ورقہ 24

416
میں بھی وچوں عیبیں بھریا دساں ہنر زبانوُں
اکھیں والے عیب چھپائیو کراں سوال تسانوں
417
بھائی دی فرمائش منیّ جو آیا سو کہیا
سخن کرن دے لائق کِتھے میں بے علم اجیہا
418
بھائی لفظ بُلایا جتھے ہوگ مخاطب بھائی
بھائی سو جو بھا کریسی کم وڈیاں وڈیائی!

استاد صاحب دی مدح تے نالے اوھناں اگے ترلا کہ میرا کلام سودھن

419
حافظ عالم فاضل صوفی سالک راہ ہدایت
دائم مست محبت اندر عارف اہل ولایت
420
خاص غلام امام وڈے دے صاحب میرے سردے
ہے اوہ خاک اساڈا سرمہ جس رستے پر پھردے
421
میں شاگرد نکارے اُتّے نظر مہر دی تکن
اس نسخے دے کرن مطالعے دین صلاح نہ اکّن
422
سچے مرد نگاہ کرم دی نام اللہ دے پائیو
اوگن ہارے دے لکھ اوگن پلّا دے چھپائیو
423
جیہے بھانڈے تیہے آوازے کیا نیویں کیا اُچّے
میں ہاں نال پلیتی بھریا سخن ہوون کد سُچےّ
424
سخن میرے چاپاک بناؤ ہے توفیق آزاداں
چوہڑے دا پُت مومن ہوندا جاں ملدا استاداں
425
شعر میرے پر کرو نگاہاں پارس نظر جنہاںدی
توڑے پتھر سخن بندے دے کریو سونا چاندی
426
اوہ خطائی میری بھائی جو جو بات اولّی
جو سبھ گل سچاویں ِلکھی پیر سچےّ دی گھَلّی
427
ویکھ الغوزہ سُکی لکڑ اگیّ بالن والی
ہر ہر جائی رخنہ موری اندر سارا خالی
428
جاں مردے منہ لائی بھائی کج لئی ہر موری
نیک اَنیک آوازے نکلے پھوک جدوں وچ ٹوری
429
سارگیوں تک حال اساڈا خشک لکڑ کس کم دی
وچوں بھُگی باہروں ڈِنگی کجیّ کچے چم دی
430
کِلیاں مورا تے کئیں بنھنّن چھیک پئے ہر جائی
باراں گان لگی جد یاراں تاراں چاڑھ وجائی
431
بے سُر بولے تاں بول اس دا بولی شوہ نہ بھاوے
چُپ کراوے کن مروڑے پھیر سُراں پر لیاوے
432
یار بلائی سُرپر بولی ہر گُنین من بھانی
جس اوہ رنگ ہوا نہ پائی کد اس بات پچھانی

لفظالی:
اکھیں والے = جوہر شناس اکھ والے ۔سوال کرنا = عاجزی نال منگنا ۔ہوگ = ہووے گا ۔بھاء = آدربھاء ۔ رعایت۔ عزت والا سلوک ۔پلا = اپنے دامن دا پردہ ۔آزاد = دنیا توں لاٹنک فقیر۔ بے تعصب ۔خطائی = غلطی ۔اگی = اگ (مقامی بولی) رخنہ = خالی تھاں ۔ خانہ ۔انیک = اک توں ودھ ۔ سارگیوں = سارنگی نوں مدنظر رکھ کے ۔بُھگی = گُھن کھادی ۔مور = وڈی موری ۔بھنن = بندھن ۔باراں = واراں۔ سپتک دے ست سرنیں جنہاں وچوں دو اچل نیں باقی پنجاں دیّاں تِناں وچوں کوئی دو شکلاں نیں ۔بولی شوہ = ایہدا بول مالک نوں چنگا نہ لگے ۔گُنین = (اُچارن گُن ین اے) کوئی گن آرٹ رکھن والا یا کسے گن دا پارکھ جوہری ۔بھانی = بھائی ۔ چنگی لگی، رنگ= موسیقی وچ ات سوادی مقام کلائمیکس ،یار= موسیقی نال پیار رکھن والا، ہوا= () تھوڑی جنی خبر۔ مڈھلی اطلا ع ۔ معمولی علم () ماحول ، سردے صاحب= ہستی دے مالک،