ورقہ 425

7974
کوہ قافاں دریاواں اُتے اوسے دی سلطانی
شارستان پرستاں اس دا منن حکم زبانی
7975
لکھ مبارک ہوئے تساں نوں صاعد تے شاہزادہ
صحیح سلامت خیریں مہریں نال اقبال زیادہ
7976
لئی بدیع جمال شزادی سیف ملوک جوانے
باغ ارم وچ موجاں کردا شاہپالے دے خانے
7977
شاہنشاہ اساڈا صاحب جو شاہپال بہادر
تخت نشیں سلیماں شاہے ملکاں وچ اجاگر
7978
ایہناں دناں وچ کرے تیاری بیٹی نوں پر ناواں
سیف ملوک بدیع جمالے دوہاں عقد پڑھاواں
7979
ایہ ارادہ کر کے اس نے سدّے خاصی عامی
سیف ملوکے دے ماں بابل یار اشنا تمامی
7980
نالے ماء پیو صاعد سندے بھین بھرا اشنائی
اس شادی پر ہون اکٹھے رب مراد پُچائی
7981
ایت سبب تساں ول گھلیوس میلا بہتا سارا
دو سے ہے عفریت وڈیرا ڈیرا چاون ہارا
7982
چار اک سے پری ہے خاصی چہل حکیم سیانے
سر اندیپ شہر دا والی ہر کوئی جس نوں جانے
7983
قلزم دے دریادے والا ہاشم شاہ بھی آیا
نالے صاعد نال اوہناں دے آپ شزادے لایا
7984
بزرگ لوک تساں ول گھلیوس میلا خوب بناکے
بخشو اوہ خلاف جو آئیوس قول قرار بھلاکے
7985
رخصت اذن ہویا سی تھوڑا بہتی مدّت لگیّ
وس میرا کجھ چلیا ناہیں قلم حضوروں وگی
7986
ایہناں بزرگاں دی کر خاطر بخشو کوڑ ہمارا
بھریا نال خطایاں بندہ توڑوں بھُلّن ہارا
7987
بھیں سبھ لوک تساں ول آئے شارستان کھڑن نوں
خاصاں سنے تیاری کرئیو باغِ ارم وڑن نوں
7988
ایہ کاغذ جو آپوں لکھیا سیف ملوک شہزادے
واچ کرو معلوم حقیقت ہووے خوشی زیادے
7989
عاصم شاہ دے ہتھ پھڑایا شاہزادے دا لکھیا
پڑھ کے شکر لیا اٹھ شاہے جیؤں بھکھیاری بھکھیا
7990
کر بسم اللہ پٹیا شاہے رقعہ بند سجن دا
آئی بوء اشنائی والی کھِڑیا غنچہ من دا
7991
سورج اتوں گرہیوں لتھا جگت ہویا نورانی
جیؤنکر مُردے سے برساں دے پھیر لدھی زندگانی
7992
اوّل چُم اکھیں پر دھریا پڑھ الحمد زبانی
جیؤں پیراہن یوسف سندا پیغمبر کنعانی

لفظالی:
دریا واں=سمندراں،نال=نالے ،اقبال =خوش بختی ول قدم ودھنا۔تر قی،خا نے=گھر،صا حب= ما لک، اُجاگر =ظا ہر ۔ مشہو ر ،پر نا نوا ں=شا د ی کراں،ایت =ایس ،دوسے =دوسینکڑ ے،چہل= چالیھ،خلاف جو آئیوس= جو میرے دلوں خلاف ورزی ہوئی اے،رخصت اذن= چھُٹی تے رہن دی اجازت ، قلم حضوروں وگی= اللہ تعالی دا حکم ای اِنج سی ،کُوڑ = جھوٹھ ،توڑوں = حضرت آدم توں لے کے ، بھیں =بھی ۔یقینا، واچ= پڑھ کے، جیوں بھکیاری بھکیا= جویں مانگت نوں خیر پئی ہووے، پٹیا= مہر کھولی، گرہیوں = گریہن ، جگت = سارا عالم، لدھی= لبھی ۔ پالئی ، پیراہن=کُڑتا، سندا= دا، پیغمبر کنعانی= حضرت یعقوب حضرت یوسف دے والد بزرگوار ،