ورقہ 407

7636
نچدا ٹپدا گجدا آیا کردا شور ککارا
سیف ملوک بہادر اگے ڈھہٹھا ہو بے چارہ
7637
شاہزادے دی مردی تک کے شاہپالے ہتھ پھیرے
شابش آفرین پکارے واہ ڈِٹھے ہتھ تیرے
7638
دیوتیاں نے رستم دستی سر متھے پر منیّ
اس تھیں بہتر ڈٹھا اکھیں جیسا سنیاں کنیں
7639
اُٹھ شاہزادہ پَیر پیادہ کرن لگا تعظیماں
شاہپالے ول ہویا سلامی کر کر کے تسلیماں
7640
گھوڑا ہور منگایا شاہے سونے موتیں جڑیا
سیف ملوکے اگے رکھیا شاہزادہ پھر چڑھیا
7641
کاٹھی تے خلگیر سنہری لعلاں نال جڑائے
زر تاراں لمکاراں سُچیاں زر لگام چڑھائے
7642
شاہزادہ اُس گھوڑے چڑھیا ٹردا چال گُمانی
تک تک پریاں دیو پکارن واہ صورت انسانی
7643
اوسے ڈولے خوشییں خوشےیںٹُردے ٹُردے آئے
اوسے باغ ارم وچ مڑ کے آن نشان لگائے
7644
شارستان اندر سُن خبراں ہر گز رہیا نہ کائی
استقبال شہاں دے کارن آئی باہر لوکائی
7645
سرو بانو تے مہر افروزہ پریاں دیو تمامی
نکےّ وڈے نذراں لے کے آئے پھیر سلامی
7646
سیف ملوک تماماں ڈٹھا دین لگے تشریفاں
بادشہانے تحفے دتے کے دسّاں تعریفاں
7647
رنگ رنگاں دے تاج سنہری چیرے کلغی توڑے
وَنّ وناں دے کھیس دو شالے چوغے فرغل جوڑے
7648
پھیر نویں سر تازہ کیتا سیف ملوک شزادہ
خاطر تے دلداری کیتی حدوں بہت زیادہ
7649
غور دلاسے ہور خوشامد لطف احسان نہایت
سیف ملوکے نال کیتو نیں چاہ پیار عنایت
7650
بانہہ اوہدی شاہپالے پھڑ کے مائی دے ہتھ پائی
ایہ لے چیز کھڑائی مائے شُکر میری رہ آئی
7651
مینوں فرض تیرا فرمانا سر توں لتھا بھارا
راضی رہیں اساڈے اتے میں ہاں چاک تمھارا
7652
ماں منیّ تاں رب منایا پہلا مرشد مائی
شکر خدا دا جے توں راضی نالے پت رہ آئی
7653
شاہپالے پر راضی ہوئی مائی دلوں بجانوں
دے دعائیں کیتوئی مینوں سُرخرو جہانوں
7654
اساں تساں مر جانا جیونکر توڑوں ہوندی آئی
دنیا تے رہ جاسی بیٹا بھلیاں دی بھلیاں

لفظالی:
مردی= مردانگی، ہتھ پھیرنا= کنڈ تے تھاپڑا دینا، رستم دستی= رستم والے ہتھاں دی بہادری، پیر پیادہ= پہلوان لوک کشتی جتن مگروں ننگے پیریں ٹر کے بزرگاں کولون دعاواں یا انعام لین جاندے نیں ، خلگیر= زین ۔ گدیلے ، زرتاراں = سنہری سُچا تِلا، لمکار= گھوڑے تے پاون والی کڈھائی والی چادر، گمانی= گمان بھری۔ فخریہ، ڈولے= چال انداز نال ، لوکائی= خلقت، تشریفاں = عزت شرف نوں من کے دتے گئے خطاب تے خلعت ، کلغی = متھے تے آئی پگ د ی چوٹی اُتے ٹکیا ہیرے جڑیا گہنا، توڑا= پگ دے اُتلے ول اُتے لپیٹی جاون والی سونے دی زنجیر، چیرا= چھوٹی جیہی سوہنی پگ ٢ ولاں والی، فرغل=روں بھریا جُبہ ۔ روئی دا ر چوغا، دل داری کرنا= انج خاطر تواضع کرنا کہ مہمان دا دل کسے طرحاں نہ ٹٹے اوہدی خواہش دا احترام کرنا، غور = مہر بھری توجہ، دلاسا= حوصلہ ودھا کے ٹھنڈ پاون والا کم ، نہائت= آخری درجے تائیں اوڑکاں دی، رہ آونا= اپنے ذمے کم نوں نبیڑ کے سرخرو ہونا، بھارا= قرض، پت رہ آنا= عزت وقار قائم رہنا۔ ، بھلیائی = نیک کم ،