ورقہ 446

8335
اک اک روڑی دے اسانوں تاں اس گلیوں لنگھیں
نہیں پلے تاں ترنبہڑ کھاسیں ہیگا تاں کیوں سنگیں
8336
شاہزادے فرمایا اگوں کمی نہیں اج کائی
نال میرے چڑھ آیا بابل لاگ دئے ہر جائی
8337
اس تھاؤں پھر گئے اگیرے خاص شہر دے درتے
آ درباناں واگاں پھڑیاں حصہّ ساڈا ورتے
8338
ورباناں تھیں سچے ہوئے دے لعلاں دی جوڑی
سیف ملوک شہر وچ وڑیا جا اُترن دی لوڑی
8339
اتری جنج لگائی مجلس بیٹھی نال امن دے
رتی گِھن میراثن آئی نقش بنے ون ون دے
8340
آیا شرم حیا شزادے رتّی جدوں بُلائی
سبھ عمر دی کیتی کرتی اکھیں اگے آئی
8341
رتی خسرہ عملاں والا جس وچ روہل نہ رتی
دِسدی تند محمدبخشا موٹی نِکیّ کتیّ
8342
باپ میراثن وِدعیا کیتی دان رتی دے دے کے
پھیر چھناّ دُدھّ بھریا آیا یاراں پیتا لے کے
8343
سُچا ٹکا ٹکایا اس وچ پرت گیا گھِن لاگی
رَل مِل کُڑیاں ٹورن آیاں سک اندر دی جاگی
8344
جنجاں دی کر خدمت داری ڈیرے آن بہائی
شاہزادے نوں ٹورن لگیاں بیٹھی عام لوکائی
8345
کر کٹیاں دے ترنجن بن کے آیاں پریاںجایاں
سُچیاں چھٹیاں اُچیاں اُچیاں سر پر آن جھُلایاں
8346
''اسیں آیاں اسیں آیاں لالا ''گاون نال صفایاں
پریاں گاون بول سہاون موجاں رب وکھایاں
8347
سُتےّ بنے کان جگاون آیاں چامل چایاں
تلیاں جھسّن کھِڑ کھِڑہسن آکھن گھول گھمایاں
8348
اُٹھ مہراجا جاگ مہراجا کس ویلے دیاں کھلیاں
کھلیاں کھلیاں رات وہائیا دُکھن لگیاں تلیاں
8349
سالڑیاں لے آیاں چُوری تھالڑیاں ایہ لاہیاں
کر بسم اللہ کھا مہراجا نالے ونڈ گراہیاں
8350
ویکھو نی سردار گراہیاں نہیں دیندا نہیں دیندا
شاہ پری دا یار گراہیاں نہیں دیندا نہیںدیندا
8351
پاون لگا بھار گراہیاں نہیں دیندا نہیں دیندا
کیوں بیٹھا جھُنب مار گراہیاں نہیں دیندا نہیں دیندا
8352
سیف ملوکے کھادی چُوری بھر مُٹھّےں ورتائی
سالڑیاں دی جھولی پائی یاراں ہور پُچائی
8353
اُٹھ وے بنیا! جاگ مہراجا ٹورن آیاں سیاّں
ساہورڑے گھر چل شزادہ کھہڑے تیرے پیاں

لفظالی:
پلےّ= بوجھے۔ ڈب دی کنیّ، ترنبھڑ=(١)کوڑا ۔ چابک (٢)کنڈیاں پتراں باجھوں سکی جھانبڑ دی سوٹی، ہر جائی = ہر تھاں تے، ورتے= ونڈے ، جا=جگہ، رتی گھِن= رتی لے کے، رتی = کام دیو دی استری(٢) اعمال نامے جیہڑا فرشتہ پیش کر دا اے (٣) کھڈ کنے جیہڑے شہوت تے بھوگ دے نقشے پیش کر دے نیں ، لاگ= شادی دی رسم سیتی مقررہ رقم جس دی ادائیگی کسے حقدار نوں ضروری ہوندی اے، ون ون = کئی قسماں دے ، رتی بُلانا= تھالی وچ کھڈ کنے ویکھدیاں سار ای لاڑے نوں شرم آ جاندی اے کیوں جو کھڈکنے شرمناک حرکتاں کر رہے ہوندے نیں جے لاڑے نوں سمجھ نہ آوے تے میراثن کھول کے سمجھا ندی اے ایس لئی لاڑے نوں لاگ دے کے خلاصی کرانی پیندی اے، خسرہ= ریکارڈ دا رجسٹر،کر کٹیاں= کِھتیاں ۔ ستاں ستاریاں دا جھرمٹ ۔خوشہ پروین ،ر وہل = بھُل ۔ غلطی ۔ ملاوٹ بے ایمانی۔ ہاسا مذاق، چامل چایاں = جوش محبت دے جذبے دیاں ٹنبیاں ہویاں ، سُچا ٹکا= پونڈ اشرفی، سِک= وچھوڑے دا شدید احساس، لالا= وڈا بھرا ، گراہی = چُوری دی بُرکی، ونڈ= ورتا، سُتے متے کان= سُتے مدہوش لاڑے نوں جگان لئی،ہور= اور۔طرف ۔کول،