ورقہ 422

7917
قصہ سارا دئے اشارہ جے کوئی سمجھن ہارا
کاہنوں ظاہر کریں محمد گُجھا بھیت نیارا
7918
جس عفریت لیاندی عرضی آہو خاطف ناواں
ڈیرا چھوڑ اگیرے آیا اوّل خبر پُچاواں
7919
شارستانوں ساہ دہاڑی پُہتا مصر دوارے
زور اوہناں نوں ایہو جیہے دِتے دیون ہارے
7920
جا عفریت مصر وچ پہتا بادشاہی دروازے
آ دربان بلائے اس نے اُچےّ نال اوازے
7921
شکل شمائل اس دی تک کے خوف لگا درباناں
کجھ نٹھے کجھ ڈریل ہوئے نک وچ آیاں جاناں
7922
عفریتے نے کہیا شتابی ڈرو نہ مصری لوکو
میں ہاں ایلچی بادشہانہ سنگل دریں نہ ٹھوکو
7923
شمع جمال شہانا تک کے دینے دل پروانے
ہوکے نال پچاؤ اندر ناہیں اسیں بیگانے
7924
درباناں فرمایا اگوں کاہنوں اندر جاسیں
عاصم شاہ اساڈے سندا درسن مول نہ پاسیں
7925
اوہ بیٹے دے درد فراقوں گوشے اندر رہندا
نہ کوئی گل کلام کسے سنگ نہیں تخت پر بہندا
7926
پھیر عفریت کہے میں آندا درد اوہدے دا داروں
میرے ہتھوں رب کھڑے گا ماندہ جس ازاروں
7927
میں طبیب اوہناں دا آیا گھِن پُڑی تریاقوں
پڑھ منتر دے جنتر کڈھساں بِسلا زہر فراقوں
7928
شاہپالے شاہرخ دے بیٹے باغ ارم تھیں گھلیا
سیف ملوکے دی لے عرضی عاصم شاہ ول چلیا
7929
عاصم شاہ دی خاص کچہری مینوں چل دسالو
نال میرے ہمراہی ہوکے ونج حضور بہالو
7930
جس دم سیف ملوکے والی خبر سنی درباناں
اچن چیت گیاں کھُل اکھیں خوشی ہوئی وچ جاناں
7931
بھجدے بھجدے گئے شتابی پھُلےّ وانگ گلاباں
ہاشم شاہ دے حُجرے آئے نال شتاب شتاباں
7932
جس دن سیف ملوک وچھُنا عاصم نے اس روزوں
تخت اُتے مڑ پیر نہ دھریا بیٹے دے غم سوزوں
7933
اس دِن تھیں لے اس دم توڑی جس دن خبراں آیاں
عاصم شاہ چِلے وچ سبھو راتیں جاگ لنگھایاں
7934
سیف ملوک جنیندی مائی حکم کریندی آہی
صالح ابن حمید حلالی باہر کریندا شاہی
7935
ہور امیر وزیر اکابر کر دے کارروائی
سر تے سی اقبال شہانہ ہوندی کد خطائی

لفظالی:
نیارا=عجیب ،عرضی =درخو ا ست بھر یاخط ،ساہ دیہا ڑ ی =سو ر ج چڑہن تو ں ڈُبن تائیں دا سماں ١٢ گھنٹے دے اندر اندر ،پُہتا=پُہنچییا،شمائل= جمع شمیلہ۔ سبھا ۔ خو ۔خصلتا ں،سبز ی =سبزہ۔ ہر یا ول vegetation،نیر اچھلے= پانی اچھا ل کے کنڈھیا ں تو با ہرکڈھیا، ڈریل= ڈر پوک ڈراکل ، ہوکے نال= تعارفی اعلان کر کے، سندا= دا ، درسن= درشن ۔ دیدار، داروں = علاج، فراقوں = وچھوڑے دا، ازاروں = روگ توں ، ہوکا= آمد دا اعلان، جنتر= کوئی آلہ ہتھیار ورت کے، بسلا= وس والا۔ زہریلا، ونج حضور بہالو= بادشاہ دے حضور وچ جاکے بٹھا دیو ، پھُلے ّ= کھِڑے، نال شتاب=چھیتی نال ، دسالو= دکھاؤ، غم سوزوں = غم دی جلن نال ، چِلے= اعتکاف، جنیندی مائی= جنن والی ماں ، حلالی= نمک حلال، اکابر= وڈے وڈے سردار، کارروائی کر دے، بادشاہی دے کم چلاندے ، اقبال شاہانہ= بادشاہی رعب جلال دا سایہ، ہوندی کد خطائی= غلطی کیویں ہو سکدی سی ،