ورقہ 416

7807
اوہ سبزے اوہ پھُل ہزاراں اوہ ہوا نورانی
غیرت کولوں وانگ اسماناں چائی سرگردانی
7808
سبزے اندر پانی وگن ہر کوئی کرے نظارہ
لاجورد دے نالے اندر جیوں کر چلے پارا
7809
ہر پانی دے دندے دندے خوب بنی پھُل کھیلی
گل داؤدی گل عباسی گل ریحان چنبیلی
7810
دل فریب قصے دے سُنیئر فکر دوڑاؤ بھائی
باغ ارم جس نام سدایا اس وچ کد خطائی
7811
ایسا خوب مکان ڈھونڈیندا دنیا توں ہتھ دھووے
باغ بہشت محمدبخشا جے ہووے تاں ہووے
7812
شاہزادہ مقبول دوہاں نوں مائی تے شاہپالے
تاں شاہپال اوہدی پھڑ انگل کر کر سیر دسالے
7813
سیر کریندیاں شاہے کہیا اے بیٹا دلبندا
اتنے سال ہوئے تُدھ چایا عشق سچے دا دھندا
7814
برکت صدق یقین تیرے دی مولیٰ خیر گزاری
گھمن گھیر بلائیں وچوں کڈھیوں کر کے یاری
7815
ہن توں آن میرے گھر پہتوں ہوئے جمال اساڈے
دس صلاح کراں اج کیکر جو کم نال اساڈے
7816
سیف ملوک نہ بولن دتا ' مائی اگوں بولی
شاہپالے نوں آکھن لگی اے شاہا میں گھولی
7817
تدھ جیہے انصافے والے شاہنشاہے اگے
گل کرن دی حاجت ناہیں جو تدھ مرضی لگے
7818
شاہپالے فرمایا مائی تدھ معلم گل ساری
دھّیاں پتراں سبھ کماں دی تینوں ہے مختاری
7819
جیؤنکر بھاوے تیویں کر کھاں ہوڑ نہیں کجھ تینوں
میں دھی تیری جھولی پائی ہور کہیں کے مینوں
7820
لے کے اذن شہانہ بی بی کاج ویاہ رچایا
جو حکماء علماء اُوہناں دا سبھو چاء سدایا
7821
پریاں جن عفریت دیاں نوں سدیا نیڑے دوروں
شارستان سنہری اندر کٹھے ہوئے ضروروں
7822
چونہہ گُٹھاں تھیں ڈُھکی خلقت کٹھی ہوئی نہ تھوڑی
باغ ارم دی دھرتی ملیّ کوہ چورنجاں توڑی
7823
حکم دتا شاہپال بہادر کاررواواںتائیں
باغ ارم دا گِردا سارا خوب سُہاؤ جائیں
7824
باغیں بنت بناء بناؤ چوک عراق پھوہارے
زینت زیور نال بناؤ زیب چمن دے سارے
7825
جُوں فرمایا تیویں ہویا واہ دولت سُلطانی
باغ ارم دا بنیا یارو جنت اعلیٰ ثانی

لفظالی:
غیرت کولوں = شرم دیان ماریاں ، سبزی = سبزہ Vegetation، سرگردانی = پریشانی نال پھرنا، لاجورد= اسمانی رنگ دا چمکیلا پتھر، دندے = کنڈھے، پھُل کھیلی= پھُلاں دیاں ولاں جو کھیلاں تے لگیاں ہوون، جیونکر پارا=پانی پارے وانگوں سفید تے چمکیلا سی، سُنیر= سننے والے ، کد خطائی= غلطی نقص نہیں ہو سکدا ، دسالے= دکھلاوے، یار ی= امداد، ہوئے جمال اساڈے= توں سانوں ویکھ چاکھ لیااے، (سیفل دی زبانوں لفظ ورتیا جا چکا اے)معلم= معلوم ، ہوڑ= منع مناہی ، کسے دی جھولی پانا= مکمل اختیار دیندیاں ہویا ں کسے دے سپرد کردینا،کاج= کارج دا چھوٹیر۔ شادی دی ہر رسم ہر کم نوں خاص کر کے نکاح یا پھیرے دے منتر نوں شُبھ کارج ( مبارک کم ) آکھدے نیں ،اذن= اجازت نامہ ، ضروروں = تاکید نال ۔ لازمی سدے نال ، بنت بنا= آرائشی محراب تے سجاوٹی کم ، کاررواواں = کامے۔ کارندے، عراق= دریا کنڈھے رونق دار بستی، بناؤ= سجاؤ ، ثانی = اک اصل توں علاوہ،