ورقہ 437

8183
اس بیگم نوں خبراں ہویاں ایہ بھی باہر آئی
آن دوہاں دا میلا ہویا نال پیار صفائی
8184
سر چُمےّ گل لگیاں دوئے بیٹھ ونڈاون دُکھاں
بھَوں بھَوں کہن گھُمائی صدقے پچھن خیریں سُکھاں
8185
حسن جمال کہے میں گھولی جس راہ بیگم آئی
گھر ساڈے تشریف لیاندی بہت کیتی وڈیائی
8186
ہک ہک قدم تیرے دا میں تھیں حق نہ مُکدا سارا
کیتا تساں اساڈا بھینے قدر مراتب بھارا
8187
توبہ توبہ کہندی اگوں شاہزادے دی مائی
ہتھوں تساں زیادہ کیتی ساڈے تے وڈیائی
8188
رب اندوہ اساڈا کھڑیا دتیوس فتح تساں نوں
گیا گُماتا خیریں ملیا بیٹا پھیر اسانوں
8189
درد وچھوڑے تھیں چھُڑکایا تساں اساں نوں پھڑکے
دے ناتا احسان کیتوئی حد شماروں چڑھکے
8190
بیٹی تیری اندر آہی جان میرے دلبنددی
ساڈی جِند حیاتی باقی اوس مِٹھے فرزنددی
8191
گلاں کتھاں کر کے دوہاں الفت ت وڈیائی
حسن جمال اوتھوں ہو رخصت پھیر گھراں ول آئی
8192
رب بچایا بچہ میرا مہر تساں دل پائی
گیا تساڈے پاروں بھینے ساڈا درد جدائی
8193
شاہپالے دے نوکر چاکر بھائی تے سرکردے
شاہ عاصم ول ہوئے سلامی سرنوں نیواں کر دے
8194
شاہ مصر دے سبھناں تائیں دے شابش وڈیائی
مرحَبا پکارے اگوں جیوو میرے بھائی
8195
شوکت شان شماروں باہر ہویا شاہ مصر دے
سبھ سلطان اوسے دے تابع حکموں عذر نہ کردے
8196
باغ ارم وچ آیا عاصم نال اقبال سوائے
شاہ دیواں تے آدمیاں دے ہوکے نال لیائے
8197
آن اگے کے تکدا عاصم ترے کوہ پینڈے تائیں
اِک اِٹ سونا تے اِک چاندی فرش پکاّ ہر جائیں
8198
عاصم شاہ مصر دا نالے ہور اکابر سارے
شاہپالے دا پایہ تک کے ہوئے حیران بیچارے
8199
عاصم شاہ دلیلاں کردا میں بھی شاہ کہاواں
ایس جیہی اک جانہ بندی جے سبھ دولت لاواں
8200
ایہ فوجاں ایہ بھانڈے اسدے ایسے باغ بنائیں
ایہ سڑکاں ایہ محل سنہری رنگ برنگی جائیں
8201
اس دے شان برابر ہر گز قدر نہیں کجھ میرا
پھیر میری اس عزت کیتی فضل خدایا تیرا

لفظالی:
بیٹھ ونڈاون دکھاں = اک دوجی نال ہمدردی کرن، خیریں سُکھاں = خیر خبر حال چال، ہتھوں = سگوں ، وڈیائی = وڈیاں والا کم ۔احسان مروت، حق مکنا = حق ادا ہونا ۔ بدلہ دتا جاونا، کھڑیا =لے گیا مکایا، گماتا= گواتا، چھُڑ کایا= رہا کرایا۔ آزاد کرایا، چڑھکے = ودھ کے ، کتھاں = شادی بارے گلاں، سرکردے=اختیار والے درباری امیر، اُلفت ت وڈیائی= لفظ الفت دی ت نوں وڈیاں کیتا آپسی الفت نوں ودھایا، وڈیائی= صفت ، شماروں باہر=بے شمار ، اقبال= خوش بختی ۔ برکت ۔ ترقی، ہوکے نال= ایہہ اعلان کر کے لیائے کہ آدمیاں تے دیواں دے بادشاہ تشریف لیا رہے نیں ، ہر جائیں = ہر تھاں تے ، پایہ = درجہ ۔ شان، دلیلاں کردا= دل وچ سوچدا، بھانڈے = فوج دا سازو سامان، بنائیں = بلڈ نگاں ۔ عمارتاں ، دل بند=پیارا بچہ، پھر=ایہدے باوجود وی؟،قدر= قیمت۔ اہمیت ۔ا تھارٹی،