ورقہ 411

7712
حکمت پاک خداوند کیتی عشق پچھے تاثیراں
سبھناں دے دل لگا عاشق وانگن سکیاں ویراں
7713
ٹھنڈ پوے شہپالے تائیں جیوں جیوں صفتاںکردے
دماّں باجھ شزادے اگے ہو رہے سبھ بردے
7714
کیتی صفت نہایت سبھناں جان لیا شاہپالے
مرضی لوڑے دیوتیاں دی پُچھے تے پڑ تالے
7715
سنو دیوانو تے امراؤ میر وزیر کبیرو
خویش قبیلہ سبھ اکٹھے کرو صلاح وزیرو
7716
قصہ ایس شزادے والا سُن بیٹھے ہو سارا
صفتاں ویکھ لیاں تے اندروں عشقے دا بنجارا
7717
حسن بدیع جمال میری دے مُٹھا ہے از غیبوں
نہاتا ندی غماں دی اندر پاک ہویا ہر عیبوں
7718
بیٹی میری عشق اوہدے نے بدھی نال کمنداں
مینوں بھی ہے مٹھا پیارا وانگ پُتاں فرزنداں
7719
جے ایہ گل تساں دل بھاوے ناتا دے ویاہاں
نہیں تاں دیو جواب شتابی گھلاں پرت پچھاہاں
7720
سبھناں کہیا فتح مبارک سُن حضرت شہپالا
بھلی گلے دا پچھن کیہا گھڑی نہ کریؤ ٹالا
7721
ایہ جوان شزادہ آدی صفتاں انت نہ کائی
ایس جیہا کوئی کنت نہ لبھے لائق تیری جائی
7722
ایہو کم مبارک تینوں راضی اسیں تمامی
دیو پری کوئی عیب نہ دھرسی نہ وٹا نہ خامی
7723
جیکر عرض اساڈی منیں ساعت دیر نہ لاؤ
ایہ جوان پسند اسانوں ناتا بخش ویاہو
7724
ساک قبیلہ راضی تک کے ہویا شاہ سوایا
مجلس وچوں اُٹھ شتابی محلاں اندر آیا
7725
مائی بھینو بیگم تائیں سدکے کول بہاندا
دسوّ کے تساڈی مرضی ترہیاں نوں فرماندا
7726
بسم اللّٰہ بسم اللّٰہ شاہا ایہو ساڈی مرضی
اسے مطلب کارن ہتھوں اسیں تیرے ول عرضی
7727
دھی اساڈی لائق شاہا! ایہو کنت رنگیلا
قسمت جوڑی رب محمد کر اوسے دا حیلہ
7728
نیّت خیر اسے پر آکھو چھڈو ہور دلیلاں
بھلیاں دھیاں دین اجیہاں مرد نجیب اصیلاں
7729
پھیر اوتھوں شاہ اُٹھ کھلوتا آکھ دعائیں خیراں
جا دربار تخت پر بیٹھا خلق چمیندی پیراں
7730
نیتّ خیر دلوں اس آکھی کر چھڈی کڑمائی
سیف ملوک بدیع جمالے باہروں خبر نہ کائی

لفظالی:
دماں باجھ= نقدی قیمت توں بغیر، بردے= زرخرید غلام، پڑتالے = پڑتال کرے، دیوان= شاہی کچہری دے کار مختار ( خاص طور تے مالی معاملیاں دے ) ،مُٹھا ہے از غیبوں = اللہ ولں ای لٹیا گیااے، کمنداں = زلفاں ۔ چمڑے دا بنیا رسک پھندا جیہڑا کھچن نال ہور وی کسیاجاوے،ٹالا= عذر ۔ التواء پھیر کرلین دی تجویز، آدی= مڈھ قدیمی، جائی= بیٹی، وٹا= کسے جسمانی یا اخلاقی بج پاروں قیمت وچ پایا گھاٹا، عرضی = عرض گذارن والے ، کنت=خاوند شوہر، نیت خیر= کسے ارادے دے پکے یا منظور ہو جاون یا دن متھے جاون مگروں رل کے پڑھی جاون والی دعا، دلیلاں= خیال، نجیب=ماں پیو ولّوں خاندانی ، کُڑمائی = منگنی،