ورقہ 396

7426
ساری عمر اچابت چائی کھٹی بُرے عمل دی
کاغذ چھیک گناہاں والا کانی پھیر فضل دی
7427
باب میرے وچ اینویں آہی لکھی روز اول دی
جَفَّ الْقَلَمْ محمد بخشا لکھی کدی نہ ٹلدی
7428
رب سچے دی بخشش اُتے تکیہ پرنا دھرکے
سجدے تھیں سر چایا شاہے بیٹھا خوشیاں کر کے
7429
اُٹھ خچر تے ہاتھی گھوڑے سنج ہتھیار پوشاکاں
دِتے بخش سپاہیاں تائیں پنکھی میر ہشناکاں
7430
عیش خوشی دا جشن بنایا نغمے ناچ سنوارے
شادی دے دروازے کھُلے طاق غماں دے مارے
7431
آن کلاونت گاون لگے باربدی آوازے
چنگ چغانے مدھم تنبورے ساز سبھو سُرسازے
7432
سارگیاں دی سے رگ وچوں سے رنگ سا رنگ والے
سات سُراں دے نال سرندے دین ولایت ہالے
7433
کافوں نونوں سُر سنائے کمانچے قانوناں
یَاسَتَّارُ کہن ستاراں دف کرے دف دوناں
7434
دھن دھن ذکر دھنا سریاں دا رب رب ورد رباباں
شابش شکر شگن شر نائیں شیشے نشے شراباں
7435
کنجر بھگتی لوگ گویےّ تان بیان سناون
ساقی سندر دے صراحی آن گمان وکھاون
7436
سُن ٹپے اک ٹپے حالوں اکناں پتے درونے
اکناں اگ چھپائی رکھی جیوں پھُل ہوئے چونے
7437
کھادے کھانے جومن بھانے خوب لطیف انازوں
بوء عطر دی نشہ شرابوں لذت تار آوازوں
7438
اک خوشی شہزادے والی دوجی فتحا ماری
خوشیاں وچ امیر شزادے مجلس خوب سنگاری
7439
تین دہاڑے سیف ملوکے پیتے شربت داروں
چوتھے روز ہویا کجھ تکڑا بھار جھلے ہتھیاروں
7440
زیور زیب لباس شہانہ جوڑا خُوب لوایا
سبھ ہتھیار پہنا شزادہ نال وزیر لیایا
7441
شاہ شاہپال بہادر اگے حاضر کیتا جا کے
سیف ملوک سلامی کیتی چنگی سیس نماکے
7442
شاہ شاہپال تخت توں اُٹھ کے دے جواب سلاموں
سیف ملوکے نوں گل لائیوس حرص ہوایوں عاموں
7443
سر منہ چمےّ نال محبت بہت کرے دلداری
صدقے ہوندا ویکھ عجائب صورت اپن اپاری
7444
سیف ملوک ڈٹھا جد شاہے نظر شکل ول دھرکے
خوب جوان نہایت سوہنا اکھ نہ نیڑے پھڑکے

لفظالی:
اچابت چانا= ہٹیاں دا ادھار سرتے چاڑھنا، چھیک = موری کر کے ردی کر دے، کانی پھیرنا= قلم زن کرنا۔ قلم نال کٹ دینا، جف القلم ۔۔۔۔۔۔ = ٹ ک المعجم الکبیر طبرانی۔ قلم خشک ہوگئی (ہور کجھ نہیں لکھ سکدی) بخشش اُتے تکیہ پرنا دھر کے= انحصار کر کے ٹیک لاکے ۔ آسرا تے بھروسہ کر کے ، باب میرے وچ= میری بابت میرے کھاتے وچ، سنج = خود زرہ بکتر، بار بدی آواز= گویے بار بد ورگے آوازے ، مدّھم= ستار، بار بد= خسرو پرویز شاہ ایران دے من چاہے بربط نواز دا لقب جیہڑا موسیقی دے رسالے گنج العروس دا لکھاری تے ٣٠ راگاں دا موجد اے ، ساز سبھو سُر سازے= سارے ساز سُر کیتے، دین ولایت ہالے= دوجے ملک دی خراج تحسین پیش کرن ہالہ ٹ ک ٤٦٩ قانون تے کمانچے کن فیکون دے ویلے دا راگ سنا رہے نیں، کمانچہ= وائلن دا گز ،دف= دف دے اکو پاسے چمڑا مڑھیا ہوندا اے،اناز = اناج، اپن اپاری= نویں نویکلی ۔ جہدی پہلے کوئی مثال نہ ہووے، اکھ نہ نیڑے پھڑکے= اکھ جہدے جلوے دی تاب نہیں لا سکدی،