ورقہ 427

8012
لاکھاں لوک مبارک دیون در پر حاضر ہوئے
آپو اپنے کسب تماشے کر دے سبھ کھلوئے
8013
عاصم دے در رنگ برنگی خلق ڈُھکی ہر پاسوں
بیک بیکاں دے مچے تماشے وافر کھیڈ کٹاسوں
8014
عاصم شاہ وزیر بُلایا نالے بیگم دانی
کہیوس ایس عفریتے تائیں دیہو جلد مہمانی
8015
ہور وڈے مہمان سنیندے ایہ آئے کہ آئے
کرو تیار مہمانی ترکھی جو لوڑے کوئی کھائے
8016
اُس عفریت اگے آ رکھے بادشہانے کھانے
قلیے اتے کباب سلونے پھلکے چاول دانے
8017
ایہ دھردے اوہ کھاندا جاندا ساعت ڈھل نہ لائے
اک اک لقمے دا کر لاون پنج دنبے منہ پائے
8018
ہڈی ماس نکھیڑے ناہیں سبھ کجھ کھاندا جاندا
کھا رہیا جو خواہش آہی شکر بجا لیاندا
8019
شاہے کہیا وزیراں تائیں ایہو لیکھا بھالو
سبھ مہمان اجیہے ہوسن گھوڑے اُٹھ حلالو
8020
جاں عفریت ہویا سی فارغ کھانا دانہ کھاکے
بھر بھر شیشے مدھ پیالے شاہے کول بہاکے
8021
جاں عفریت اسودہ ہویا بادشہے فرمایا
اوس جائی دی دس حقیقت جس تھاؤں توں آیا
8022
عفریتے کجھ آکھ سنائی جو آہی اُس جائی
شاہزادے دا قدر بزرگی خاطر تے وڈیائی
8023
عظمت شوکت شان جلالت شاہپالے دے قدروں
حسن بدیع جمال پری دا روشن سورج بدروں
8024
فوج دسی شاہپال شاہے دی جو جنگے دے کم دی
رونق خوبی روپ لطافت دسی باغ ارم دی
8025
جیؤں جیؤں سی اوہ گلاں کردا اسدے شان مکانوں
عاصم شاہ نوں لوں لوں خوشیاں ہوون اوس بیانوں
8026
باغو باغ ہوئے دل کھُلے سبھ مجلس دے سُن کے
سیف ملوکے ناتا کیتا اُچی جائی چُن کے
8027
شاہے حکم دتا امراواں سن گلاں دل لاؤ
ایسی شوکت شان موافق فرش فراخ وچھاؤ
8028
شاہپالے دے شان برابر کد اسیں ہو سکدے
پر کوئی ڈول بناؤ ایسی ہون تعجب تکدے
8029
حکم ہویا فراّشاں تائیں سُچےّ فرش وچھائے
کوہاں وچ عبیر عطر دے جا چھنکار کرائے
8030
اتنے اُٹھ حلال کرائے دنبے بکرے گائیں
ہر ہر طرف لہو دے نالے ونج پئے دریائیں

لفظالی:
بیک بیکاں = رنگ برنگے ، طرحاں طرحاں دے ، ڈُھکی = اکٹھی ہوئی، کٹاسوں = کٹاس دے میلے توں ، کٹاس = ہندواں دی مقدس زیارت گاہ جو چوہا سیدن شاہ ضلع چکوال دے نیڑے وے ۔ پنڈدادنخاں توں وی اوتھے اپڑیا جا سکدا اے برہمنی ادب وچ کٹاس اصل وچ کٹا اکھش اے جہدا مطلب مینہ ورھا ندیاں اکھاں اے ویکھو تفصیلاں، مہمانی =ضیافت۔ مجمانی ۔مہمان لئی پکا اچیچا کھانا،قلیے= توے تے بھنیا گوشت، حلالو= حلال کرو، بادشہانے=بادشاہاں لائق،چاول دانے= مٹریا چھولیا پاکے پکائے چاول، لاون= سالن ۔ گوشت، ساعت = گھڑی ، شیشے = بوتل۔گلاس ۔صراحی، مدھ=شراب، لیکھا بھالو= حساب معلوم کر لؤ، اسودہ= آرام وچ ، جائی= تھاں، خاطر= دلداری۔ تعظیم ، فرش = قالین ۔ غالیچے،ڈول= منصوبہ ترکیب۔تدبیر،فراش= قالین چُکن وچھاون والے مُلازم، کوہاں وچ= کوسوں تک ، چھنکار= چھڑکاؤ،ونج پئے دریائیں = وگ کے سمندر وچ جا ڈِگے،