ورقہ 403

7560
مائی صبر دسیں تدھ مسئلہ سنیا نہیں کتابوں
پانی صبر' میرا دل چھانی کیونکر بھرئیے آبوں
7561
تتے تاء نہ کر کھاں دھیےّ بیٹھ نچلی ہوکے
سیف ملوک نہ کوک سُنیندا جے سد لَیسیں روکے
7562
مائے وس نہیں کجھ میرے کد سُکھلیّ روواں
میں ڈھولک کُٹ کرے وچھوڑا کیونکر صابر ہوواں
7563
دھیےّ روپ گُمائیں اپنا بن بے ہوش دیوانی
بے روپاں نوں انگ نہ لاندے سوہنے یار گمانی
7564
مائے جوبن ہے مُل نقدی عشق خریدن کارن
عشق لیا تاں جوبن دینا میں ہن بنی بپارن
7565
دھیےّ کے کریسی ایتھوں روون دھوون تیرا
کاہنوں اپنا حال ونجاویں اکھیں پوگ ہنیرا
7566
روون دھوون کیکر چُھٹدا ہویا کم ہمارا
کد کوئی سٹ بیٹھا مائے آپو اَپنا کارا
7567
دھیےّ قہر قیامت چائیں کے تدھ پھڑیاچتاّ
کریں سنبھالا مُنہ سڑی گا چٹ نہ بہتا تتاّ
7568
الڑے گھاء نہ چھیڑو میرے پھٹ پر لُون نہ لاؤ
اندر پاڑ نہ ویکھو مائے متیں نال ستاؤ
7569
گیں درکُوکاں کُوک سناوان سیف ملوک دُراڈا
جے چاہے تاں آن ملائے قادر رب اساڈا
7570
اس اگے کجھ دیر نہ لگدی سانوں مشکل بازی
عاجز ویکھ محمدبخشا کرے غریب نوازی
7571
ایہناں گلاں وچ آہیاں درداں فکراں مار ڈولایاں
اتوں آہو خاطف آیا خوشییں واگاں چایاں
7572
آوندیاں اس سیس نماکے خوشخط اگے دھریا
ہسدا ہسدا دئے مبارک سُکیوں ہویا ہریا
7573
پریاں کھول شتابی واچے لکھے حرف شہانے
نالے اوس زبانی دسے جیوں جیوں حال وہانے
7574
لوں لوں خوشی تماماں ہوئی شکر ربانا سیون
تنیاں ترٹ گیاں پشوازاں جامے وچ نہ میون
7575
حلوا لُچیّ تے مٹھیائیاں صدقے شادی ونڈے
گلیاں وچ خیرایت کر کے ہیرے موتی چھنڈے
7576
آہو خاطف نوں کر شفقت منہ مٹھا کروایا
خلعت دولت دان دیوائے نال انعام رجایا
7577
نالے جس پری پر اس دی حرص محبت آہی
زیور گہنا وافر دے کے اس دے نال ویاہی
7578
ہوئی بدیع جمال شزادی سچی قول قراروں
دیو دعائیں دیندا تُریا رخصت لے سرکاروں

لفظالی:
کتابوں مسئلہ= ٹ ک فارسی مصرع ''نہ صبر در دل عاشق نہ آب در غربال، غربال= چھانی ۔ چھاننی، کیونکر بھریئے آبوں= پانی نال کیوےں بھرئیے، نچلی= پر سکون ۔ چپ چاپ، کد سُکھلی روواں = روون وی کوئی ایڈا سوکھا کم نہیں جو مجبوری نال ای رویا جاندا اے، ڈُھولک کُٹ = مینوں وچھوڑا ڈھولکی وانگوں دوہاں پاسیاں توں کٹ رہیااے، گمائیں = گوائیں ، گمانی= اپنے حسن تے گمان کرن والے، کارن = لئی ۔ واسطے، اکھیں پوگ ہنیرا= اکھاں توں انھی ہو جاسیں ، ہویا کم ہمارا= ایہہ تے عاشقاں دا پیشہ اے ، کارا= کم کار، چتّا = (١) ہٹھ ۔ ضد۔ (٢) بے شرمی۔ دلیری، کرن سنبھالا = احتیاط کریں ، الڑے گھاء = کچے زخم ، متیں = نصیحتاں ، کیں در= کدھے بوہے تے جا کے، عاجز ویکھ = مسکین جان سمجھ کے ، نماکے =نوا کے ، واچے=پڑھے ، وہانے=بیتے، شکر ربانا سیون = اللہ دا شکر ادا کرن ، نہ میون = نہ سماون ، تنیاں ترٹ گیاں = سریر پھُلن پاروں کپڑے چھوٹے ہو گئے ، چھنڈے=کھلارے۔ سوٹ کیتی،