ورقہ 440

8240
چاول کنک کروڑ مناں دے انت نہ جاندا پایا
مصری کھنڈ انبار بھرائے سودا جمع کرایا
8241
جو گل گِنتر وچ نہ آوے کاہنوں قلم گھسانی
مدّت ہوئی محمدبخشا چھوٹی دس کہانی
8242
جے لکھ ہوون لِکھن والے تاں لکھن ایہ لیکھے
بادشہاندے کاج وڈیرے سو جانے جو ویکھے
8243
جے میں لکھ کراں چترائی نال شمار عقل دے
اوس ویاہے دے کجھ نیڑے پھیر حساب نہ رلدے
8244
درزی موچی کام بہائے جوڑا جامہ سیتا
ہویا حکم بناؤ دیگاں ہر کسبی عفریتا
8245
پتھر اُکرّ کے عفریتاں دیگاں بہت بنایاں
اک اک دیگ وڈیری حوضوں پَین جِنھاں سے پائیاں
8246
دنبہ پنج ہزار جنہاں وچ جاندا پک سُکھالا
ایسی ایسی دیگ بنائی سخت دیاں دا چالا
8247
پریاں دیو جتھے تک آہے راکس دیو لوکائی
بادشہاں دی شادی اُتے بھج پہتا ہر کائی
8248
شارستان پرستاں آہا ملک فراخ وڈیرا
پر اوہ سارا ملّن ہویا ڈیرے اُپر ڈیرا
8249
ہاتھی گھوڑے اُٹھ قطاراں انت نہ رہیا کوئی
خلقت روز قیامت والی آن اکٹھی ہوئی
8250
منشی قانوں گو مصدّی سے کاغذ کر ہُٹے
گنتر وچ نہ آئے ڈیرے پِھر پِھر کے تھک ترٹےّ
8251
خلقت دا کُجھ گانج نہ ہوندا کاہنوں پیا پکاراں
روٹی دا کر آہر شتابی بھکھ پکی ہن یاراں
8252
دنبہ پنج ہزار کوہایا خاص کباباں تائےں
اُٹھ بھی ست ہزار حلالے ایسے لیکھے گائیں
8253
کونجاں مور آہا لکھ کُٹھا پنکھی ہور وڈیرے
کُکڑ کِکّڑ انت نہ کائی تتر کھگ بٹیرے
8254
سبھ انازاں وچ پکائے خرچ ہویا اک دن دا
اگے ایسا کاج نہ ہویا نہ آدم نہ جنّ دا
8255
پریاں دیو گواہی دیندے مہتر آدم توڑی
ایسی شادی کسے نہ کیتی جس کیتی اس تھوڑی
8256
ایسے ثانی ہار برابر کدھرے کُڑم نہ ڈُھکے
دیو دانو کوہ قافاں والے پاس جِنھاں دے جُھکے
8257
شاہ عاصم بھی شاہ شہاں دا وارث تخت سکندر
سی شہپال سلیماں جائی اک تھیں اک اُجاگر
8258
ست ست شاہیاں دے سن کٹھے دوہاں کول خزانے
تحفے ہور عجائب بہتے پچھلے بادشہانے

لفظالی:
انت = آخری،میزان ۔کُل جوڑ، انبار= گودام، لیکھے = حساب، چترائی= چالاکی، کسبی= پیشہ ور کارکن ، اُکرکے= کھوکھلا کر کے ، سَے = سینکڑے، پائی= ٤ ٹوپے، سے پایاں= ٢٥ من ، سوکھالا= سوکھا ای، چالا= چلن رویہ۔، راکس= راکھش ۔ جنگلی شیطان جیہڑے دیوتیاں نال لڑ دے سن، ملّن=زیادہ بھیڑ پاروں ناصاف Puluted، مُصدی =حساب دار منشی، ہُٹے= تھک گئے، گانج = گنتی حساب میزان،حلالے= حلال کیتے ، آہر=اہتمام، کُکڑ = پہاڑی جنگلی مرغا جہدا شکار کیتا جاندا اے، کُکِڑ=کُکڑی، کھگ= ٹ ک ٢٣٥، کاج= شادی دا فنکشن، مہتر آدم = حضرت آدم ، ثانی ہار= اک دوجے دے برابر، انازاں= انا جاں، دانو= جن ۔ راکھش، سلیماں جائی= حضرت سلیمان دی گَدّی دا وارث ، اجاگر = روشن برابر ۔مشہور،