ورقہ 420

7881
جیؤں اگے احسان کمائے میں پرتساں زیادہ
تیویں ہور مروّت سمجھو اِت ول کرو ارادہ
7882
کرو معاف بے ادبی میری رد سوال نہ ہووے
نہیں مراد تساڈا جاں جاں پاک جمال نہ ہووے
7883
بخشو شوخی تے گستاخی رحمت کرم کماؤ
سار و سار نہ بہو بندے دی ہر گز منوں نہ لاہو
7884
دلبر یار میرے وس ہوسی جدوں تساں منہ لایا
کل مراداں حاصل ہوسن قدم ایتھے جد پایا
7885
آوے پیر ودھاوے اگے درجے عین یقینوں
محرم کرے محمدبخشا حق الخاص یقینوں
7886
سبھ دیدار تیرے دے شوقی جو لوکی اس پاسے
کرو غریب نوازی حضرت توڑ چڑھاؤ آسے
7887
باغ ارم وچ سنے وزیراں خود تشریف پُچاؤ
صالح ابن حمید وزیرے نال ضرور لیاؤ
7888
تھوڑے لفظ لکھے میں ادبوں مت دلگیری آوے
مطلب بہت اہدے وچ جانوں آکھ سلام مکاوے
7889
جاں شاہپال سنی ایہ عرضی بہت دلوں خوش ہوکے
شابش دے شاہزادے تائیں دسدا سارے لوکے
7890
عرضی اُتے چاڑھ لفافے مہر جڑی شاہپالے
آہو خاطف دے ہتھ دتی پندھ مصر ول چالے
7891
حکم دتا شاہپال بہادر کرو تیاری راہ ول
ٹرو وکیل اکابر وڈے حضرت عاصم شاہ ول
7892
فاضل چہل حکیم سیانے ہور پری سو چارے
دو سو نال عفریت بہادر ڈیرہ چاون ہارے
7893
سراندیپ نگر دا والی نالے صاعد بھائی
نالے ہاشم قلزم والا ایہ چلے کر دھائی
7894
ڈیرا چا لیا عفریتاں کیا آدم کیا گھوڑے
وچ ہوائے اُڈ کھلوتے پندھ نہ کردے تھوڑے
7895
تحفے تے سوغاتاں گھلیاں عجب نفیساں چیزاں
عاصم شاہ تے صالح تائیں دیہو وانگ عزیزاں
7896
خاص اپنے دس تھان عجائب کپڑے قیمت والے
شاہزادے دی مائی کارن گھلے بدیع جمالے
7897
القصہّ اوہ ڈیرا سارا ہویا مصر ول راہی
آہو خاطف گیا اگیرے دیون خبر اگاہی
7898
شاہزادے تے شاہ پری نوں لگی آس ملن دی
گھڑیاں مِندے تے دِن گِندے کد شادی ہن بندی
7899
فوج چڑھی سلطان عشق دی ایسے بھیڑ مچائیوس
ساعت جیڈ دسے پلکارا گھڑیوں روز بنائیوس

لفظالی:
پاک جمال=چہرے مبارک دا دیدار، ساروسار بہنا= خبر گیری نہ کرنابھُل بیٹھنا، مُنہ لانا= دلی توجہ نال گل سننا، آوے پیر۔۔۔۔۔۔= تہاڈے آون تے میرے روحانی درجے اگے ودھ جاون گے عین الیقین توں حق الیقین تائیں اپڑاں گا، حق الیقین= اپنا کوئی انگ اگ تے رکھ کے ساڑن دا تجربہ کرنا، علم الیقین = کدھروں پڑھنا سننا کہ اگ ساڑ دی اے ، عین الیقین اگ نون ساڑ دیاں ویکھ لینا، مت دلگیری آوے= کتے ناراضگی نہ پیدا ہو جاوے، چالا=حرکت ۔ ٹورا۔ روانگی، چہل= چالِیھ ، چاو ن ہارے= چُکن والے ، بھیڑ مچائیوس= عشق دی فوج نے اجیہے مقابلے کیتے، پلکا را = اکھ جھمکن تے لگا سماں، گھڑیاں مِننا= سماں بیتن دا انتظار کرنا(ہتھ والی گھڑی توں پہلاں ریت والی گھڑی Sands of timeوی رہی اے مقررہ سائز دی پانی والی گھڑی وی۔ گھڑی تھلے مقررہ سائز دی موری ہوندی سی جہدے وچوں تبکے ڈگدے سن ڈِرپ وانگوں بونداں گنیاں جاسکدیاں سن اک بوند ڈگن سمے نوں (بِند) آکھدے سن چوکھاں سماں بیتن تے انتظار کرن لئی کئی گھڑیاں مننیاں پیندیاں سن، آہو خاطف= اک دے دا ناں اے،