ورقہ 439

8221
ہے شاہا سب تحفے ہدےے خدمت تے نذرانے
سیف ملوک تساڈے بیٹے بہت اگے گُذرانے
8222
سبھو حق مکائے اس نے اپنے نالے تیرے
راحت جان پیؤ دے ہُوندے جو فرزندبھلیرے
8223
اس گھر اندر جو کجھ چیزاں سبھو دولت تیری
کیتی اگے خدمت میری سیف ملوک بتیری
8224
ساڈے پچھے سیف ملوکے جو کجھ بھوگن بھوگے
دولت دنیا دی سَبھ دئیے نہیں مُکاون جوگے
8225
القصہّ دس روز گزارے ایس طرح سلطاناں
مجلس لاون کھانے کھاون خِدمت ہوئی مہماناں
8226
ساعت نیک ستارہ تک کے اک دن مجلس لائی
میر وزیر اکابر بیٹھے ٹبر ساک اشنائی
8227
رملی لوک نجومی سدّے پاہندے پنڈت جوسی
مجلس اندر آ کے بیٹھے ملاں قاضی جوسی
8228
شاہپالے فرمایا دسو واچ حساب حسابی
ہوئی جوان میرے گھر بیٹی دیواں ویاہ شتابی
8229
سبھناں نال حساب عقل دے ساہ دوہاندے جوڑے
چا اک روز مقرر کیتا رہے دہاڑے تھوڑے
8230
باغ ارم وچ لتھا عاصم کر اپنے سمیانے
پُتر دا اس کاج رچایا دھر دتے شدیانے
8231
سراندیپ شہر دا والی لشکر سنے زیادہ
بھائی اس دا واسط والا تاج ملوک شہزادہ
8232
ایہ بھی باغ ارم وچ لتھے بَن عاصم دے سنگی
سکیاں بھائیاں وانگر ورتن سبھناں دی وَل چنگی
8233
آون پریاں گاون سوہلے جمع ہوئی ترلوکی
نویں نویں ہرواری ہوندی کنجریاں دی چوکی
8234
مُلکاں اندر چانن لگدا چلدی آتشبازی
رستم دست نشانے مارن کر کر تیر اندازی
8235
شر شر کر شُرناہیں شوکن جان اسماناں تائیں
چادر چرخی دے پٹاکے ملن انار ہوائیں
8236
کرن آوازے بے اندازے گولے گھت غباری
شارستان پرستان اندر کنبی خلقت ساری
8237
سنجھ صباحیں وجن واجے مُلکیں جان کہروڑاں
ہر میدان قواعد ہوندی انبر تائیں دھوڑاں
8238
ہر ہر جائی ہون تماشے دین شزادے ویلاں
دولت دے دریا اُچھلے ہویاں ریلاں پیلاں
8239
شارستان اندر شاہپالے کاج دھیؤ دا چایا
ہر چیزے دا سِنچا کیتا دولت گنج اڈایا

لفظالی:
گذرانے= پیش کیتے نیں ، بھوگن بھوگے= کوڑے پھکے ناخوش گوار تجربے کیتے دُکھڑے سہے ، حق مکانا= حق اد ا کردینا، کاج رچایا= شادی دیاں رسماں شروع کیتیاں، قواعد = ڈرل پریڈ، نہیں مکاون جوگے= بدلہ ادا کرن دے قابل نہیں ، شادیانے دھرنا= ڈھولکی تے سازاں نال شادی دے گیت شروع کرانا، شرناہیں = شرلیاں آتشبازی دیاں، ساہ جوڑنا= شادی دے شبھ کارج لئی گھڑی پل چھن لمحے تک دا سماں مقرر کرنا، ول چنگی= جدّی پشتی گھرانے نیک نیں ، ورتن= شادی والے گھر رسماں سیتی تحفے یا نقد رقم دینا، پاندھے= عالم فاضل لوک جو قسمت دا حال دسن، رستم دست= رستم دے فن والے، رملی = رمل دا علم جانن والے، جوشی= جوتشی۔ ستاریاں دے علم نال قسمت دا حال دسن والا، ترلوکی= دھرتی پاتال تے سورگ دی خلقت، کہروڑاں= دل چھیکنہار تیز سریلی آواز، اُچھلے = اُچھلّ ماری ، کاج رچانا= ویاہ دا کارج رچانا، چانا= ارنبھنا، سنچا کرنا= سٹور کرنا۔ پہلاں توں ذخیرہ کرنا ،