ورقہ 19

324
متے مراد کرے گا حاصل خدمت اس دی جاؤ
حال حقیقت مطلب والی اس نوں آکھ سُناؤ
325
سُن کے حسن زبانی شاہ دی لے رخصت اُٹھ ٹریا
اس بزرگ دے ڈیرے آیا ادبوں نیواں ہُریا
326
اگے رکھ نیاز شیرینی نیوں کے ہویا سلامی
پِیر ترُٹھا آکھن لگا مطلب دس تمامی
327
گل حسن میمندی اپنی ساری کھول سنائی
اوکھے ویلے باہوڑ پِیرا تیری دھن کمائی
328
اندر تیرا شیشہ روشن سبھ جگ تائیں ویکھے
حل کرو ایہہ مشکل میری جیوں جانوہر لیکھے
329
ہادی راہ نما اسانوں کر اج راہ نمائی
مشکل حل مراداں حاصل کرئیے شکر خدائی
330
بڈھے مرد پئی دل شفقت کہندا سن توں حسنا!
ڈھونڈ کرو تاں مطلب پاؤ خبر پتہ میں دسناں
331
میں ہِک واری سیر کریندا شہر دمشق گیا ساں
باغ بازار مکان تکیندا بہتے روز رہیا ساں
332
ونج بیٹھا ساں ہکس دہاڑے بادشاہی دربارے
اخباراں دے علم کلاموں ذکر کُھلا سرکارے
333
ایہو قصہ پڑھدے آہے سیف ملوکے والا
حسن بدیع جمال پری دا عشق کمایا لالا
334
اوس شاہے دی خدمت جاؤ تاں مت مطلب پاؤ
ہمت کرو محمدبخشا سفروں سُود لے جاؤ
335
حسن ایہ خبر مبارک سُن کے بہت دلوں خوش ہویا
اوسے مرشد کامل اگے عرضاں کرکر رویا
336
رحم پیا دل پیر سچے دے ویکھ اوہدی مسکینی
مہر کرن دے لائق ڈٹھیوس خاصہ مرد یقینی
337
ولی اللہ دے بھانڈا تک کے پاندے خیر حضوروں
جیہڑا پاک غروروں خالی سو پُر کر دے نوروں
338
جنہاں پیسہ پلے ناہیں خالی مُڑن بزاروں
نقد نصیب محمدبخشا بِن قسمت کے داروں
339
مِیٹ اکھیں فرمایا پیرے حسن بجا لیایا
ڈیرے سنے پلک وچ اس نوں شہر دمشق پہنچایا

مقولہ شاعر

340
آہو ہمت مرداں والے ایہو کم کریندے
مرداں دے در ڈھہندے ناہیں شامت تد مریندے
341
جس جائی وِچ مطلب ہووے مرد پُچاون کھلیاں
مِلن مراداں منگتیاں نوں مرداں دے درملیاں
342
ہوندے بند خلاص شتابی مرد پون جد ضامن
دھن نصیب اوہدے جس پھڑیا مرداں سندا دامن

لفظالی:
متے = شاید ۔ ممکن اے ۔ہُرنا = نیوان ول رِڑھ کے تھلے اُترنا ۔ترُٹھا = دلوں خوش ہوکے ۔باہوڑ = ویلے سرمدد لئی آ ۔دھن = مدح تعریف جَس دے قابل ۔ بلے بلے ۔کمائی= خدائی رستے تے چل کے کتیی گئی ریاضت تے نیک عمل۔شیشہ = دل۔ضمیر ۔ہکس= اک ۔اخباراں = تاریخاں۔ روائتاں۔ سرکارے = بادشاہ دے سامنے ۔ سندا = دا ۔عشق کمانا = سچی محبت دے سارے تقاضے پورے کرنا ۔ سود = فائدہ۔ نفع ۔بھانڈا = ظرف۔ جھلن ۔ پچاون دی طاقت ۔پیسہ = نیک اعمال ۔داروں = دارا لضرب۔ ٹکسال توں ۔شامت = بدقسمتی ۔درڈھیہنا = درتے ڈگ پینا۔ سجدہ ریز ہونا ۔
حسن بجالیایا=حسن نے اکھیں میٹن دا حُکم منیا، آہو ہمت مرداں = مرداں دے خیال ارادے دے ہرن،