ورقہ 387

7255
قلزمیاں پر شارستانی پیندے جان زوراور
ہاشم شاہ دی آس ترٹی شاہپالے نوں باور
7256
ہاشم شاہ کر زور دلیری رن وچ کھلا ونگارے
شابا شابا لڑو جوانو! کون کوئی پِھر ہارے
7257
لڑدیاں روز گذشتہ ہویا آئی رات ہنیری
سورج شاہ گیا وچ خلوت فوج کھلار گھنیری
7258
زنگی تاج سرے پر دھریا ہیرے موتی جڑیا
شاہ خاور دا تختوں لہہ کے محلاں اندر وڑیا
7259
دوہاں دلاں تھیں چڑھے طلاوے خبراں رکھن دوروں
پہرے دار چوپھیر کھلوتے لے کے حکم حضوروں
7260
تھکے ماندے لشکر ڈھہٹھے سارے کرن دعائیں
ربا عمروں لمیّ رکھیں رات اجوکی تائیں
7261
خبر نہیں دن کیسا چڑھسی کس دی شامت آئی
ساڈے بھانے بھلک دہاڑے روز قیامت آئی
7262
جیسی اج لنگھی جے بھلکے ایہو جیہی ہوئی
دنیا اُتے جیون والا رہ جاوے گا کوئی
7263
کیکر ہون قبول دعائیں وقت اجل دا آیا
ملک الموت محمدبخشا منتیں کس منایا
7264
چینی شاہ زنگی نوں کُٹھا ڈوہلی رت کنارے
ہنجو رو اسمان بے چارہ پوہنج کھلارخسارے
7265
بھیراں چوٹ لگی درگاہوں مارے ناد فقیراں
نور فجر دا ظاہر ہویا بدھے لک امیراں
7266
ڈیرے کوک گھتی قرناہیں ڈھول نقارے وجےّ
شور مچایا طرم طنبوراں شتری دھونسے گجے
7267
بنھ ہتھیار بہادر اُٹھے مل میدان کھلوئے
صفاں قطاراں راس بنایاں آن برابر ہوئے
7268
تیغ بہادر دوہاں ولاں تھیں حملے کر کر آون
چھیڑن تازی نیزہ بازی جھٹ پٹ پھٹ چلاون
7269
بیدل باغل نس نس مردے پیراں ہیٹھ ملیندے
شیر دلیر پِڑے وچ تیغوں سر دھڑ قلماں تھیندے
7270
مارو مار آہی دن سارا انت ہوئی قتلاموں
روشن روز گذشتہ ہویا پیا ہنیرا شاموں
7271
دیو قلزم دے ڈیرے آئے ڈھہندے اٹھدے بھجدے
شاہپالے دے شیر مریلے رہے پِڑے وچ گجدے
7272
ساری رات نہ ڈیرے آئے کھلے رہے پڑمل کے
آء پھر لو صبح دی لگی چھپے تارے ہل کے
7273
جھنڈا شاہ حبش دے والا سر پر نے ہو ڈھہٹھا
خاور دا شاہ آون لگا زنگی کالا نٹھا

لفظالی:
باور= یقین اعتماد (فتح بارے) ،ونگارے= چیلنج کرے، روز گذشتہ ہونا= دن گُزرنا، ول = طرف ، زنگی تاج= کالا تاج، ہیرے موتی= ستارے ، شاہ خاور = چڑھدے دا بادشاہ ۔ سورج، طلاوے= اطلاع دین والے، بھلک دہاڑ= آون والادن ۔ فردا۔ قیامت داون، بھلکے = کل آون دے دن ، چینی شاہ زنگی نوں کُٹھا= سورج نے رات نوں قتل کیتا ، درگاہوں = شاہی حکم نال ، بدھے لک امیراں = دربار یاں نے پیٹیاں نبھ لیاں ڈیوٹی لئی تیار ہوگئے، قرنا= سنگ دا بنیا دُھوتا، ملّ میدان= میدان تے قبضہ کر کے، راس بنایاں = سدھیاں کیتیاں ، برابر ہونا= مقابلے وچ کھلونا، تازی = عربی گھوڑے ، باغل= بھاگل ۔ بھگل ۔ بھگوڑے، قلماں تھیندے= دھڑاُتوں سر اکو وار وچ لاہن نوں سر قلم کرنا آکھدے نیں ، شاہ جبش= کالیاں دا بادشاہ۔ کالی رات، زنگی = حبشی ہنیری رات،پِڑملّنا= میدان تے قبضہ کرنا، لو = چانن ،