ورقہ 16

269
فرمائش دے تیر چوپھیروں آون ویکھ توانا
ہوندے سچ محمدبخشا شاعر لوک نشانہ
270
ضعف طبیعت دا تک میں بھی عرضاں مُڑمُڑ دھر دا
سائیں جی ایہہ کم نہ سوکھا سو جانے جو کردا
271
فیر اوہناں فرمایا میاں سچ کہیں توں سارا
پر جے واہر ولی دی ہوئی کرسی پار اُتارا
272
مشکل حل کریسی مرشد تر جاسن تنخواہاں
حاضر ہو اس خدمت اندر جو ِلکھ گھلی شاہاں
273
جدوں فقیر دلیری دتی مدد کیتی شیرے
وانگ حسن میمندی آیوس خوش ہویا مڑ ڈیرے

سلطان محمود غزنوی دے وزیر حسن میمندی دی حکایت

274
سُنو حسن میمندی والی دساں کھول حکایت
جتھوں اس قصے دی اول ظاہر ہوئی روایت
275
خبراں گھِن کتاباں وچوں قصہ جوڑ سنایا
واللہ اعلم اوس زمانے کیونکر حال وہایا
276
راوی لوک روایت والے پچھلے جُگ دے دانے
ایہہ سبب قصےّ دا دسدے اندر ہکس زمانے
277
غزنی شہر اندر ہک آہا والی شاہ شہاں دا
نیکو کار بہادر سوہنا عادل سخی کہاندا
278
یوسف شکل سکندر شوکت نوشیروان عدالت
خاتم حکم سلیماں نالوں حاتم نال سخاوت
279
خاصہ مرد عبادت اندر افسر سر سلطاناں
شاہ محمود اوہدا سی نانواں روشن وچ جہاناں
280
مرد کمال علم دا فاضل قدر شناس ہنر دا
قدر بقدری ہر ہک تائیں دئے روزینہ زردا
281
شاعر کاتب حافظ عالم زاہد صوفی سارے
کھان انعام معاش جگیراں نِردھن لوک نکارے
282
ہر جائے پُن دان شہانہ ہر جائے بخشیشاں
خادم مخلص سی فقراواں عُلماواں درویشاں
283
شاعر مرد سخنور دانے پاس اوہدے نت رہندے
شعر کلام عجائب قصے رہن ہمیشہ کہندے
284
سخن کلام سنن دا دائم رکھدا شوق شزادہ
مجلس اندر شغل علم دا روزوں روز زیادہ
285
سیر سلوک حکایت قصے سُندا نال طلب دے
ِمِٹھے چرب نوالے شاعر دیون شعر عجب دے

لفظالی:
واہر = امداد۔ پشت پناہی ۔ امدادی ٹیم ۔شیرے = حضرت حاجی بگا شیر ۔حسن میمندی = سلطان محمود غزنوی د ا وزیر ۔آیوس = میں آیا ساں ۔خبراں=روائتاں ۔وہایا = بیتیا ۔گزریا ۔ہکس = اک، جُگ = ٹ ک تفصیلاں ۔خاتم = ختم کرن والا۔ مہر لاون والا۔ آخری فیصلہ سناون والا ۔ عرض=درخواست خاصہ = خاص مقبول تے پیارا بندہ ۔محرم۔ دوست ۔افسر = تاج ۔روزینہ = اک دیہاڑی دا مقررہ خرچ ،نردھن = کنگال ۔قدر بقدری=درجے سیتی ۔معاش جاگیر = کسے نوں پالن لئی ویہلا بٹھاکے کھوان لئی دتی گئی زمین ۔پن = پاپ بخشاون لئی کیتا گیا نیک کم ۔دان = عام سخاوت ۔سیر = جمع سیرت دی ۔سلوک = فقیری منزلاں ۔چرب نوالے = تھندیاں برکیاں = شاہ دامن پسند کلام ۔ شاہ دے قصیدے۔