ورقہ 433

8126
شاہزادے نوں خبر پچائی بابل تیرا آیا
بن تن کے توں ملنا اگوں ویکھے عزّت پایہ
8127
پریاں بنت بنا بنائے زیور پہن پوشاکاں
چمکو چمک کریندے جُثے کھریاں سیم سلاکاں
8128
اکھ پٹن تاں لکھ جیاں نوں مارن نال نظارے
جت ول نظر کچیوے دسن بجلی دے چمکارے
8129
لشکریاں نے بردی لائی پریاں زیور گہنا
ہاتھی گھوڑے اُٹھ سنگارے سادہ کسے نہ رہنا
8130
آپو اپنی زینت کر کے ہر اک شخص سُہایا
نال لئیں شاہپال بہادر میلے کارن آیا
8131
تحفے تے نذرانے آندے باہر حد شماروں
جوڑے گھوڑے جنس نفیساں میوے ودھ انباروں
8132
آ ملیا شاہپال بہادر عاصم شاہ مصر نوں
بھایاں ہار ملے گل لگ کے خوشی ہوئی ہر ہر نوں
8133
اک دوجے دے سرتوں سٹے موتیں لعل جواہر
کیتی خوشی ملن دی بہتی انت شماروں باہر
8134
ادب سلاموں فارغ ہوئے پُچھدے خیریں سُکھاں
تکدے تکدے رجّن ناہیں اک دوجے دے مُکھاں
8135
دوئے کُڑم جدوں رل بیٹھے شگن دتے شاہپالے
عاصم شاہ ول نیواں ہو کے کر کر عذر دسالے
8136
رنجہ قدم مبارک ہوئے گھر میرے ترُآئے
ایہ احسان نہ مکدا حضرت بخشو رب کرائے
8137
شکر ربے دا ایہ گھر میرے اگے سان ہنیرے
روشن ہوئے جاں ہن آئے قدم مبارک تیرے
8138
عاصم شاہ خوشامد کر کے کہندا اے شاہپالا
تدھ چاڑھی وڈیائی میں پر کیتا ایڈ کشالا
8139
ایہ احسان مروّت تیرا جاندا نہیں مکایا
گیا گُماتا بیٹا میرا مڑ کے تساں ملایا
8140
سو سو شکر خداوند تائیں ایس ملک میں آیا
شابش لکھ تساں نوں جس نے ہمت کر منگوایا
8141
ساری عمر نہ مکسی میں تھیں ایہ تیری وڈیائی
جیسی تدھ میرے سنگ کیتی ایسی کرے نہ کائی
8142
ڈٹھے بھالے بن تدھ مینوں منیا وانگن پیراں
اجر دیئے رب صاحب جس نے شاد کیتا دلگیراں
8143
دوئے شاہ کریندے باتاں نال اتفاق رسائی
اساں تساں گھر اِکو ہویا جانوں نہیں دوجائی
8144
ایہو گلاں کر دے آئے ویکھن راہ سجن دا
سیف ملوک شتابی آوے ہویا وقت ملن دا

لفظالی:
پایہ= درجہ۔ شان، سیم سلاکاں= چاندی دیاں سلاخاں ، بردی= یونیفارم، سُہایا= سوہنا بنیا، میلے کارن = میل کرن لئی، انباروں =ڈھیراں توں ، انت=انتہا۔ آخری سرا، کر کر عذر دسالے= معافی معذرت پیا منگے، رنجہ قدم مبارک ہوئے= آپ تکلیف کر کے تشریف لائے، بخشو رب کرائے= اللہ واسطے بخشو، وڈیائی= احسان ،نہ مُکسی = چکایا نہیں جائے گا، میرے سنگ= میرے نال، کائی= کوئی، صاحب= مالک ، دلگیراں = غمگیناںنوں، رسائی=صلح سمجھوتے دے ماحول وچ ، دوجائی= غیریت ۔ دوئی ۔ وکھرینواں ، کُشالا= دُکھ مصیبت قضیہ جھگڑا،