ورقہ 414

7769
کئی شہزادے شاناں والے دیو عفریت بہادر
ہر ہر کرسی اُتے بیٹھے دانش مند زوراور
7770
سیف ملوک جدوں آوڑیا سبھے اُٹھ کھلوئے
بدّھے ہتھ شزادے اگے آن سلامی ہوئے
7771
سجےّ پاس تخت دے نیڑے کرسی خوب شہانی
مخمل مشکیں نال لپیٹی خاص آہی سلیمانی
7772
پریاں حکم شہانہ لے کے اوہ غلاف اُتارے
گلناری زربفت سُچے دے نویں اچھاڑ سنوارے
7773
نرم وچھائی پرُ کر پائی گاؤ تکیے پُر کر کے
شاہزادے دی خاطر رکھے نال تخت دے دھرکے
7774
شاہ شاہپال اس کرسی اُتے سیف ملوک بہایا
شاہزادہ تعظیماں کر کے بیٹھا بہہ سُکھ پایا
7775
سیف ملوکے ول منہ کیتا شاہپالے سلطانے
کہندا اے فرزند پیارے دس کھاں نال ایمانے
7776
اک سفر دی خفگی تینوں دوجا چاء وطن دا
مائی بابل دا دل اندر ہوسی شوق ملن دا
7777
ملک سپاہ رعیت سندی چنتا ہوسی بھاری
نالے سِک اشناواں والی نال جِنھاں دے یاری
7778
اتنے غم تیرے دل اندر ہوسیں درد رنجانا
نالے دُکھ عشق دا تینوں لوں لوں اندر دھانا
7779
پرہن رکھ اندیشہ ناہیں حام تیری میں بھرساں
جے رب چاہیا مطلب تیرا خوب طرح دا کرساں
7780
بھیجدیاں عفریتاں تائیں مصر شہر نوں جاون
خیر سُکھاں دی خبر پچاون نالے پھیر لیاون
7781
سُن گلاں شاہزادہ اُٹھ کے کرن لگا تعظیماں
توں ہیں مائی بابل میرا دیں دِلاہ یتیماں
7782
شاہے پھیر بہایا پھڑ کے بیٹا چھڈدے جھورا
سیف ملوکے ہوئی تسلی فکر نہ رہیوس بھورا
7783
شاہپالے پھر مجلس اندر عِشرت عیش مچائی
جیونکر جشن شہاں دا ہوندا سوترتیب بنائی
7784
یاقوتی مٹ آن ٹکائے بھر کے لال شرابوں
بھر بھر دین پیالے پریاں شکل مثل مہتابوں
7785
اک پریاں دے حسن عجائب گوہڑے رنگ گلابی
زیور زیب پوشاکاں سُچیاں نازک انگ حبابی
7786
دیون کاسے ہر ہر پاسے پین پیاسے سارے
تاب حسن دی آب دلے دی باب غماں دے مارے
7787
نشہ شرابوں نقل کبابوں ساقی نین سنگارے
تار ربابوں بوء گلابوں ہورہے متوارے

لفظالی:
سلامی ہونا= شاہی آداب سیتی زمین نوں جھُک کے سلام کرنا ، پاس= پاسے ، مخمل مشکیں = کستوری دی خوشبو بھنی مخمل ، چنتا= فکر۔ اندیشہ، سِک = ملن دی شدید خواہش، زر بفت= سونے دیاں تاراں نال اُنیا کپڑا، خفگی= گھٹن ۔ غم غصے دی حالت، حبابی= بہت پتلے Transparentبُلبلے وانگوں،حام بھرنا= حامی بھرنا۔ حمائت دا وعدہ کرنا، دا کرساں = ادا کراں گا، پُر کر کے=بھرکے، چائ= امنگ۔سدھر، دلاہ=دلاسا۔ تسلی ۔ ہلاشیری، شکل مثل مہتابوں = چن ورگی شکل، یاقوتی= یاقوت موتی وانگوں لال سرخ، جھورا= کسے مستقل غم دا اظہار، آب دلے دی= دل دی پذیرائی عزت ۔ قدر، نین سنگھارے=اکھاں قاتل سن،سنگھارنا= قتل کرنا، نُقل کبابوں =شراب مگروں بھجے گوشت دی خواہش پیدا ہوندی اے اوہ کباب کھا کے پوری کیتی، متوارے= مدھ والے نشئی،