ورقہ 432

8107
جے سواساں تکادے کتیے پئے قبول نہ اگے
باجھ قبول محمدبخشا بھاہ صواباں لگے
8108
کھوٹے نقد اساڈے تک کے موڑ موہیں پر مارن
نہ ایدھر نہ اودھر جوگے پھر کرئیے کے کارن
8109
پرت جواب دتا عفریتے پاک جیہناں دی بازی
کیا صوفی کیا مست دیوانے اندر باہر نمازی
8110
ہر جائی منظوری جس نے ترک گھراں دی سازی
راہ پئے رکھ چاہ محمد بہتی بے اندازی
8111
پندھ پیوں توں چھڈ جنجالاں چارے پلےّ چھنڈے
رات ہنیری نہ ڈر راہوں ہونج اول ککھ کنڈے
8112
آہو خاطف دیواں تائیں نال اشارت کہندا
چاؤ تخت ہوائی اُڈو کے کم باقی رہندا
8113
تخت اُتے چڑھ بیٹھا ڈیرا جھنڈے رنگ رنگاں دے
شلک ہوئی اک پلک نہ لگا چلے سنگ سنگاں دے
8114
سراندیپ شہر دا والی چڑھیا نال نشاناں
نالے ہاشم قلزم والا دیواں سنے جواناں
8115
کر کے ساجے وجےّ باجے جنج چڑھے راء راجے
دُھم پئی کوہ قافاں اندر کون کوئی مہراجے
8116
ڈھول نقارے دھونسے وجےّ شتری تے قرنائیں
طریاں طرم طنبوراں چائی کوک اسماناں تائیں
8117
تخت اُٹھالیا عفریتاں چلے باغ ارم نوں
با آرام ہوئے سبھ مصری رخصت کیتا غم نوں
8118
سر اندیپ نگر دا والی ہاشم عاصم مصری
تراے شاہ خوشی کر بیٹھے رنج غماں دی وسری
8119
تخت شہانے اُپررل کے بیٹھے نال اتفاقے
اک دوئے دی خاطر کردے وانگ عاشق مشتاقے
8120
بھر بھر پین پیالے نشیؤں کھان کباب نروئے
کنجر بھگتی تے اربابی مجرے کرن کھلوئے
8121
خوشیاں وچ ہوئے متوارے نشیوں راگوں رنگوں
ڈیرا دیو اُٹھائی جاون باجھوں دیر درنگوں
8122
منزل منزل تردے آئے موجاں نال مراداں
شاہپالے دی حد وچ پہتے نظر پیاں بنیاداں
8123
باغ ارم وچ پُہتا ڈیرا خبر ہوئی شاہپالے
سنے امیراں باہر آیا کارن استقبالے
8124
جناّں دیوان پریاں تائیں ملیا حکم جنابی
کر سولھاں سنگار تمامی حاضر ہون شتابی
8125
عاصم شاہ مصر دا آیا استقبال کچیوے
جاہ جلو اساڈا تکے تاں اوہ دُونا تھیوے

لفظالی:
تکادے= تقاضے۔ محنت بھرے جتن، بھاہ = اگ ، صواباں = نیک عملاں نوں ، نقد = کھرے، کارن= کم ۔کم ٹھیک کرن لئی کیتی حکمت یا سبب ، عفریتے= ایتھے مراد فرشتے توں ایں،موڑ موہیں پرمارن=سخت نا پسند کر کے فوراً واپس کر دین ، بازی = کھیل ۔ خدا نال تعلق واسطہ، اندر باہر= ہر ویلے، چلے سنگ سنگاں دے = ذات اپنی ذات جنس نوں پچھان کے ملن جا رہی اے بندے تے پری دی دوج مُک گئی اے ، پاک= بے ریابے لوث، بازی= کھیل ۔ خدانال تعلق واسطہ، اندر باہر= ہر ویلے ، ہرجائی منظوری۔۔۔۔۔۔=جس بندے نے دنیا وچ عارضی گھر بناونے چھڈ دتے نیں اوہدی ہر تھاں ( ایتھے اوتھے) ای منظوری اے، شلک ہوئی= شاہی روانگی ویلے توپاں بندوقاں دی سلامی ہوئی، ککھ کنڈے = راہ دیاں مشکلاں تے رُکاوٹاں ، سنگ = ہم صحبت ۔ ہم جنس ساتھی، حکم جنابی= شاہی فرمان ، سولہ سنگار= ٹ ک ٤١١، باجھوں دیردرنگوں = ڈھل مٹھ سُستی دے بغیر، جاہ= مرتبہ، استقبال کچیوے= رعایالئی عام حکم اے کہ استقبال کیتا جاتا چاہیدا اے، دونا تھیوے = خوشی نال پھل کے دونا ہو جاوے،