ورقہ 412

7731
بیٹھے سیج خوشی دی اُتےّ اک اکلّی جائی
باتاں کر دے من پرچاندے پڑھدے شکر خدائی
7732
گھڑی آرام کیتا رل دوہاں پھیر اُٹھیا شاہزادہ
رخصت اذن پری تھیں لیندا کر کر عذر زیادہ
7733
مائی جی دے ڈیرے جاواں ونج کھلواں حاضر
اوتھے بھی کوئی جھٹ گزاراں کراں خوشامد خاطر
7734
ایہ صلاح بدیع جمالے بہت پسند لیاندی
بسم اللّٰہ بسم اللّٰہ اگوں شابش دے فرماندی
7735
مائی جی دے ڈیرے آئے شاہ پری شہزادہ
راتیں تیک رہے اس جائی الفت نال زیادہ
7736
خوشییئں خوشیےئں رات گزاری اوسے وچ مکانے
دھمی صبح ہویا خوش ویلا لگی لوء جہانے
7737
کیتا وضو شہزادے اُٹھ کے آکھی بانگ فجر دی
پڑھی نماز عبادت کیتی اپنے زور قدر دی
7738
ذکر وظیفے ورد کریندا بیٹھا مل مصلیّٰ
شکر گذارے ربّ چتارے تیری ذات معلیّٰ
7739
سرو بانو اس ویلے اُٹھ کے پاس گئی شہپالے
اوہ بھی اگوں نال ادب دے عزت نال بہالے
7740
بسم اللہ جیؤ آئی بھینا کول اساڈے بہو کھاں
سیف ملوک کتھے کُجھ اس دی حال حقیقت کہو کھاں
7741
سرو بانو نے کہیا اگوں ہے اوہ میرے ڈیرے
تھکا ماندہ رہیا اتھائیں پاس نہ پہتا تیرے
7742
شاہپالے فرمایا بی بی کیوں تدھ نال نہ آندا
مینوں شوق دیدار اوہدے دا غلبہ کردا جاندا
7743
سرو بانو نے شاہزادے دی شاہے اگے دونی
آدمیت دے عذر لیاندے کیتی صفت سپونی
7744
شاہپالے فرمایا اس دی سد کراں مہمانی
ایت زمانے آدمیاں وچ کوئی نہ اس دا ثانی
7745
سرو بانو بھی کہندی اگوں اے بھائی ایہ سانوں
غیب الغیبوں تحفہ آیا فضل ہویا سبحانوں
7746
جے کجھ مفت نعامت مولیٰ آپ پُچائے غیبوں
کرئیے قدر شناسی اس دی پاک ہوندا ہر عیبوں
7747
سیف ملوک پیارا شاہے وچ حضور بلایا
چم زمیں سلامی ہویا جاں مجلس وچ آیا
7748
گھر بیٹھک تے بنگلے مجلس ہور عمارت شاہی
کردھیان ڈٹھے جس ویلے سیف ملوک سپاہی
7749
ایسی عالی شان عمارت جیسی جگت نہ سارے
ویکھ ہویا حیران شزادہ سندر محل چُبارے

لفظالی:
اکلی جائی= اکلوانجے ۔ تنہائی وچ، رخصت اذن= جاون دی اجازت، خوشامد خاطر= دل دی خوشنودی لئی کیتے کم ، جائی= تھاں تے، لو= روشنی، اپنے زور قدر دی= جنی کو عبادت کرن دی طاقت رکھدا سی، معلّیٰ = سب توں اُچی ، آدمیت دے عذر لیاندے=بشری کمزوریاں نوں منیا فرشتہ نہیں بنایا پر اوہدی انسانِ کامل والی صفت تسلیم کر لئی ، سپونی= میرے وچار سیتی ایہہ لفظ سمپونی توں وگڑ کے انج بنیا اے پنجابی وچ م تے ر دے حرف نہ ہوون تے وی پورے لفظ دے معنے دیون دیاں مثالاں موجود نیں ، جویںسمپورن = سپورن ، سمگر= سگر، پُتر= پُت، دوہترا= دوہتا، ترکلا= تکلا، سمان = ساں ، چندر=چند۔ ایسے طرحاں ،سپونی= سمپونی یعنی مکمل کامل اکمل ، ایت= ایس ، غیب الغیبوں= جہدا غائب نوں وی کجھ پتہ نہیں ، چُم زمین = شاہی آداب سیتی تخت دے سامنے دی زمین ای چُمی جاسکدی اے، جگت= عالم،