ورقہ 445

8316
عاصم شاہ دی دیکھ سواری دیو پری بھَوکھائے
کلغی توڑے تے ہتھیاراں چانن چمک لگائے
8317
چپےّ چپےّ بلن مثالاں شمع بلن کافوری
شارستان اندر اوہ آئی رات مبارک نوری
8318
ہون تماشے بے تحاشے رنگ برنگی بازی
راگوں رنگی انت نہ کائی رونق بے اندازی
8319
ملک ولایت ساری اندر گہماں گہمی ہوندی
دھرتی بھاروں لرزہ کھائے جتھے جنج کھلوندی
8320
شوکت شان نقارے نوبت جھنڈیاں نال نشاناں
عاصم شاہ ویاہن ڈُھکا انت نہ رہیا داناں
8321
مزلومزلی ٹردے آئے چھٹے دیندے زردے
شارستان سنہری اندر پُہتے کول شہر دے
8322
لے لشکر شاہپال بہادر میلے کارن آیا
دیواں پریاں صفاں بنایاں انت نہ جاندا پایا
8323
دوہاں ولاں تھیں وجے واجے دفّاں ڈھول نقارے
منہ جُڑے سن دوہاں قندہاراں ہون لگے پشکارے
8324
آدمیاں دی جنج تمامی ہو کھلی اک پاسے
پریاں دیو ہوئے اک طرفے لایا رنگ لباسے
8325
دُھر اسمانی غوغا پایا تُرکاں دے ہِنکاراں
مارن سُم اٹھاون دھرتی چبّن نَہرے ساراں
8326
چال روالوں گام چلاون پویہ جھُٹی ٹپّن
چوکڑیاں وچ ہرناں تائیں ونج کنّاں تھیں نپّن
8327
نیزہ بازی کرن بہادر پٹ پُٹ سٹن کِلےّ
تیر انداز نشانے مارن چاڑھ کماناں چِلّے
8328
مَل لئے میدان سواراں مڑ مڑ کر دے پھیرے
چاون واگاں اُڈن ترِکھّے اک تھیں اک اُچیرے
8329
تولن سُمّ وجاون دھرتی گامچیاں بھن چلن
مارن سُنب ہلان کنوتی سر اُچاّ کر ھلّن
8330
آتشبازی بے اندازی لائی لوء جہانے
زور جنجیں دا ہور کے آکھاں شور تیکر اسمانے
8331
شاہپالے نے نال لیاندی جنج اگوں جھل اگا
شاہزادہ مہراج محمد وڑن شہر وچ لگا
8332
پہلی گلی ترنجن آیا ترے سے سٹھ سہیلی
مَلّ مَلّ راہ گڑاہٹی منگن دے کے لنگھیں بیلی
8333
گڑ دی جائی مصری دتی اس گھر کمی نہ آہی
مشکل کرے اسان محمد دولت شاہنشاہی
8334
تدھ شہزادہ نام دھرایا خرچ نہ دولت تھوڑی
اے شاما! گُڑ سستا وِکدا لاکھ ٹکے اِک روڑی

لفظالی:
بھو= خوف، کلغی = ٹ ک تفصیلاں ، مثالاں = مشعلاں ، شمع کافوری= کافور دی بنی ہوئی موم بتی جس دی روشنی صاف تے دھواں اُکا ای نہیں ہوندا، بے تحاشے = بے شمار، بازی = کھیل ، نشان= جھنڈے دا پھر یرا، دان= سخاوت وچ دتیاں چیزاں ،ولاں = طرفاں ، قندہاراں = محبوب دے لباں وانگوں ، پشکارے = پیش کارے کسے دے سواگت لئی استقبال لئی ملن توں پہلاں چلائی گئی آتش بازی یا میوزک واجے قوالی دا پروگرام، ترکاں = ترک نسل دے گھوڑے ، ہنکاراں= ہنکن دیاں آوازاں، ساراں چبنا= دوڑن بھجن لئی بے تاب ہونا، جھٹی ٹپن = نیزہ بازی دی چال ۔ پچھوں اکو وار تیز تے کسے خاص مقام تے ٹپ کے لنگھن ، سُم تولن= اگلیاں ٹنگاں دے کھُر اکو وار چک لین، دھرتی وجاون= دھرتی اُتے سُم مار کے کھڑاک کرن،گامچیاں بھن چلن = پچھلے سُم اگلے سُماں اُتلے والاں تے مارن،مارن سنب ہلان کنوتی سر اُچا کر ہلن = جنگی طبل وجن تے گھوڑے اپنے تیا رہوون دے ثبوت لئی انج کرد ے نیں ہر خطرے دی اطلاع دونویں کن ہلاکے دیندے نیں ، اگا جھلنا= استقبال کرنا،