ورقہ 395

7407
دُکھ ملامت عشقے اندر جیؤں ککھ اندر اگےّ
جیؤں جیؤں ککھ اگے وچ پائیے بھڑک زیادہ لگے
7408
اپنے آپ اُتےّ توں آکھیں دُکھ قضیّہ ایتا
اپنا آپ رہیا ہن کتھے کس نوں اپنا چیتا
7409
آپوں آپ رہیا اس گھر وچ کوئی شریک نہ دوجا
آپے ٹھاکر نام دھرائیوس آپ کریندا پوجا
7410
آپے حاکم آپ رعیت مہر آپے پٹواری
کون بٹیرا کیہڑا باشہ کیہڑا میر شکاری
7411
منہ بلی دا گج شینہاں دی ہر ناں پچھے دھانی
وحدت دور محمدبخشا دسدا چل کہانی
7412
باجھ بدیع جمال پری دے حال پچھاں میںکس دا
تن من زمیں زمن وچ بھائی ہور نہیں کوئی دِسدا
7413
ہوئی نشا وزیرے تائیں سن کے سخن پیارے
سو سو شابش دے شاہزادے آفرین پکارے
7414
ہتھ چمے سر گردن چُمےّ پوہنجے دھوڑ بدن تھیں
موہیں اوپر پلاّ پھیرے گرد اُتارے تن تھیں
7415
عطر گلابوں سر منہ دھوتا اٹکل نال نہایا
شربت صاف پلایا اتوں جوڑا خوب لوایا
7416
اک صندوق وڈیرا اتوں جلدی نال منگایا
دوئے وچ صندوقے بیٹھے چِھک لیؤ فرمایا
7417
آپ ہتھیں شاہپال بہادر چھک کے باہر نکالے
سونپ صندوق وزیرے تائیں جا دربار سمبھالے
7418
جا رکھیا شاہزادہ ڈیرے شفقت نال وزیرے
شربت کھانے مالش مُشکاں کردا وانگن ویرے
7419
شاہپالے دے فکر نکھُٹے بیٹھا نال فراغت
لکھ نذرانے لوٹی لدھی لاکھاں صدقے لاگت
7420
دے انعام سپاہیاں تائیں خرچ کیتی سبھ لوٹی
ننگیاں نوں پوشاکاں دتیاں بُھکھیاں تائیں روٹی
7421
قیدی سبھ خلاص کرائے صدقہ اوس خوشی دا
عدل سخاوت دان کمائے ظاہر ہور پوشیدہ
7422
کیتا غسل وضو کر تازہ سر سجدے وچ دھریا
سُکا باغ مراد میری دا رب کیتا مُڑ ہریا
7423
جاندی جاندی لج پت میری رکھ لئی تدھ سائینا
انت نہیں احسان تیرے دا بخشیں عیب خطایاں
7424
توبہ تائب ہو در رب دے روندا نال افسوسے
کرم کریں تے بخشیں مینوں خون کیتے بے دوسے
7425
توں ہیں دائم بخشنہارا پاپی اسیں ہمیشہ
پکڑ کریں تاں کد چھٹکارا کوتاہ فکر اندیشہ

لفظالی:
اگے=اَگ وچ،ایتا=اتنا،قضیہ=مصیبت۔،ٹھاکر=مندر وچ وشنو دی رکھی مورتی،مُہر=ٹ ک ٥٠،باشہ=بازورگاشکاری پنچھی چڑیاں مارن والا باز،کون بٹیرا۔۔۔۔۔۔=بٹیراباشہ تے مِیر شکاری وحدت وچ اِکو دے ای روپ نیں،منہ بلی دا گج شیہاںدی۔۔۔۔۔۔=میاں صاحب عاجزی انکساری نال ذات دی نفی کر رہے نیں اپتے مُنہ نوں بلّی ورگا پر مصنوعی گج شیراں ورگی اے وحدت دا بیان کرن دے ناقابل ہاں ،نِشا=نسچہ۔تسلی،اٹکل=صحیح جاچ۔ٹھیک طریقہ،جوڑا خوب لوایا=چنگے سوہنے کپڑے پہنائے،چھِک=کھِچ،مالِش مُشکاں =کستوری دی خوشبو ملن دا کم ، لوٹی= بادشاہ توں لُٹائی گئی رقم ۔ نثار ۔ نچھاور، لدھی = مِلی ، لاکھاں صدقے لاگت=صدقے دین تے لکھاں خرچ آئے، نکھُٹے= مُک گئے ، خلاص کرانا= آزاد کرانا، عدل۔۔۔۔۔۔ کمائے = نیاں سخاوت تے دان دا صحےح حق ادا کیتا، لج پت = عزت تے شرم ، خطایاں = غلطیاں ۔ گناہ، افسوسے= افسوس ، بے دوسے= بے گناہ لوک، کد چھٹکارا= رہائی خلاصی نہیں ہو سکدی، کوتاہ فکر اندیشہ= اسیں سوچ وی نہیں سکدے ، دائم = ہمیشہ توں ، جاندی جاندی = جان ای لگی سی، دائم = ہمیشہ توں، کیتا غسل وضو کرتازہ= پہلاں غسل کر کے مگروں وضو تازہ کیتا،