھیڈ مچی شطرنجوں دم دم ہوئی زیادہ
شاہپالے دے رُخ تھیں ہوندا مارو پیل پیاوہ

لفظالی:
سرکردے=فوجی جرنیل ، ہاڑ = ہنو ۔ جاڑھ، خالی کردا ہاڑ= شہپال بہادر اپنی ہنوتھلے شکارچتھ چباکے ہنو خالی کر دیندا اے پھر دوجا شکار ہنو تھلے لے لیندا اے، پھٹ ٹالے=وار کھنجائے، چھُٹ= جھپٹا، وٹ مارن= کس کے مارن، خدنگی= خدنگ دی لکڑی دے بنے تیر، زنبور = ڈیموں ۔ بھِڑ، دھول=دھرتی نوں سنگاں تے چُکن والا بلد، سُنبا= اک نوکدار لوہے دا ہتھیار جس اُتے ہتھوڑے دی سٹ ماریاں لوہے دی چادر وچ موری کیتی جاندی اے، پنبے= کپاہ دے پھمبے ۔ تونبے، وبالوں = بھاردے دُکھ دردوں ، وتدی= پِھر دی ، کٹک= ڈنگر وچھا مال مویشی نوں وڈٹک کرن والی فوج، نیزے برچھے ۔۔۔۔۔۔= نیزے برچھے اسمان نوں رگڑ لاکے سُنبے وانگوں چھیک کر دیندے نیں ، سنجر= چھوٹا شکاری پنچھی۔ مراد خنجر، سنجرنا= دھسنا ۔ اندر رچنا، آنے= لیاوے، ہسلی= چھوٹی نہر ، کھال اک برساتی نالا جو گور دا سپور بٹالے توں لنگھداترن تارن اپڑ دا اے، جمدھر= جم دھار اک قسم دا خنجر، رت بچھولے = لہولہان بند ے، پھل =تلوار داکاٹ والا حصہ،زخ تھیں ہوندا۔۔۔۔۔۔= رُخ دی چال نال ماروفیلا وی پیادہ ہو جاندا اے،