ورقہ 421

7900
اِک اِک روز دسے جیوں ہفتہ ہفتہ وانگر سالے
سال مہینے عمراں جیڈے کون اِچر تک جالے
7901
سخت ایام وچھوڑے والے آ رہندے جد تھوڑے
حرص ملن دی رہے نہ ٹھلّھی عاشق پیندے سوڑے
7902
نیندر بھُکھ نہ رہندی موُلے امن قرار اِک جائی
اُٹھ اُٹھ تکدے کدے نہ تھکدے نظرراہاں پر لائی
7903
کیہڑی گھڑی مبارک والی جھبدے جھبدے آوے
نال سجن دے واصل ہووے فکر ہجر دا جاوے
7904
آ ساقی بھر دے صراحی سُچی لال شرابوں
پی پی مست وصل دے ہوئیے پاک فراق عذابوں
7905
رل کے بیٹھ پیارے سارے کرئیے مست صبوحی
خوشیاں نال محمدبخشا ملن مراداں روحی

صاعد دا دیواں نال مصر اپڑنا تے عاصم شاہ دی شارستان ول تیاری

7906
واہ واہ رُت بسنتی آئی گئی سیالی سردی
بوء بہار سُکھاون لگی جُھلی واؤ فجردی
7907
رحمت باراں وقت بہاراں رنگ لگے گلزاراں
بھور ہزاراں بنھ قطاراں آئے مثل سواراں
7908
رُکھاں نویں شگوفے کڈھے نہراں نیر اُچھلےّ
سبزے ساری جُوہ سُہائی چھاواں نے پِڑ ملےّ
7909
بلبل نوں خوشبو پھلاں دی آئی لے سُنیہے
چل گلاباں یاد کیتائی درد ہجر کر بیہے
7910
درد وچھنی بہتی رُنیّ ہوئیو چل ملاقی
رحمت دے دروازے کھُلے مار غماں نوں طاقی
7911
شارستانوں رخصت ہوکے دیو مصر نوں آئے
نیل ندی دے دندے اُتے آ کر ڈیرے لائے
7912
دیواں پریاں آدم رنگی کایا چا اُلٹائی
پھر بھی قوم نیاری دِسے ویکھ ڈرے ہر کائی
7913
ویکھ دیواں دے رنگ ڈرانے خلقت ڈر ڈر نٹھے
جا دربار شہانے اندر ہوئے ہجوم اکٹھے
7914
دیوتیاں نوں ویکھ لوکائی دیندی پھرے دُہائی
یا رباّ ایہہ فوج کویہی کھاون سانوں آئی
7915
ظاہر مارن والی دسےّ باطن جندو داتی
باہروں بار ہنیری لبھے اندر آب حیاتی
7916
مثنو یوں ایہ معنے لبھّن جے کوئی سمجھے بھالے
اوس حکایت وچوں جِتھے پیٹوں ناگ نکالے

لفظالی:
اچر تک جالے= اینے چر تائیں ، جالے= جیون بھوگے، ٹھلہنا= اُتے ڈگدی چیز نوں طاقت نال پرانہہ ای روک چھڈنا، سوڑے پینا= سخت اُتاولا ہونا بے چین ہونا، جھبدے جھبدے = چھیتی، صبوحی کرنا= صبح سویر دی شراب پینا، سُکھاون لگی = طبیعت نوں سکھ دیون لگی، ہزاراں =بلبلاں ، نیر=پانی،سنہیے= پیار بھرے پیغام، فراق عذابوں پاک ہوئےے=وچھوڑے دے عذاب توں جان چھڑائیے، درد وچھنی= پیاروں وچھڑی ہوئی ،چل ملاقی ہوئیو=جا کے ملا قات کیتی،طاقی=چھو ٹی با ر ی ۔کھڑ کی،دندے=کنڈہے،کایا الٹانا=جسمانی ساخت بد ل لینا،نیاری=و کھر ی نویکلی،ڈرانے=ڈراؤنے ،دُہائی=پناہ بچالئی در خواست،کویہی=کیہو جیہی،جندو داتی=روح پرور۔جا ں بخش،بار ہنیری=پھَل پھُل جھا ڑدین والی ہنیری،مثنو یو ں=مثنو ی مو لیناٰروم دفتر دِوُم ٹ ک حکایت۔رنجانیدن امیر ے آں خُفتہ را= ٹ ک تفصیلاں ،پیٹوں ناگ نکالے،