ورقہ 438

8202
شاہ عاصم دے لائے لگے جیؤں جیؤں اگے جاندے
اک تھیں اک مکان چڑھندا ویکھ پئے شرماندے
8203
شان قدر شاہپال شاہے دا ویکھ تعّجب ہوئے
عقل فکر بھُل گیا تمامی مورت ہار کھلوئے
8204
زرّیں شارستان ڈٹھو نیں شہر زمین سنہری
چھجیاں اُتے لعل چمکدے جیونکر دینھ دوپہری
8205
جتھے تخت کچہری آہی جاں پھر اوتھے آئے
نظر پیو نیں تخت شہانہ گل نہ کیتی جائے
8206
نہ سُنیا نہ ڈٹھا اگے خوابے نظریں آیا
ست کرسی وچ عاصم ہوراں ایسا تخت نہ پایا
8207
اگے پچھے چنن تختے سونے تخت بنائے
گوہر شب افروز چوپھیرے بنھ قطاراں لائے
8208
آتشیں جواہر لعلوں نور چوپھیرے برسن
مروارید زمرد لگے تے یاقوت احمر سن
8209
ہور آہے سنگ پارے ایسے مُل جِنھاں دے بھارے
ہر گز اکھ نہ ہوندی ساہویں اُت ول تکن ہارے
8210
سارا تخت جڑاؤ ایویں روشن کرے ہنیرے
کُرسی موہڑے قدر بقدری چوکی فرش چوپھیرے
8211
تخت اتے شاہپال نہ بیٹھا عاصم کان بہاکے
آپ برابر اس دے بیٹھا کرسی کول ڈہاکے
8212
سراندیپ شہر دا والی نالے ہور شزادے
تاج ملوک اتے شاہ ہاشم میر وزیر زیادے
8213
قدر بقدری جائیں ملّیاں کرسی مُوہڑے چوکی
سُچےّ فرش اُتے ہو بیٹھے ہور تمامی لوکی
8214
سیف ملوک شہزادہ نالے پریاں ہور جواناں
جا بجائی بیٹھے سارے مجلس بھری دیواناں
8215
راوی کہندا شاہپالے دی مجلس سوبھی ایسی
نبی سلیماں دی سی لگدی کدے کدے اس جیسی
8216
روٹی وقت ہویا جس ویلے آئے دسترخوانے
چہل ہزار رکاب جڑاؤ موتیں لعل یگانے
8217
چہل ہزار رکاب سنہری کجھ چاندی دے آہے
قدر بقدر تماماں اگے آن غلاماں لاہے
8218
ہر رکاب اُتے اک دُنبہ خوب طرح دے پکّے
سبھ مجلس وچ ورتے کھانے جہے کوئی کھا سکے
8219
جدوں طعاموں فارغ ہوئے سارے لوک مصر دے
تحفے ہدیے جو کجھ آندے رکھے وچ نذر دے
8220
شاہ شاہپال بہادر اگے رکھ دتیاں سبھ چیزاں
تک شاہپال لگا فرماون ہس کے وانگ عزیزاں

لفظالی:
لائے لگے= تعلق دارتے رشتے دار، مورت ہار= بُت وانگوں ،دینھ= سورج ، ست کرسی= ستاں پیڑھیاں،چنن= صندل خوشبو دار لکڑ، گوہرشب افروز= انھیری رات نون چانن کرن والے موتی، آتشیں = انگیارے وانگوں بھکھن والے جواہر، سنگ پارے= پتھر دے موتی دانے، قدر بقدری=درجے پائے سیتی۔گریڈ سٹیٹس مطابق، کان= نوں ، ڈہاکے = نوکراں کولوں ڈہواکے، جائیں = نشستاں ۔ سیٹاں، دیوان= بادشاہ دے سیکرٹری ۔ وزیر، سوبھی= سجی۔ پھبی ۔ بھخی۔ رونق دار ہوئی، یگانے =منفرد۔ نویکلے ، ہدیے=نذرانے، رکاب= تھالی ۔ پلیٹ، آن= لیا کے،لاہے= تھلے رکھے ، ورتے = تقسیم کیتے ونڈے ۔ ورتائے گئے ،