ورقہ 391

7331
پھٹے مارے پڑ وچ رُلدے تن اُتےّ تن چڑھیا
ڈھیر لگے کوہ قافاں جیڈے لشکر ایسا لڑیا
7332
تیراں شونک شپا شپ تیغاں سُن کڑکار کمانی
دہشت کولوں اُڈ اُڈ ڈھہٹھیاں جیوں اِلاّں اسمانی
7333
لکھ تناں دے بیرے بیرے کِھنڈ گئے ہر پاسے
گدڑ لونبڑ تے بگھیاڑاں منہ موڑے کھا ماسے
7334
قاروں والے گنج بنائے کاگاں کڈھ کڈھ آنے
تیراں گرزاں کیتے میّتاںمنہ سر گنجے کانے
7335
اِلاّں چائے اَلاّں جیڈے لوہو بھرے بھُکانے
لکھاںگھَن مکھاں دے بھُوکن کیڑے پھڑے دہانے
7336
باغل لوک ڈراکل تاں ای نسن ہار شکستے
کانگ طوفان لہو دی ہتھوں بند ہوئے سب رستے
7337
ہانبڑ پین کمند گلاں وچ سر وڈھن تلواراں
جیؤں اِجڑ وچ چِترا اینویں کرن سپاہی واراں
7338
شاہپالے دی فوجے اوڑک ایسا زور اٹھایا
قلزم والے بادشاہے دا لشکر مار گُمایا
7339
چار اک سے پری کُل بچی جا چھپی دریاویں
ہور تمامی لشکر اس دا قتل ہویا وچ تھاویں
7340
ہاشم قلزم دے سلطانے بڑی ہزیمت آئی
نسّن چھپن بچن والی جاء نہ سُجھدی کائی
7341
اوڑک نس پیا بِن فوجوں کچرک پاپڑ ویلے
کھُوہ دندا دریا نہ سُجھدا بھاج پوے جس ویلے
7342
ڈھہن لگا دریا فکر دے شاہپالے تھیں نس کے
جان نہ دینا موذی تائیں شاہ فرمایا ہس کے
7343
اک امراء لگا اُٹھ پچھے فوج زور ا ور لے کے
ہاشم سنے سپاہیاں پھڑیا مگر دلیراں پے کے
7344
شارستانی قلزمیاں نوں پکڑ لیائے ڈیرے
نظر حوالے ہویا ہاشم پہرے پھرے چوپھیرے
7345
شاہپالے دا خاصہ آہا اک امراء وڈیرا
ہاشم شاہ ونج ملیااس نوں ہو محتاج بھلیرا
7346
اس امرائے دی کر منت کھڑے وسیلہ آ کے
گردن تیغ موہیں وچ سبزی پگ گلے وچ پاکے
7347
جا ملیا شاہپالے تائیں کہندا صاحب میرے
خواہے مار خواہے چا رکھیں جان میری ہتھ تیرے
7348
جھڑک دتی شاہپالے اگوں اے بد بخت نمردا
دل تیرے نے چاہیا کیکر ایسا ظلم قہر دا
7349
ایسا آدم زادہ سوہنا سے صفتاں دا سائیں
ساڈے باغ ارم تھیں پھڑکے کیتا مار اضائیں

لفظالی:
پھٹے= پھٹڑ ۔ زخمی، تن اُتے تن چڑھیا= پھٹاں دی سوج پاروں سریر موٹا دسدا سی، کڑکار کمانی= کمان دی کڑک دار آواز ، دہشت کولوں = دہشت پاروں ،کِھنڈ گئے = کھِلر گئے ، منہ موڑے کھاماسے= ماس کھا کھا کے اینے رجے کہ Fed upہو کے چھڈ گئے ، آنا= (١) اکھ دا ڈیلا (٢) اک سکہ روپے دا سولہواں حصہ، الاّں= لمے کدو ، گھن = وڈی مکھی دا چھتا، بھُکانے= بلیڈر۔ پیشاب دی تھیلی ، مکھ = شہد دی وڈی مکھی، دہانے=منہ وچ ، باغل = بھاگل۔ بھگوڑے بھگّل، شکستے نسن ہار=ہار کھا کے نسن والے نیں، کانگ= بے اوڑکا ہڑھ، ہانبڑ پینا= بھُکھیاں وانگوں ٹُٹ کے پینا ، کمند = گل گھٹن والے رسے، چِترا= چیتا، گُمایا= گوایا، دریاویں = سمندراں وچ ، ہزیمت= ہار شکست ، وچ تھاوِیں = اپنے اپنے مقام تے، سجھدی = نظر آوندی، پاپڑ ویلنا= ناکام ادھورے جتن کرنا، دندا= کنارا، بھاج = بھگدڑ، ڈھہن = ڈِگن، اک اُمرا= سرکردہ فوجی سردار، نظرے حوالے= نظر بند، خاصہ= چہیتا درباری، بھلیرا محتاج= چوکھا لوڑ وند، صاحب= مالک، گردن تیغ۔۔۔۔۔۔= ایہہ ساریاں نشانیاں معافی منگن والے مجرم دیاں ہوندیاں سن، سبزی= گھاہ پٹھے، رکھیں= بچائیں ،