ورقہ 442

8259
اس گھر اِکّو بیٹی آہی اس گھر اِکّو بیٹا
زور زرد دا خرچ کیتو نیں سارا تانا پیٹا
8260
اودھر سی شاہپال بہادر خرچ کریندا کھلا
ایدھر عاصم شاہ مصر دا بدّل وانگن ڈُلھاّ
8261
باغ ارم وچ شور مچائیوس خرچ خوشی دا کردا
کنجر بھگتی تے اربابی انت نہ بازی گر دا
8262
گھوڑے جوڑے دان کریندا کھڑے جہان خیرایت
دھن دھن عاصم سخی بہادر دُھمیا وچ ولایت
8263
خرچ کرن تھیں سنگے ناہیں دان دئیے بِن منگے
منگت لوک محمدبخشادولت دے دے رنگے
8264
اک دوجے دے شاہ شہاں توں شابش کھٹی لوڑن
ثانی ہار سہار نہ کر دے سنگل سار تروڑن
8265
شاہپالے گھر میل منڈل سی پریاں دیو کروڑاں
کھیڈن پریاں ہون تماشے کے کجھ لکھاں جوڑاں
8266
اودھر عاصم شاہ چلائے جانوراں پر کوہی
دُنبیاں بکریاں دی ونڈے روز قیامت اوہ ای
8267
چلےّ وگ لہو دے نالے اتنے اُٹھ حلالے
میلوں باہر خیرایت کر کے نت پکا کھوالے
8268
نرم کباب پلاء سلونے پھلکے تے فالودے
حلوہ لُچیّ اتے جلیبی ' برفی لگے تودے
8269
مِٹھیائیاں دا انت نہ کوئی کھانے رنگ برنگی
کئی انبار خلاص کریندے رسد لگی ہر ڈنگی
8270
چالیھ روز ایہ خرچ اٹھایا میل رہیا سبھ بنیا
ایڈا کاج شاہپالے کیتا دھن مائی جس جنیا
8271
سُدھ ستارا چمکن ہارا گھڑی مبارک تکی
نیک دہاڑے جس دم آئے ساعت عمدی زکیّ
8272
مائی باپ مبارک جھَلیّ خوشیاں رہیا نہ بناّ
بسم اللہ بسم اللہ پڑھ کے کھارے چڑھیا بناّ
8273
سوہلے گاون ہتھ گھماون رل کے پریاں کُڑیاں
سیف ملوکے کان گھڑولی بھر مڑیاں بھر مڑیاں
8274
پانی آیا گرم کرایا چوکی دھری کنارے
عود جلایا دھوپ دُھکھایا مشک چوپھیر کھلارے
8275
نائی تیل لگائے سرتے خوب اُتار اُتارے
لاہ پوشاکی تے مل وٹنا جیو بنّیا چڑھ کھارے
8276
لعل ماؤ دا چوکی بیٹھا چوکی کھلی چوپھیرے
رل مل سیّاں کامن پاون سبھ تکن ول تیرے
8277
مَل مَل نہایا وضو کرایا وٹنا تیل ملایا
کر بسم اللہ تے پڑھ کلمہ پانی انگ لگایا

لفظالی:
شور مچنا= چوکھی مشہوری ہونا۔ گھر گھر ذکر ہونا،بھگتی = ناچامُنڈا جیہڑا کُڑی بن کے نچے، اربابی= ربابی۔ رباب وجاون والا، زور زرو= زور تے ضرب۔ ضرب دا مقامی تلفظ زرو، کھڑے =لے جاوے، دھمیا= مشہور ہویا ،ثانی ہار=شریک ہم سر، منگت= مانگت ، رنگنا= سماجی مقام بدل دینا۔ اینا دینا کہ اوہ اگوں منگن دا کم ای چھڈ جاوے، سہارنا= برداشت کرنا، سنگل سار= لوہے دے سنگل ہر قسم دیاں سخت پابندیاں ، منڈل = اکٹھ، جوڑاں = میزان کراں ، کوہی = چھْری ، دی ونڈے = اوہنان دے حصے دی نصیباں بھاگاں وچ ، حلالے= حلال کیتے، انبار خلاصی کریندے= گودام ختم کر دتے، ڈنگ = کھاون لئی مقرر عرصہ ۔ صبح شام نوں دو ڈنگ آکھاں گے، سُدھ= موافق نیک ۔ ٹھیک ، عمدی= عمدہ۔ سب توں بہتر ، زکی= نیک ۔ نحوست توں پاک ، کان = کارن۔ لئی، گھڑولی بھرنا= لاڑے نوں نہاون لئی کُڑیاں پانی دے گھڑے بھربھر کے لیاوندیاں نیں ، دھوپ= بدروحاں نوں نساون لئی دتی گئی خوشبودار دھونی جہدے وچ حرمل ضرور پایا جاندا اے،ضرب=سکے تے مُہر ٹھپا،اک دوجے دے شاہ= دونویں کُڑم اپنے آپ نوں معمولی رعیت من رہے نیں دوجے شاہ دی،