ورقہ 388

7274
خاور شاہ سُنہری جھنڈا جھل مل جھل مل کردا
وچ میدان جگت دے لایا چایا پندھ سفر دا
7275
عالم تے رُشنائی ہوئی گیا ہنیرا نوروں
آمد رفت خلق دی ساری دسن لگی دوروں
7276
ایہ سورج جمشےد فلک دا لا یاقوتی جوڑے
وچ میدانے آن کھلوتا چڑھ کے نیلے گھوڑے
7277
آن نویں سِروجے واجے گجے دھونسے بھیراں
سانگاں قہروں کنبن لگیاں جنبش چڑھی دلیرا ں
7278
تیغاں نے منہ ننگے کیتے رتو دے تر ہائے
نیزے سر تے جگر پُرتے سیخے بیرے لائے
7279
چلتاہاں تے بختر پہنے زرہاں خود جواناں
پائے متھے وٹ کمنداں ابرو جُڑے کماناں
7280
بازاں وانگر اُڈن لگے تیر تتے بنھ تاری
بھج بھج کوہن جوان جواناں مرگاں جویں شکاری
7281
اس دن پہلے پہر جواناں کیتی زور ازمائی
اک ادھروں اک اُدھروں آوے دو دو کرن لڑائی
7282
آء شیراں پھر شور مچایا کلّوں اج گھنیرا
گوراں نال ہویاں پرُ گوراں گوراں نال جو ہیرا
7283
وجے ٹل اٹھاں گل بھارے بنسریاں رنگ لایا
بھیراں تے سیپوراں رل کے لشکر بول ڈرایا
7284
تیز ترنگاں مثل ملنگاں دھوڑوں خاک رمائی
کڈھن چالاں پان دھمالاں رن وچ کھیڈ مچائی
7285
ترکاں گل حمیلاں چھنکن گھنگرو جوش خروشاں
آن زنگولے اُچے بولے کھڑن دماغوں ہوشاں
7286
کرن ککارے مڑھے نقارے بگھیاڑاں دی کھل دے
ہیبت تھیں سُن کِرن کلیجے گُرز لوہے دے گلدے
7287
اس شاہاں دی شورش شرّوں شادی گئی جہانوں
مرن جوان نہ ہارن ہمت ڈرن نہیں جند جانوں
7288
اک مرے مڑ دوجا آوے جان تلی پر دھر کے
شیر جوان کرن جند بازی اٹک نہ رہندے ڈر کے
7289
اک دوجے دی لین ازمایئش خوب کرن پڑہتھے
اک زخمی ہوونجن ڈیرے اک ہرن سر لتھے
7290
اک سپاہی قلزمیاں دا گجدا پڑ وچ آیا
اکھیں بلن النبے اگ دے تیزی تندی چایا
7291
سنجاں نال ہویا ہشتاتی رہندا نہیں نچلا
پڑوچ کھلاونگارے کوئی آ کر لڑد اکلا
7292
جے کوئی جاوے پرت نہ آوے ہاڑ اندر اوہ رکھدا
جاندا آپ لہو دا تساّ زہر پیالا چکھدا

لفظالی:
خاور شاہ= مشرق دا بادشاہ سورج، پندھ چایا= پندھ داارادہ کیتا، جمشید = ایران دا پیش دا دیاں دے خاندان دا عظیم الشان بادشاہ جہدے کول ساری دنیا دے حالات دسن والا پیالاسی، یاقوتی جوڑے= ات سُرخ رنگے، نیلاگھوڑا = اسمان، بھیراں = نقارے (طوطی نال وجاون والے)،سانگاں قہروں۔۔۔۔۔۔= سانگ وگاہتا مارن والا نیزا اے جہدا پچھلا حصہ وانس دا ہوندا اے ۔ اتے وگاہتا مارن لگیاں وانسی حصہ چوکھا کنبدا اے انسان وی شدید غصے نال کنبدا اے،جنبش= جوش، پُرتے= پروئے ، بختر= زرہ بکتر ،چلتہ= جنگ وچ پاون والا کپڑے دا اور کوٹ، خود= لوہے دا ہیلمٹ، پائے متھے وٹ کمنداں=کمنداں نوں غصہ چڑھیا ، تتے= جوشیلے، تاری بنھنا= بہت تیز دوڑنا، گوراں = (١) پہلواناں (٢) قبراں ، جو ہیرا= چھوٹی جنگلی چراگاہ ، ترنگاں= اچھی نسل دے گھوڑیاں، ترکاں= ترکی گھوڑے، زنگولے= ٹل ۔ جنگھ ، ککارے = کوکن دی آواز،کِرن = ڈگن ، کلیجہَ کرنا = بلڈ پریشر تھلے آ جاونا، پڑہتھے= جنگ وچ ہتھ چلاون دی مشق دا مظاہرہ، سنجاں= زرہ بکتر، ہشتاتی= ٹ ک ٧٥، نچلا= پر سکون۔ چپ چاپ، تسا = تریہایا، تندی = جوش ۔ غصہ، ونگارے= چیلنج کرے،