ورقہ 426

7993
قدرت پاک خداوند والی نور اکھیں وچ آندا
ہر دو دیدے روشن ہوئے گیا غبار غماںدا
7994
چہرے نور جُثےّ تے رونق فضل ہویا سبحانی
نویں سرے تھیں وانگ زلیخا لبھیؤس وت جوانی
7995
بیٹے باجھ ہویا سی اس نوں جُمل جہان ہنیرا
چڑھیا چن ہوئی رُشنائی لگی لوء چوپھیرا
7996
سُکے نیل مصر دے آئیاں لہراں بنھ قطاراں
خشک چمن تے بدّل وُٹھا ہوئیاں باغ بہاراں
7997
پندراں برس خزاں دے مارے رُکھ ہوئے سن پیلے
رحمت باراں وقت بہاراں پل وِچ کیتے نیلے
7998
خارو خار گلاب ہوئے سن بن پتاّں بن پھُلاں
شاخ ہری پَت ساوے کڈھے ڈُس نکالے گُلاں
7999
بلبل نوں خوشبو پھُلاں دی آندی واؤ فجر دی
سدا گلاب ہویا مُکھ روپوں دور ہوئی رنگ زردی
8000
شاہزادے دی مائی سُن کے دونی ہوندی شاہوں
کہندی جس راہ آیا قاصد میں صدقے اس راہوں
8001
اندر باہر پیر نہ لگدے خوشیاں حد نہ کائی
بلدی بھاہ غماں دی اتے رحمت رب وسائی
8002
دم دم کرے سجود ربے ول تیری دھن خدائی
پڑھ شکرانے ونڈ خزانے گھر گھر دے ودھائی
8003
گولی لونڈی جو کوئی آہی دین مبارک آیاں
چولی گھُنڈی تے پشوازاں سبھناں دے گل پائیاں
8004
بی بی رانی تے چُدھرانی جوسی وچ مصر دے
شاہزادی سوداگر زادی باپ جنہاں سر کردے
8005
مُہراں دے دھر تھال سراں تے دین پناتر آئیاں
قدر بقدری زیور بخشے دیکے شان ودھایاں
8006
سُتے بھاگ عمر دے جاگے ڈومنیاں تے ڈوماں
منگل گاء وجاون ڈھولک در پر کِرن ہجوماں
8007
لے لے دان تونگر ہویاں رج رج دین دعائیں
عاصم شاہ دی بیل خدایا ہری قیامت تائیں
8008
بیگم دا دل بے غم ہووے ٹھنڈ پوے وچ چھاتی
شاہزادے دی نال مراداں خواجے جیڈ حیاتی
8009
جم جم گھن پری دا ڈولا آن وسے اس جائی
سہرے گانے ویکھ مراداں وار پیوے جل مائی
8010
مصر شہر وچ جو کوئی آہی چھُٹڑ رنڈی تتیّ
گھِن خیرائیت بیگم کولوں ہو رہی رنگ رتی
8011
ہر تھانے وچ شلکاں ہوئیاں ہر ڈیرے شدیانے
شہراں اندر پھرے ڈھنڈورے منگتاں بھرے خزانے

لفظالی:
ہر دو دیدے= دوویں اکھاں ، وت= پھر ۔ دوبارہ ، جُمل = سارا، لو= چانن ، وُٹھا= ورہیا ۔ وسیا، نیلے= ہرے ، خارو خار= کنڈے ای کنڈے ، ڈُس=کُرمبلاں ۔ شگوفے، گُلاں = پھلاں ، بھاہ = اگ ، دھن = تعریف جوگی، ودھائی= مبارک ، گولی= کنیز، لونڈی= خریدی ہوئی نوکرانی، چولی=زنانہ کُڑتی، گھُنڈی= قمیض دا کپڑے د ا بنیا بٹن ، پشواز= نچن والیاں دی گھیرے دار شلوار، سرکردے= مختار سردار، مُہراں = اشرفی توں وڈے سونے دے سکے، پناتر= منڈا جمن تے منڈے دی ماں نوں مبارک دے طور تے پیش کیتی گئی پرات جس وچ چاول گُڑ تے سب توں اُتے توفیق سیتی نقدی دے سکے ہوندے نیں ایتھے سیفل دا مُڑگھر آونا جمن نالوں گھٹ نہیںسی،منگل = مبارکبادی تے خوشی دے گیت، بیل = ول ، رنگ رتی= سُہاگن، خواجے جیڈ حیاتی= حضرت خضر جنی عمر، شلکاں = بندوقاں توپاں دی سلامی، منگت= مانگت، چھُٹڑ = طلاقن، تتی = بد نصیب، جل وارپِینا= گھر ڈولی آون تے منڈے دی ماں کڑی منڈے توں پانی وار کے پیندی اے،