ورقہ 389

7293
بہت دلیر ڈرے اس شیروں کوئی نہ ہووے اگیرے
مستی تے مغروری چایارن وچ گھوڑا پھیرے
7294
ساعت گزر گئی اس گل نوں تاں اک شارستانی
وچلی فوج وچوں اُٹھ آیا جیؤں ترکش دی کانی
7295
جوش خروش کریندا آوے وانگر ندی اٹک دی
کندھے اُپرّ ڈھال کھڑکدی گل وچ تیغ لٹکدی
7296
آسن جم اٹھاوے گھوڑا سر پر نیزہ پھیرے
اس اگلے نوں آکھن لگا چڑھسیں اگے میرے
7297
ہتھ میرے ایہ تیغ سروہی بھریا زہر پیالا
قلزمیاں دے سر دھڑ تائیں کر دی اک نوالہ
7298
ایہ گل آکھ ہلائیوس گھوڑا پیر رکابیں دھرکے
اُگھّر گرز لگائیوس اس نوں زور ضروری کر کے
7299
گرز اوہدے نے بُرز گرایا ڈھٹھا قلزم والا
رتو نال ہویا پِڑ رتاّ وَیہہ تُریا اک نالا
7300
ہور اک ساتھی اس دا آیا بُت وڈا کوہ قافوں
اوہ بھی گاجر وانگر دلؤس اکسے پھٹیوں صافوں
7301
اِسے طرح بہادر کتنے مارے وارو واری
اوہ بھی جدوں تکبر چایا قتل کیتا تلواری
7302
پیشیں تھیں لے ڈیگر توڑی پِڑ وچ کوئی نہ لتھا
مغرب وچ فجر دے لاڑے کج لیا منہ متھا
7303
جنبش کھا سپاہی سورج پاڑ سیاہ قناتاں
چڑھ میدان انبر دے آیا بھجیاں ہور جماتاں
7304
دونویں لشکر اُٹھ کھلوتے کر کے ہائے ہائے
جھنڈیاں نے سر اُچے کر کے نال اسمان لگائے
7305
جیؤنکر شونک چڑھے دریاؤں بدل ساون والا
بجلی وانگر کڑکن راشک فوج جھڑاں دا چا لا
7306
ہر ڈیرے تھیں نکلے جنگی جیؤں چترے ہر جھنگوں
آہا ہا کراون رن وچ مول نہ رجن جنگوں
7307
شابا شابا دھن دھن مردوہون چوطرفوں رابے
جان نہ دیساں ایہ تک مارے دین بہادر دابے
7308
سانگاں نیزے سلّن سینے دَوروں دُور کریندے
گرزپون اسمانی گولے چکنا چور کریندے
7309
بجلی والی مار کریندی تیغ کڈھے کڑکارے
اُڈن پھل ٹکیندے گُردے ڈھالیںدے دھڑکارے
7310
کروّفر گھُنکارے تیراں پھر پھر ہون فراری
دُسرّ و ہندے اٹک نہ رہندے کٹے کٹک کٹاری
7311
سورمیاں دی سیف سروہی سنے سنجاں سروڈھے
مار مندال مکائے مرداں مغز منجالی کڈھے

لفظالی:
اگیرے= ہور اگانہہ، ساعت = گھڑی ، ترکش = تیر کش ، کانی = تیر ، آسن = کاٹھی تے سوار دی سیٹ ، چڑھسیں اگے میرے = کیہ توںمیرا مقابلہ کریں گا، سروہی= شہر سروہہ دی بنی تلوار، اُگھر = پچھوں زور دی لیا کے ، وَیہہ تریا= وگنا شروع ہو گیا ، جنبش = جوش ، انبر= اسمان ، راشک = راکھش۔ جنگلی شیطان جیہڑے دیوتیاں نال لڑدے سن ، فجر دا لاڑا= سورج، پڑ= میدان جنگ، جھڑ= سورج دے بدلاں وچ چھپن دی حالت ، جھنگ= رکھاں دا سنگھنا جھُنڈ، کرّوفر=عرباں وچ جنگی حکمت عملی اگے ودھ کے حملہ تے لوڑ ویلے قدم پچھے وی کرنا ، رابے= بہت ساریاں توپاں اکٹھیاں چلن دا عمل ، فوج جھڑاں داچالا= فوج دی چمک کدے مٹھی پے جاوے تے راکش بجلی وانگوں کڑک کے پھیر جوش پیدا کر دیندے نیں ، منجالی = منجھ ۔مغز۔ بھیجا، گھنکارے=گھوکراں ، ٹکیندے گردے= تلوار دے پھل دی نوک جے کر اُڈ کے کدھرے ڈگ پوے تاں اوہنا ں نال دی گردیاں نوں ٹُک لگ جاندا اے، چالا= رفتار۔ کوچ ۔ روانگی، جھڑ= سورج نوں چھپاون والے بدّلاں دا اکٹھ ، جماتاں = جماعتاں،