ورقہ 431

8088
ساعت نیک مہورت تک کے دن تاریخ بھلیری
عاصم چھوڑ مصر نوں ٹریا آس خدایاتیری
8089
اول حرم تخت پر چاڑھے ستریں داخل کیتے
چھوکریاں تے لونڈے سوہنے چُن چُن کے سنگ لیتے
8090
صالح دے بھی حرم تمامی چاڑھ لئے وچ ستراں
بھر بھرمَشکاں مُشکاں پایاں مثل گلاباں عطراں
8091
جو جو چیز لوڑیندی آہی کارن کاج ویاہے
تحفے ہور سوغاتاں میوے پائے عاصم شاہے
8092
شادی دے اسباب چڑھائے باہر انت شماروں
کئی باجے تے کئی تماشے آتش بازی داروں
8093
بُہت انعام دتے اس تائیں خبر اوّل جس آندی
سروپاواں دے تھان جڑاؤ موتی سونا چاندی
8094
دیواں پریاں تھیں پچھ لیّاں اوّل کر تجویزاں
شارستان سنہری اندر جو کمیاباں چیزاں
8095
اوہ بھی تخت اُتے پا لیاّں ہوئے تیار سفر نوں
بنیا میل سُہاوا چلے کُڑماں دے گھر در نوں
8096
بیگم سنے روانہ ہویا عاصم شاہ بہادر
صالح صاعد ہور تمامی میر وزیر اکابر
8097
باغ ارم ول ہوئی تیاری کر سارے سمیانے
ہور متاع حسابوں باہر سونا چہل خزانے
8098
دُنبے گائیں بکری کُکڑ بھیڈو تے اُٹھ گھوڑے
ہر منزل دے خرچے کارن نال لئے بے اوڑے
8099
مصری ہِندی تیغاں تحفے ہور کئی ہتھیاراں
لعلوں تے یاقوتوں ڈبے بھرے مانند انباراں
8100
مروارید عقیق زمرد بھرے صندق فیروزے
سے سنگ پارے قیمت والے گوہر شب افروزے
8101
مانک موتیں ہیرے چاندی جوہر پنے گُلیاں
گنتر منتر وچ نہ آون سُن سُن ہوشان بھُلیاں
8102
ہر ہر قسم متاعاں کھڑدے جو ورتن انساناں
پنکھی خوب آوازاں والے جو جو وچ حیواناں
8103
حرماں سنے تخت پر چڑھ کے ہویا شاہ روانہ
صالح صاعد نال چڑھے سن کر سمیان شہانہ
8104
تخت اتے چڑھ عاصم کہندا آہو خاطف تائیں
اسیں ارم ول راہی ہوئے چھوڑ مصر گھر جائیں
8105
خبر نہیں کے ہوندا اگے متے قبول نہ پئیے
نال حقارت ویکھن اگلے جاں دکھلائی دیئے
8106
زینت زیب اساڈا سارا بھٹھ پیا اس ویلے
جدوں پسند نہ آئے شاہاں کون اساں پھر میلے

لفظالی:
ساعت نیک= شبھ گھڑی، حرم = پردے والیاں بیگماں ، ستریں = پردے والے کمرے، مہورت= کوئی کم شروع کرن لگیاں جو تشیاں توں پچھ کے مقرر کیتا گیا ۔٤٨ منٹاں دا مبارک وقت ، سُہاوا= سجیا ہویا، داروں = آتشی بازی دا بارود مصالحہ، لونڈے= غلام، مانک= قیمتی منکے ۔ جواہرات، چھوکریاں=کنیزاں،گنتر= گنتی شمار، مِنتر= منتی۔ پڑوپیاں ٹوپیاں نال من کے گنتی، مروارید= سمندری سپی وچوں نکلے باریک موتی ، گوہر شب افروزے=انھیری رات وچ چانن کر دین والے قیمتی موتی، انبار= ڈھیر گودام، بے اوڑے = بے حساب بے انت ، پنکھی = پنچھی ۔ پنکھیرو ، کمیاب=اکانہ ملن والی گھٹ ملن والی، متے= کتے انج نہ ہو جاوے کہ ، سنگ پارے= پتھر دے نگ ۔ قیمتی پتھر، اگلے = کڑماں دے گھر والے جی، دِکھلائی دینا= وری کھٹ کھلارنا، سمیانے=سامان، ورتن = ورتنیہ۔ ورتن دے قابل، متاع = مال اسباب، بھٹھ = بھاڑ میں جائے گا، میلے= میل ملاپ کرے،