ورقہ 401

7522
ہاشم شاہ نوں رخصت کیتا دیکے فوج مثالہ
آپوں چا دلے وچ چایا باغ ارم دے والا
7523
وجے طرم تنبور نقارے پُٹے پیر نشاناں
وجے دھونسے ڈھول تے شتری بدھے لک جواناں
7524
مائی بھین تے بیٹی تائیں لکھ گھلیا پروانہ
آہو خاطف کاغذ لے کے اگے ہویا روانہ
7525
خوشیاں نال ہویا سی راہی کرکے تیز اُڈاری
ہن مینوں انعام ملے گا مہر ہوسی سرکاری
7526
خیر سکھے دی خبر دیاں گا اوّل مہیں چل کے
یار ملاسن اجر اس گل دا پریان دیسن رل کے
7527
شاہ پری نوں خبر نہ کوئی کے ہویا اس پاسے
اکھ جھمکی ہنجوں وگن ہر دم نال اُداسے
7528
گل وچ مالا ہتھ وراگن سر منہ خاک رمائے
داغ وراگ وراگن کیتی راگ غماں دے گائے
7529
دھڑی خوشی دی جھڑی متھے تھیںلِٹّاں گل وچ پیاں
گُھٹ لہو دے پِیو نکھُٹی چھٹ گیاں سبھ سیاں
7530
سالو پاڑ بنائی کفنی سُوہے ساڑ گمائے
جان بجوگ کیتی سی جوگن جوبن روپ ونجائے
7531
سُرمہ نیر اکھیں وَیہہ تُریا نالے لہو جگر دا
اس رنگوں ہن داغی ہویا چہرہ نور قمر دا
7532
کالے بِشیئر مُشکاں والے دُدھّ دہیں دے پالے
عطر پھلیل کنگھی بن ہوئے بھیکھ مداری والے
7533
لتھے لنگ گیاں بھج سُنتاںدرداں انتاں چایاں
دوزخ ہو ڈھکے گھر جنتاں کنڈے پھل وچھایاں
7534
دُکھاں بنھ لئی بے عذری گزری شرموں لجوں
کڈھی درد فراق سجن دے باہر چج کچجوں
7535
نموں جھان حیران فکر وچ خبر نہیں کے ہوندا
باپ میرے دی فتحا ہوسی یا مڑ آسی روندا
7536
بلبل نوں اوہ پھل کھڑایا پھیر پوے گا جھولی
یا اس خار و خار فراقوں سدا رہیگی ڈولی
7537
سرو بلند کرے گا سایہ شاخ سمن رل بہسی
یا ایہہ قُمری کوک کریندی خشک چمن وچ رہسی
7538
باپ میرے نوں لبھسی اوہو گوہر تاج شہانہ
یا اوہ خالی ہتھ مڑے گا دے کے فوج خزانہ
7539
خبر نہیں ہن بابل میرا مُڑ دا کیہڑیں رنگیں
سیف ملوک لیاوے خیری جا رُپیا وچ جنگیں
7540
اگے سیف ملوک کھڑایا بہت آہا غم اس دا
اتوں بابل رخصت کیتا پیا کلیجہ کھُسدا

لفظالی:
مثالہ= بادشاہی فرمان تے منشور ۔کمیشن ، نشاناں = جھنڈیاں ، پُٹے پیر= گڈے ہوئے جھنڈے روانگی ویلے پُٹ کے نال نال چُکے جاندے نیں ، شُتری= اوٹھ تے وجاون والا نقارہ ، پروانہ = تحریر۔ حکم ، مہیئں= میں ہی، نال اداسے = اداسی نال، وراگن = بیراگن ۔ جوگیاں دے بیٹھن لگیاں سہارا دین لئی لکڑی یا لوہے دی بنی Tدی شکل دی بنی اک شے جہنوں اوہ کدی اپنی کچھ تھلے وی لے لیندے نیں ، مالا=تسبی، وراگ= جدائی۔ وچھوڑا، وراگن=مہجورہ ۔وچھوڑے ماری ، پیو نکھٹی= پی کے مُک گئی ختم ہو گئی، دھڑی= متھے دے والاں دیاں پٹیاں ، گمائے = گنوائے ،سُوہے= سگناں دا لال جوڑا ، بجوگ= فراق وچھوڑا، کالے بشیئرمشکاں والے= کالیاں خوشبو دار زلفاں جو زہریلے سپ وانگوں ہلن ، بھیکھ= بھیس ، مداری = شاہ مداردے منن والے جنہاں دے سِر دے وال کھُلے وال تے لمے ہوندے نیں ، لنگ لتھے= بے پردگی ہو گئی،سُنتاں بھج گیاں = سنت رسول دے مطابق پردے تے عمل نہ ہو سکیا، وچھایاں= بستر ے کیتے منجیاں ،رُپیا= رجھیا ، ڈولی = کمبدی ، پیا کلیجہ کھُسدا، Heart is sinking،