ورقہ 415

7788
نغمے ساز وجاون لگیاں ناچ اُٹھائے پریاں
سندر شکلاں عجب پوشاکاں زیور پہن پچریاں
7789
نچّن گاون کرن تماشے مجرے بادشہانے
طائفیاں نے بول سنائے دھُرپت نال ترانے
7790
اُٹھ اُٹھ دیو مریندے تاڑی پیندے حال جواناں
پیر زمیں پر محکم کر کے ہتھ گھتن اسماناں
7791
چار دہاڑے چارے راتیں رہے تماشے ہوندے
بھُن بھن کھاون مرغ بٹیرے مدھ پیکے مُکھ دھوندے
7792
شاہزادے دی عزت حرمت کردے ودھ حسابوں
دین شراب کباب سناون نغمے چنگ ربابوں
7793
بعد اس تھیں دن پنجواں آیا مجلس چاء اُٹھائی
سبزے جوہے گل پھل والی سیر کرن دی آئی
7794
شاہپالے سنگ لیا شہزادہ لگا سیر کراون
جنگل جوہ جوہیرے اندر ہر ول پھیرا پاون
7795
مرغزار ڈِٹھا شاہزادے کے گل آکھ سنائیں
سچّا نیلا وانگ اسمانے خوش ہوا خوش جائیں
7796
سمن بنفشہ گل دے گردے سبزہ ائیوں سہاوے
محبوباں مُکھ داڑھی جیوں کر خط نواں لے آوے
7797
گل لالے دل تازے لالی جیوں رخسارے یارے
شکر لب معشوقاں والے روشن کرن اندھارے
7798
دلکش بہت لطیف عجائب واہ ہوا سُکھاندی
ہر ہر منزل نیک مبارک زوری چت لگاندی
7799
ہر ہر پاسے نہراں کٹھے پُھلیں بھرے کنارے
نال تریلے منہ ہتھ دھوکے موتیں پہن سنگارے
7800
ہر ڈالی تے پنکھی بولن خوش آواز ہزاراں
ارغنون صحیح سر کر کے خوب وجاون تاراں
7801
چکوی چکوا بطہ مرغایاں مارن سر وچ غوطے
پیلے انب چوانُوں نیلے چوہ چوہ کردے طوطے
7802
اچے رُکھ دی چوٹی اتے ذِکر کریندے بوزے
ہد ہد مست محبت پھردی ذکر زبانوں روزے
7803
سوہنے سرو آزاد کھلوتے رونق جنت والی
قمری اتے تدرو بو لیندے ہر پترّ ہر ڈالی
7804
اُچے قد درخت کھلوتے محبوباں دا بانا
سُچے سبز زمرّد نالوں پت اوہناں دے جاناں
7805
ایسا مرغزار کھلوتا واؤ اس دی خوش باسوں
باغ بہشت معطر ہوندا جاں جُھلدی اس پاسوں
7806
اوہناں گلاں دی خوبی کولوں انبر نور سنوارے
ہر گلبن دی ڈالی اُتے پھُل مانند ستارے

لفظالی:
پہن پچریاں = زیور پہنن دی ہر احتیاط ورت کے تیار ہویاں ، پچرنا= پھال پچر لاکے مکمل کرنا( گہنیاں نوں ڈگن توں بچاون لئی کوکے تیلی دے تھلے کولی پانا ضروری ہوندا اے)، مدھ= شراب، ترانے=کلاسیکی موسیقی دی اک صنف جیہڑی تیزلے وچ گائی جاندی اے ، جُوہ= قدرتی طور تے اگے گھاہ بوٹ تے رُکھاں بھری زمین دا خطہ، جوہیرے= جنگلی چراگاہواں ، ول = طرف، مرغزار= سبزہ تے ہریاول والا تھاں ، خط= مس مُچھاں ( فارسی ادب وچ الواں منڈا وی محبوب ہوندااے، لالی= سُرخی، شکر لب= مِٹھے بُلھاں والے ، اندھارے= انھیرے، سُکھاندی= خوش آئندPleasing، زوری چِت لگاندی = دل نوں دھکو دھکی اپنے ول کھچدی اے ، کٹھے = چشمے وچوں نکلے پانی دی چھوٹی نہرٹ ک ٤٩٤، ارغنوں = یونانی واجا آرگن ،سر = قدرتی سومے والا پانی تلا چشمہ جھیل ، چکواچکوی= سرخاب ۔ نر مادہ جوڑا جہدے بارے مشہور اے کہ دن اکٹھا رہندا اے تے رات نوں ندی دے مخالف کنڈھیاں تے بہ کے اک دوجے نوں اڈیکدے نیں ،پیلا انب= پیلکThe mango bird،چوانوں = جمع چوان دی۔ چھوٹیاں جھیلاں ، جنہاں دا پانی نیلا دِسدا اے،