ورقہ 423

7936
عاصم شاہ دا دُکھ قضیہّ کد سنایا جاندا
وانگ نبی یعقوب ہمیشہ رہیا کلیجہ کھاندا
7937
رورو دیدے چِٹّے ہوئے نیر اکھیں دے چوئے
اکھیں کج ڈھہٹھے بھَروٹے پُٹ پُڑیاں وچ ٹوئے
7938
ساس اڑے کوئی گھڑی اُڈیکن قدرت نال پروئے
لوہو ماس تران محمد تریوے وِدعا ہوئے
7939
ہڈیاں ناڑیں چم بے چارا ترائے رہے وفائی
کن ڈورے نابینے دیدے رنگوں گئی صفائی
7940
دند نِکلے ہڈ کھڑکن لگے قوت ہوش وہانی
معدے مغزوں آتش بجھی رہیا ہنجوں دا پانی
7941
کالے وال صفائی والے ہو گئے سبھ بگےّ
جیونکر باغوں پت خزاؤں تیویں نکلن لگے
7942
صبر قرار آرام دلے دا خواب خیال بنایا
سون کھاون بولن والا چیتا منوں بھلایا
7943
سبھ سبب حیاتی والے چھڈ کے ہوئے کنارے
اک امیدفضل دی رکھدی زندہ اوس بے چارے
7944
دتی جدوں مبارک بادی در پر جا درباناں
سیف ملوکے کاغذ گھلیا واچ اُٹھ کے سلطانا!
7945
کن آواز پیا جس ویلے اس پِیرے دلگیرے
ڈورے کن گئے کھل اوویں نال اوہدی تاثیرے
7946
سُکےّ گھاہ اُتے جیؤں برسے ساوَن مینہ بہاری
تیویں اوہ آوازہ ملیا عاصم نون کریاری
7947
نکےّ نینگر مسجد والے سنیاسخن چھُٹّی دا
جیؤں کنگال بِھکھاری سُندے ایہ تک گنج لٹی دا
7948
یا جیؤں وال زیارت والے کلمے سُنے مَولودوں
یا جیؤں شب معراج نبی نوں ہوئی خوشی درودوں
7949
اٹھیا ترت مصلے اُتوں جیونکر گھاء زمینوں
پھُلاں ہار ہویا مُکھ تازہ روشن یاسمینوں
7950
اُٹھ بیٹھن دی قوت ہوئی دل نوں ہوش سنبھالا
اُچراں تیک لیایا صالح خط شاہزادے والا
7951
صالح ابن حمیدے آکے کہیا مار آوازہ
لکھ مبارک ہے سلطانا! ہو نویں سر تازہ
7952
اک عفریت اساں تک شاہا خبراں لے کے آیا
شاہزادے تے صاعد والا اس سبھ حال سنایا
7953
خیر خبر شاہزادے والی نالے باغ ارم دی
یک بیک سنائیوس ساری ہور مبارک کم دی
7954
عاصم شاہ کہیا اے صالح ایہ گل خواب خیالوں
خواب خیال اُتےّ کے باور ڈِٹھے باجھ جمالوں

لفظالی:
کدسنایا جاندا= سنایا نہیں سی جا سکدا ، قضیہ= جھگڑا۔ Problem، دیدے= اکھاں ، کلیجہ کھانا= اندرو اندری دُکھ بھوگ کے ماڑا ہو جانا ۔ جھُر دیاں رہنا، نیر = پانی، پُٹ پُڑیاں = پُڑپُڑیاں ، قدرت نال پروئے= ربی قدرت نال اٹکے پئے نیں نہیں تے نکل جاون، تران= سکت ۔ طاقت، وفائی=وفادار، وہانی = گئی ۔گذری، آتش= حرارت غریزی، واچ = پڑھ لے، پیرے دلگیرے= غمگین بڈھے دے ، ڈورے= بولے ۔ باتے، یاری= امداد ، نینگر = بچے، ایہہ تک گنج لٹی دا = ہُنے ایہہ ویکھو گودام مفت ونڈیا جا رہیا جے، وال زیارت والے= موئے مبارک، ۔ آکھدے نیں جس محفل وچ موئے مبارک ہوون اوتھے مولود شریف وچ کلمے سن کے والاں دی روح خوش ہوندی اے، یا سمینوں= چنبیلی توں ، اُچراں تیک=اونے چر تائیں ، عفریت= دے جن ورگی ڈراؤنی مخلوق ، یک بیک= اک اک کر کے تفصیلی طور تے، کے باور= کوئی یقین نہیں ، ڈٹھے باجھ جمالوں = بہ نفس نفیس زیارت کیتے بغیر،