ورقہ 444

8297
جاں چڑھیا تاں واجے ساجی رلمل چڑھتل منگدے
دولت تے دستار دوشالے دان دتے رنگ رنگ دے
8298
راضی ہوئے اُٹھ کھلوئے بدھے لک تماماں
نَصْرٌ مِّنَ اللّٰہ آکھ شزادہ چڑھیا مار دمامہ
8299
آکھ تَوکَّلْتُ عَلَی اللّٰہ پیر رکابیں پائے
افسر تے سر گشت غلاماں سر پر آن جھُلائے
8300
بھینو واگ بنےّ دی پکڑی دین مبارک آئی
جو سَر آیا سو اس دتّا ویرے بھین منائی
8301
ماؤ پاس گیا پھر بیٹا جا گھوڑی توں لتھا
پیر پھڑے سر اگے دھریا اس چُمیا مُنہ متھا
8302
سَہورڑے گھر تُریا بیٹا دیندی ماں دعائیں
ربّا آس مراد اساڈی خیریں سبھ وکھائیں
8303
سیف ملوک میرے گھر آوے گِھن پری دا ڈولا
نال اقبال مصر وچ چلے گھت کے بالا بولا
8304
ماتا تھیں لے اذن شہزادہ بیٹھا وچ عماری
چڑھی کھلوتی جنج سواری ساری بنی سنگاری
8305
مائی دائی دین ودھائی خوشی ہوئی ہر کسےّ
گاون ہانوں ہان محمد جنج چڑھیندی دِسےّ
8306
دھونسے دھونس اوازوںچاڑھی ڈھول نقارہ گُھریا
عاصم شاہ محمدبخشا پُت ویاہن ٹُریا
8307
شتراں اُپر شتری وجیّ ہاتھی اُپرّ بھیراں
ناداں نَادَعَلِیّاً پڑھیا گجے وانگن شیراں
8308
وجدے چلے دفاں بنایاں دفاں تاشے ڈھولاں
چھنطوری تے مُرلی آکھے اَجّے رَج رَج بولاں
8309
طُرماں تریاں کوک اُٹھائی کُٹ طنبوراں پائی
بینسریاں الغوزے بولے تان لئی شرنائی
8310
چپےّ چپےّ چوکی ہوندی کنجر نچن گاون
ہسّن کھیڈن کرن تماشے سانگی سانگ بناون
8311
بناّ باپ اکٹھے چلن دم دم حمد دھیاون
پیش نقیب پکاراں کردے بول کبِت سناون
8312
بھر بھر بک چوپھیرے سٹن مارن چھٹے زردے
دے ویلاں کر خرچ خزانے پیر اگیرے دھردے
8313
کئی کوہاں وچ ٹُری سواری حدوں باہر پیادے
مصری سراندیپی سارے خلقت ہور زیادے
8314
نیزہ بازی تیر اندازی پائی کھیڈ سواراں
چمکن توڑے چھیڑن گھوڑے سر پر دَھر تلواراں
8315
سُمّاں دے کھڑکارے کڈھن ترکی کاوڑ چائے
گھوڑے دوڑ سوار کراندے ضرب زمیں نوں جائے

لفظالی:
چڑھتل = گھوڑی تے چڑھن دا لاگ، نصر من اللہ= ٹ ک ق م الصف ١٣ مدد اللہ ولوں ای اے،دمامہ= نقارہ، توکلت علی اللہ= میں اللہ تعالی تے ڈوریاں سٹیاں ، افسر = تاج ، سرگشت = چھتر، بنا= لاڑا، سر آیا= توفیق ہوئی ، گھِن = لے کے ، بالا= کناں دا مندر ا حلقہ رنگ، بولا= بولیا ہویا ۔ منہ توں عہد قرار کیتا، ہویا، بولا بالاگھتنا= کناں وچ کسے دی غلامی دا عہد کر کے اوہدا مندرا پانا۔ جدوں اوہ کسے دی غلامی مریدی دا مندرا پالے گا تاں اوہ مصر وچ اقبال نال چلے گا، ناد علیاً= ٹ ک روایت امام جعفر صادق ، عماری= ہاتھی تے کسیا ہویا ہودج جس اتے چھتر ہووے،تاشے=گل وچ لمکا کے وجاون والی دف،تُری= لمی نفیری، طرم = ترم۔ فوجی بگل، طنبور =چھوٹا ڈھول ، شرنائی = شہنائی نفیری۔ Bag pipe، چوکی = گویاں دی حاضری دی محفل، سانگی= ایکٹر۔ بہروپیئے، سانگ = بہروپ، حمد دھیاون = شکر ادا کرن، پیش نقیب = ٹ ک تفصیلاں ، کبت= شعر ، کھڑکارے= کھور و کڈھے، توڑا= ٹ ک تفصیلاں ، ترکی= ترکی گھوڑے، کاوڑچائے= غصے دے بھرے ہوئے ، ضرب = دھمک ۔سٹ،