ورقہ 430

8069
مرلی تے الغوزے وجے بینسریاں شرنائیں
ڈھولک دے جواب برابر لے لے خوب ہوائیں
8070
ماراں دین نخون ہزاراں چارج تاراں جوڑن
سارگیاں نوں ملن سزائیں پھڑ پھڑ کن مروڑن
8071
سُن کے بول سُرندے سندے بندے ہون اُڈندے
کمانچے مردنگ بناون رنگ عجائب چندے
8072
بولن غم دے بیت چکارے باراں گان دوتارے
کھول کتاب رباب خوشی دی رب رب ذکر چتارے
8073
پہن پچریاں پریان جہیّاں کنجریاں پڑ ملےّ
نغمے ناچ اٹھاون گاون تان مریندے ہلےّ
8074
بھیروں جنگلے سا رنگ بروے توڑ کلاونت کھڑدے
بار بدی آوازے کڈھن سات سراں تھیں چڑھدے
8075
پین شراب سُراں سُدھ ہوون گاون دُھرپد اُچے
ساقی سوہنے پھرن چوپھیرے بھرن پیالے سُچےّ
8076
عاصم شاہ خوشی وچ بیٹھا ہور امیر حضوری
وقت آیا نزدیک ملن دا رب کھڑے غم دوری
8077
گئی خزاں بہاراں آیاں ہوئے چین ہزاراں
اچبی گئی تروٹک والی لدھے خُم خماراں
8078
عاصم شاہ رہیا وچ عیشاں دے کے حکم وزیراں
سبھ اسباب بنائے اوہناں کر کرکے تدبیراں
8079
چنن چِیر بنائے تختے صندل عود قماری
مشک جیہناں دا کوہاں اندر خوب ہوا کھلاری
8080
سَد کریگر ہور کمانگر پکا تخت بنایا
دو کوہ لما دو کوہ چوڑا چتر گڈھ سُہایا
8081
سونے چاندی دے پھل لگے موتیں جڑے قطاراں
اک پاسے کر حجرے چوبی دتیاں گِرد دیواراں
8082
حرماں کارن ستر بنائے خوب مزیّن کر کے
جایاں ہور بنائیاں سبھو جو درکار سفر کے
8083
تخت اتے پھر مال چڑھائے جو جو آہے کھڑنے
گھوڑے تیز سواری لائق جو سن کوتل پھڑنے
8084
ہاتھی بھارے وانگ پہاڑاں کُجھ چٹے کجھ کالے
کجھ جنگی مستانے خونی کجھ اسواری والے
8085
خچر اُٹھ قطاراں بھریاں انت نہ بیلاں گاواں
چِیتے سگ شکاری نالے پاڑھے ہرن ارانواں
8086
قیمت دار پوشاکاں پائیاں پشمینے دو شالے
پوستیناںتے ہور سفیدے چھیٹاں دے پرکالے
8087
باراں روز گذشتہ ہوئے نت نویں مہمانی
اُٹھے چِت تحمل بھجے صبر گیا ٹٹ جانی

لفظالی:
الغوزا= مرلی توں وڈا تے بانسری توں چھوٹا پھوک دا ساز، شرنائیں = شہنائی، لے لے خوب ہوائیں = ڈھولکی وجاون لگیاں اوہدے اندر ہوا دا خل ہوندی تے خارج ہوندی اے ایہہ ہوادھمک اے، چارج = آ چاریہ۔ سنگیت دا مہا پنڈت۔ وڈا استاد، نخون = ناخونے۔ مضراب، کن مروڑان = سارنگی دے تار کسن والی کلی نوںکن آکھیا گیااے، سرندا= (١)سُرائندہ ۔ گویا(٢) سارندہ ۔ سرنگی ورگا ساز ۔ وائلن، اڈندے= خیالاں وچ اُڈن والے، مردنگ = طبلے وانگوں وجاون والی اک پاسٹر ڈھولکی، چندے = تھوڑے چر لئی،چکارا= چھوٹی ستار جہدے وچ پنج تار تے باقی گھوڑے دے وال ہوندے نیں ،باراں=سپتک دے ست سُرنیں ۔ دوا چل نیں باتی پنجاں وچ ہر اک دیاں دو شکلاں نیں ، پچریاں = گہنے نوں کل کولی لاکے مکمل کرن والیاں ، پچرنا=پچر پھال لا کے ہلن توں بچانا، اچبی= اچوی بے چینی، عودقماری= ہندوستان دے شہر قمار دی اگر عوددی لکڑی ،رنگ عجائب= وکھرا سماں، کمانگر=لکڑی وچ ڈاٹ محراب وانگ گولائی پاون دے ماہر، چتر گڈھ سُہایا= مربع شکل دا قلعہ نما تخت سجا دتا، باربدی آوازے= ٹ ک ٤٠٣،