ورقہ 443

8279
تیل چوایا دہیں لگایا پنڈے وٹنا ملیا
نہایا دھویا لاڑا ہویا ساہورڑے گھر چلیا
8280
پانی پا ملایا پِنڈا شرطاں کر کر نہایا
کھارے اتوں لاہون کارن باپ سرے پر آیا
8281
تھر تھر کنبے چایا چِھنبے بیٹھا سیس نوایا
کھارے اُتار پیؤ دے پاسوں جو منگیا سو پایا
8282
جوڑا جامہ آن ٹکایا نائیاں پکڑ پہنایا
کیسریاں رنگ لایا لالا کیسریاں رنگ لایا
8283
بن مہراج فرش پر بیٹھا زیور پہن شہانا
دوست رل کے بہندے بھائی سر سہرا ہتھ گانا
8284
مالن گُند لیائی سہرا سُچی تندو بُن کے
سہرا نوشہ دا میں آندا پھُل عجائب چن کے
8285
ونّاں ونّاں دا بنیا سہرا بنھ بنّیا بنھ بنیا
رب دا دتا آشتابی جوبن روپا گھنیا
8286
حوراں جھاتی پاپا ویکھن جلوہ روپ ربانا
والوں والوں چوندا جوبن جس تن عشق سمانا
8287
پریاں دے دل بِریاں ہوئے تک کے لاٹ حُسن دی
وانگ پتنگاں ڈھہن نہ جھلن تابش سیم بدن دی
8288
مکھ پر سہرا سونے تاراں سوہنے پھُل پروتے
سُچی چَوری پھیرن سرتے دوست گرد کھلوتے
8289
جوبن روپ گھٹاں بنھ آیا جھنڈ کڈھے چمکارے
نین سمند حسن دے ہوئے سُرمہ لہراں مارے
8290
کالی جھنڈ معنبر اُتے واہ گلناری چِیرا
لعل جواہر جڑے کڑے سن بازو بند ہسیرا
8291
نیویں نظر شاہزادہ بیٹھا ہوکے چُپ زبانوں
سر تے چھتر ظلّ الٰہی نور بَرھے اسمانوں
8292
لے تلوار ٹکائی اگے پھڑ قبضہ مردانہ
جو ویکھے سو دے مبارک واہ واہ شیر جوانا!
8293
ٹکیاں آن چنگیراں سُچیاں ورتے جوڑے جامے
دفتریاں نے کاغذ کڈھے لکھدے جاندے نامے
8294
بھج بھج پُہتے صفاں قطاراں جمع ہوئے نندراڑو
بھر بھر بک جواہر سٹن میل لئے کر جھاڑو
8295
اُٹھ سوار ہویا پھر بناّ جنج چڑھی بے اوڑی
بھیناں تے بھرجایاں گاون جیؤلا لا چڑھ گھوڑی
8296
روپ انوپ بنے پر آیا ویکھے خلق تمامی
وڈیاں اگے سیس نمایا رج رج لئے سلامی

لفظالی:
وٹنا= ابٹن ، پھلیل = پھُلاں دی خوشبو رلیا تیل ، شرطاں کر کے نہانا= غسل دیان شرطاں ایہہ نیں دونویں ہتھ گٹاں تائیں دھونا۔ استنجا کرنا۔نجاست دی جگہ دھو نا ناپاکی دور کر ن دی نیت نال نہانا، وضوکرنا۔ تمام بدن تے تن واراں پانی پانا، کھارا= ٹوکرا جس تے لاڑا نہاندا اے تے پانی تھلے وگ جاندا اے ، سیس نوایا=سر جھکایا، چھنبا= دھوبی، چایا= چُکیا( کھارے توں ) مہاراج= لاڑا، کیسریاں رنگ لایا= کیسری رنگ دیاں چُنیاں نے رونق لائی اے سردے والاں نے رونق لائی اے ، سْچی تندوبُن کے = طلے دیاں تاراں نال اُن کے ، وناں وناں دا= قسم قسم دے پھُلاں دا، بنھ بنیا بنھ بنیا= اے لاڑے سہرا باندھ لے تیرا بندھن بن گیا ہے، سمانا = سمایا، بِریاں ہوئے= بُھج گئے ، تابش= جلوہ۔ سیک ، سِیم بدن = چاندی رنگے سریر، روپا گھنیا= چوکھیا حُسنا، برھے =ورھے ۔برسے، سُچی چؤری= سونے دیاں تاراں والی مور چھل، جھنڈ = سر دے وال، سمند= سمندر ،چیرا= ڈھائی گز دی چھوٹی پگ، ہسیرا= گل وچ پاون والی ہسلی، ظلِ الٰہی = خدائی سایہ اللہ دی راکھی،نندراڑو= ویاہ وچ نیوندرا پاون والے، میل لئے= اکٹھے کر لئے،