ورقہ 390

7312
تاں پھر حکم کیتا شاہپالے لشکر ہوءِ اکٹھا
ہلاّ کرو ایہناں پر سارے جانو قلزم نٹھا
7313
کوہ قافاں دی فوج تمامی باغ ارم دی ساری
ہاشم شاہ دے لشکر اُتے آن پئی اک واری
7314
جانی توں دھو ہتھ بہادر آن گڈاوڈ ہوئے
مارن تیغاں بے دریغاں تیراں جگر پروئے
7315
لوہو پان لئی شمشےراں تیز ہوئے گھس نیزے
برچھی ساون وانگر برسی جگر کریندی ریزے
7316
شیر جوان دوڑاون گھوڑے کر کر ہائے ہائے
ٹلیاں شور ککارے غوغے انبر تیک پُچائے
7317
تازی سُمّ وجان دھرتی پٹ کھڑی اک ساری
چھ زمیاں اٹھ انبر ہوئے جُڑ کے گرد غباری
7318
سورج چھپ گیا وچ دھوڑاں پیا غبار ہنیرا
چمکو چمک ہتھیاراں والی چانن کرے چوپھیرا
7319
کنگن کنٹھے تے زر نقدی شاہ دئے انعاماں
بھر مردانے رہو دلیرو شابش کہے غلاماں
7320
ہاٹھاں چڑھیاں فوجاں لڑیاں لوہو بدل وٹھے
سے کوہاں وچ نیر رتو دے لکھ بہادر کُٹھے
7321
دھرتی انبر تیک سیاہی زمیں ہوئی سبھ رتی
عالم اُپرّ رہیا نہ مولے صلح تحمل رتی
7322
جیہڑا تیر کمانوں چھٹے کوئی خطا نہ جاوے
سر سینے یا جگر دھُنی نوں اپنی جا بناوے
7323
چائیں واگاں رلی سواری جیوں بھٹھی وچ دانے
ڈھہندے اُٹھدے مثل پتنگاں جل جل مرن دھگانے
7324
موہوں منہ جھلن پھٹ کاری سورمیاں دے دائےے
مارو مار کریندے آکھن اک دوجے نوں کھائیے
7325
شتری طرم طنبور شہنائیں دھونسے ڈھول نقارے
گجنّ دیو غریو اسمانیں غلغل شور ککارے
7326
خالی ڈھول اتے بے مغزا باہروں سخن کریندا
فتنے دوزاں وانگ لڑائی صلح نہ ہوون دیندا
7327
تِیر وسّن جیون چُھڑ کے چھلا گوہڑا مینہ اسمانی
ملک الموت آہے سبھ سنبھے لے لے جاون جانی
7328
تیر تبر تلوار کٹاری زہروں پان چڑھائی
پٹ سٹے بنیاد تناں دی زوروں زور لڑائی
7329
چاکو چاک کرن تلواریں بجلی دے چمکارے
کڑکن گرز البرز گڑاون موت طوفان کھلارے
7330
مور منگھار کیتے لکھ سینے نیزے سیلے سانگاں
اوس موری تھیں ویکھ تماشا دین بلائیں بانگاں

لفظالی:
جانو قلزم نٹھا= قلزمی فوج نسن ای والی جے ، انبر = اسمان، تازی = عربی گھوڑے،گڈاوڈ ہوئے= گُتھم گُتھا ہوئے ، اک ساری۔۔۔۔۔۔= اکو وار دھرتی پُٹ کے لے گئے اوس نال گردو غبار دا اک اسمان ودھ گیا تے زمین دی گنتی اک گھٹ گئی ،لوہو پان لئی ۔۔۔۔۔۔= تلواراں نے رت پی کے پان چڑھائی ، البرز گڑاون= پہاڑ جیڈے فوجی ڈیگ دین، رتی= (١)لال سرخ۔ (٢) ماشے دا اٹھواں حصہ ، (٣) ذرا وی ۔ رتی دا وٹا وی لال سرخ ہوندا اے ،غریو= کھپ ۔ رولا ۔ چیک چہاڑا، رتو دے نیر= خون دے دریا، جا= تھاں مقام، دائیے = ٹیچے ۔ عزم ۔ ٹارگٹ Goal ، واگاں چائیں = جوش نال گھوڑا ٹور کے ، چھڑ کے چھلاّ= زور دی بارش جو تیزی نال آن لتھے ، مور= چھوٹی موری، منگھار= منگھ' منگھورا۔ وڈا سوراخ،فتنہ دوز= فتنے نہ مکن دین والا۔ پواڑے پوا دین والا، بھر مردانے= مصیبت دا بھار جھلن والے بہادر دلیر ساؤ،سمبھے= مستعد ۔ کم مکاون لئی تیار،سیلا= چھوٹی برچھی، دھگانے= دھکو دھکی،