ورقہ 405

7598
شام بِنا آرام نہ مینوں شاہ پری فرماوے
جا وکیل محمدبخشا اینویں کنت نہ آوے
7599
رب اسانوں فتحا دتی نالے مطلب پایا
قلزم چھوڑ چلو گھر اپنے شاہپالے فرمایا
7600
وجے طرم طنبور نقارے پٹے پیر نشاناں
گجے دھونسے ڈھول تے شُتری بدھے لک جواناں
7601
پھیرے ہتھ کیتے مڑ تازے تازی پندھ کپن تے
زین تُرنگ پلان اُٹھاں تے پاکھرپئے ہاتھن تے
7602
قطب قطب کر ناد پکارے علی علی کرطُریاں
مست قلندر بولن بھیراں پاء کہروڑاں گُھریاں
7603
اگے کرن نقیب آوازے شاطر وٹن گھُریاں
سادھ مہم گھراں نوں فوجاں چائیں واگاں ٹُریاں
7604
شاہ شاہپال اتے شاہزادہ مزلومزلی ٹُردے
سر پر چھتر نشان سنہری گِردے باجے گھُردے
7605
جنگل جوہ سُہایا سارا رُتّ بہار وساکھی
کرن شکار سوار پیادے ٹردے جان ہر باکھی
7606
ہر جوہے ہر جنگل بیلے اینویں تکدے جاندے
گل پھُل رنگ برنگ ہزاراں بوٹے ون وناں دے
7607
ٹھنڈیاں مِٹھیاں نہراں وگن جیونکر پانی گنگی
خوش ہوا مقام عجائب ہر ہر جائے جھنگی
7608
اچن چیت اک جھنگی وچوں بُھکھے شیر مریلے
ماری گج تے دُنب وجایا ہتھ مُچھاّں پر پیلے
7609
بھن اگواڑی آ کڑ چاڑھی جَت کیتی جیؤں سُوئے
اُوگی وانگن دُنب مریندا توپے وانگر کُوئے
7610
دیو عفریت ہوئے اُڈ اُچے اوہ آہے سبھ ناری
سیف ملوک آہا وچ خاکی آئی اس دی واری
7611
نالے سن ہتھیار اوہناں دے لوہو پی پی رجےّ
تسّی سی تلوار اِسے دی برم آہا ہتھ سجےّ
7612
شیر ببر خُم مار زوراور شاہزادے پر آیا
بدّل وانگر گج کڑک کے دُنب سرے پر چایا
7613
کڈھے ڈنڈ گھمنڈ مچائیوس نالے جت کھلاری
مل کھلا میدان بہادر فوج گئی ڈر ساری
7614
شیراں سندی ہاڑ نہ خالی ڈردا کوئی نہ ڈھُکےّ
ہر کوئی اک دوئے دے پچھے مُنہ چھپاوے لکے
7615
شاہزادے دی رستم دستی نالے سن ازماندے
کیسا مرد دلیر سپاہی دِس رہے گا واندے
7616
شیر اُپر جے پیا اکلاّ دھن مائی جس جایا
نہیں تاں اینویں مُنہ دا رستم مہر افروز بنایا

لفظالی:
شام= محبوب، وکیل = وسیلہ ۔ مناوڑا،کنت= خاوند،طُرم = فوجی بگل، نشاناں = جھنڈیاں جیہڑے پہلے گڈے ہو نے سن، شُتری= اوٹھ تے لایا نقارہ، تازی= عربی گھوڑے، ترنگ= ہوا وانگوں اڈن والا گھوڑا، پاکھر = ہاتھی اُتے پائی زرہ، ناد= سمندری گھوگا جو فقیر وجاوندے نیں تے اوہدی آواز اوہناں نوں انج جاپدی اے جویں قلب پکار رہیا اے،طُریاں = نفیریاں ۔ شہنایاں ( جو علی علی آکھ رہیانیں ) ، بھیراں = توتیاں شہنایاں ، کہروڑاں= دل چھیکنہار تیز سریلی آواز، گُھُریاں = وجیاں ، شاطر = کمانڈو ۔ حفاظتی سپاہی لوکاں نون گھوریاں وٹ کے ویکھ رہے نیں ، باکھی= وکھی ۔ پہلو، گِنگی= گنگا دے پوتر دریاوا، جھنگی = سنگھنے رُکھاں دا جھُنڈ ، پیلے = زور نال دبے، اگواڑی بھننا= اُباسی لین لگیان آ کڑنا، جت = وال ، اُوہگی= اُوگی ۔ ست ہتھ لما کوڑا ہنٹر جیہڑا گھوڑیاں نوں چال سکھاون لئی ورتیا جاندا اے ، برم = ورم۔ سوج، ہاڑ= ہنوں ۔ جاڑھ ہوڈ ہڈی وچ پھساون والے دند، جایا= جنمیا، ہتھ پھیرنا= ٹ ک تفصیلاں ، واندے= نمایاں ۔ ظاہر، رستم دستی = رستم والے پہلوانی ہتھ،خُم مارنا= تھاپی مارنا۔ چیلنج کرنا،