ورقہ 429

8050
مٹھے شربت آن پلائے اول ہر اک تائیں
پھیر رکاب طعام عجائب دستر خانے چائیں
8051
رنگا رنگ طعام لیائے کھانے بادشہانے
گوڈے ڈاہ ڈاہ رج کریندے راسک دیو مردانے
8052
میوے مرغ کباب کھلاوے باہر حد شماروں
خلعت ملی تماماں تائیں وکھو وکھ سرکاروں
8053
تحفے تے نذرانے سارے جو بھیجے شاہپالے
عاصم اگے چا گذرانے ہیسن جیہناں حوالے
8054
ہور بدیع جمال پری دے تحفے تے سوغاتاں
محرم ہتھ پُچائے اگے شاہزادے دی ماتاں
8055
قوت خوشی ہوئی سی ایسی عشرت اتے جمعیّت
عاصم شاہ تے بیگم تائیں لشکر شہر رعیّت
8056
ہر اک دے دل ایس قدر سی خوشوقتی خوشحالی
جیؤں تن مردے اندر آوے جان جوانی والی
8057
شاہ عاصم نے مصر شہر وچ خوشیوں عید بنائی
جتنی عمر غماں وچ گذری اتنی وری مکائی
8058
ملک شہر وچ پھیر ڈھنڈورے سدّے خاصی عامی
دولت دے در کھول دیتو نیں لین انعام انعامی
8059
لشکریاں نوں طلباں ملیاں کنگن کنٹھے بالے
ہوئے معاف رعیت اتوں بہت مدت دے ہالے
8060
حافظ عالم زاہد متقی گوشے گیراں تائیں
بہت انعام جگیراں دتیاں سارے کرن دعائیں
8061
ہور غریب یتیم مسافر جو سن وچ زمیناں
دولت بخش تونگر کیتوس معذوراں مسکیناں
8062
بندی سبھ خلاص کرائے بِن چَٹی نذرانے
دے سروپا گھراں نوں گھلے پڑھن لگے شکرانے
8063
سَدّامراء وزیر تمامی راجے راء حضوری
قدر بقدری منصب دتے حاجت کیتی پوری
8064
صالح نوں تشریفاں دتیاں بہتا شان ودھایا
کرو تیار سفر دا ساماں کر تاکید بتایا
8065
تخت صندوق بناؤ وڈے ڈیرے مِٹن سُکھالے
تنبو ستر لکڑ دے ہوون حرمان کارن نالے
8066
ملیا حکم وزیراں تائیں اوہ لگے اس کم نوں
شاہے آپوں جشن مچایا دُور کریندا غم نوں
8067
سُرخ شراب پرانی آندی بھربھر مٹ کلالاں
سارگیاں قانون ہلائے مدھم طنبور قوالاں
8068
طائفیاں نے مجلس ملیّ راس کھلے کر صفّاں
طبلے خنجری رنگ بنایا داریاں تے دفاّں

لفظالی:
چائیں = چائ۔ چاہت نال، گوڈے ڈاہنا= گوڈے نسل کرن نال ڈھڈ وچ ہور گنجائش نکل آوندی اے، راکس =راکھش ، طائفہ= نچن والی منڈلی، گذرانے= پیش کیتے ، جیہناں حوالے= جیہناں واسطے آئے سن اوہناں دا حوالہ دے کے سپرد کیتے گئے، ماتاں = ماںنوں ، عشرت= سریر ک خوشیاں ، جمعیّت = روحانی خوشی دلی اطمینان، خوش وقتی = چنگا مُوڈ، وری مکائی= واری لاہی، انعامی= انعام دے حقدار، طلباں= تنخواہاں ۔ تنخواہ برابر انعام، بالے= مُندرے، ہالے = کساناں نوں ہل تے لگے ٹیکس، گوشہ گیر= دنیا چھڈ کے اکلوانجے بیٹھے فقیر درویش ، بندی= قیدی، چٹی= جرمانے، سروپا= پورا خلعت سر توں پیراں تائیں ، راء = رائے زادے۔ راجپوت سردار، قدر بقدری، درجے سیتی، تشریفاں دینا= خطاب تے خلعت دینا،ڈیرے= کیمپ ، ڈیرے مٹن= ڈیرے دا سامان سوکھا ای پیک ہو سکے، مدھم = ستار، تنبوستر= پردے والے خےمے، کلال= شراب کڈھن تے مہیا کرن والے لوگ، قانون= ٹ ک ٢٥٦، خنجری = خُسریاں دی چھوٹی جیہی دف جہدے اک پاسی چمڑاتے دوجا خالی ہوندا اے داریاں = دائریاں ۔ وڈیاں ۔ ڈفلیاں ،