ورقہ 424

7955
اتنی مدت وہانی اگے گزرے پندراں سالاں
ہر گز خبر نہ آئی کائی باجھوں کُوڑ مثالاں
7956
کُوڑے اغوے اُٹھ اُٹھ ایویں پاون اساں بھلاوے
جاں کوئی روز اُڈیکاں رکھیے کجھ سر پیر نہ آوے
7957
ایہ بھی خبر ہوئیگی ایویں کوئی دن رہسی تتی
کُوڑے دی رُشنائی تھوڑی جیوں تیلے بن بتی
7958
صالح ابن حمیدے کہیا سُن شاہا گل پکی
شاہزادے دے ہتھ دی لکھی عرضی اکھیں تکیّ
7959
نالے صاعد آپوں آیا ڈیرا دور سنیندا
ایہ گل سچی جاپے شاہا لکھیا ویکھ منیندا
7960
عاصم شاہ مصر دے جس دم گل سنی دل لاکے
ہو بے ہوش ڈھٹھا کھا گردی طاقت ہوش کھڑا کے
7961
عنبر اتے گلاب شتابی ملیا مغز وزیراں
ہوش پھری شاہ عاصم تائیں یاد پیاں تدبیراں
7962
کہن لگا اِس چِلیئوں مینوں جھبدے باہر نکالو
کیتی رب غریب نوازی اُپر تخت بہالو
7963
تلیاں اُتے چاء وزیراں لکھ پڑھے شکرانے
تخت اُتے شاہ آن بہایا زیور لاء شہانے
7964
اوہ عفریت کیتا تد حاضر ہویا آن سلامی
چُمّ زمین کرے تعظیماں جیوں کر رسم غلامی
7965
عاصم شاہ گل لایا لوڑے اوہ قدماں پر ڈھہندا
زور بزوری سینے لا کے شاہ اسنوں مُڑ کہندا
7966
قاصد پَیر مبارک والے بھلے قدم دو تیرے
سُکے گھاہ کریں ہریا ول جِت ول پاویں پھیرے
7967
قاصد نیک تیرے تُل کیہڑا توںکوئی ہرن خُتن دا
اس کستوری سینے رکھی توں بھی سخن سجن دا
7968
توں کوئی گاندھی عطر گلابی بھریا گُجھے نوروں
مِٹھی جِبھوں بولے باجھوں خوشبو دیویں دوروں
7969
گاندھی شیشے عطروں چائے تدھ پیغام سجن دے
دس سانوں خوشخبراں جلدی ہور سلام سجن دے
7970
عفریتے نے اُٹھ شتابی کہی سلام دوبارے
ادب دعاء ثنائیں کر کے سخن گزارے سارے
7971
شاہنشاہا ظِلّ الٰہا! جم سکندر ثانی
دم دم ہون اقبال زیادہ سدا ہووے سلطانی
7972
میں ہاں خدمتگار پیادہ دیو پریاں دے شاہ دا
جس شاہپال بہادر ناواں دم دم ہووس وادھا
7973
فال فرخ شاہپال بہادر نال اقبال سوایا
وارث تخت سلیماں شاہی شاہرخے دا جای

لفظالی:
وہانی= گذری ، کوڑ مثالاں = جھوٹھیاںنقلاں، اغوے= گمراہ کرن والے خیال، بھلاوے= غلط فہمی، تتی = گرم۔ مشہور، منیندا= منیا جاوے گا، گردی=بھوانٹلی، کھڑاکے= گم کر کے ، مَلیا مغز= دماغ تے مَلیا ، چُم زمین = تخت توں پرانہہ زمین نوں ای چمنا شاہی اداب وچ شامل سی ، گل لایا لوڑے= جپھی پانا چاہندا سی،جت ول= جس پاسے، تُل= تول ۔ برابر،خُتن = کستورے ہرن دا مُلک، گاندھی = گندھی عطا ر۔ خوشبو ویچن والا، سخن گزارے = پیغام پیش کیتے ، ظل الٰہا = اللہ دے پرچھانویا!، عطار= خوشبو ویچن والا، اقبال = خوش بختی ، پیادہ = اوہ چھوٹا ملازم جیہڑا سرکاری حکماں دی تعمیل بغیر کسے سواریوں آپ اپڑ کے کروائے ، جَس = نیک نامی۔ نیک شہرت ، نانواں = ناں دا گج وج، فال فرخ= فرخ فال ۔ سبھاگی فال والا، ہووس وادھا= ترقی ہوسو، جم سکندر ثانی= توں دوجا جمشید تے سکندر اعظم ایں ،