ورقہ 448

8373
بُرج ستارا ساعت تک کے نیک گھڑی جد آئی
زہرہ ماہ دا عقد پڑھایا راسوں گئی جدائی
8374
جاں سعدین اکٹھے ہوئے گئی نحوست ساری
دو مشتاق ملے دل جانی پایا وَر کواری
8375
تل چاول مٹھیائیاں ونڈیاں ہوئی مبارکبادی
خِلعت دولت ونڈ نہ ہوئی حدوں بہت زیادی
8376
سے سروپا تے سے گھوڑے سے ہاتھی اُٹھ خچّر
چھوکریاں تے لونڈے سوہنے دان دتا شاہ وافر
8377
جاں اوہ روز گزشتہ ہویا آئی رات وصل دی
وہلی جائی سی اک ماڑی وانگ بہشت اصل دی
8378
نقش نگار بہار چمن دی رونق رنگ ہزاراں
چھجے چھت سنہری ویہڑا شیشے جڑت دیواراں
8379
عطر عبیر اتے کستوری اس جائی چھنکائی
دائی شمع بلائی جلدی عنبر عُود جلائی
8380
سوُہے پلنگ نواری ڈاہے سیجاں صاف وچھایاں
گُند پھُلاّں دے سہرے لائے مُشکاں دُھماں پایاں
8381
دایاں سنگ سہیلی سیاّں بُہٹی آن سُوالی
شاہزادے نوں ویکھن لگیاں جھب آنے رب والی
8382
شاہ پری نوں سک سجن دی پلک آرام نہ دیندی
پَل پَل برس دینہاں دے گذرن چوری راہ تکیندی
8383
لاکھ سراں دے مُل دی سانوں گھڑی گھڑی اُس شب دی
ہائے افسوس محمد ساعت گزری پھیر نہ لبھدی
8384
جاں میلے دا ویلا ہووے ملن لگن دوجانی
ساعت صبر نہیں کر سکدے جیؤں تساّتک پانی
8385
پندراں برس گئے وچ روزے شربت وصل نہ پیتا
ہے امید اجوکی راتیں جے رب حاصل کیتا
8386
پلک پلک دا صرفہ مینوں رب شزادہ بھیجے
دایاں سیاں سبھ اُٹھ جاون یار چڑھے جھب سیجے
8387
سنگ سہیلی کوئی نہ بھاوے جس دم بیلی آون
جدوں پتنگ دئیے نوں ملدے پر بی اوہناں نہ بھاون
8388
توڑے ہووے پیارا کوئی محرم یار وچولا
پھر اغیار دسے اس ویلے جدوں ملے خود ڈھولا
8389
کرے بدیع جمال دعائیں گُجھیاں وچ دلیلاں
وہلا میل شزادہ ربّا! جھب اٹھال وکیلاں
8390
سنی دُعا شہزادہ آیا اُٹھ کھلیاں سبھ سیّاں
سیج سُہاگ سُہا اُنھاں دی مار بُوہا ٹُر گیاّں
8391
بسم اللہ میں گھولی صدقے آکھ پری بی اُٹھی
باہوں پکڑ بہائیوس سیجے تیغ عشق دی کُٹھی

لفظالی:
زہرہ ماہ= زہرہ دا چن نال، سعدین = زہرہ تے مشتری دونویں مبارک ستارے نیں ایتھے مراد اے سیفل تے بدیع جمال اکٹھے ہوئے ، ور= عور ت دا من چاہیا ساتھی، ونڈنہ ہوئی= حدوں بہت زیادہ ہوون پاروں ونڈی نہ جا سکی، سروپا= سرتوں پیراں تک کجن لئی قیمتی خلعت، ماڑی= شاہی محل دا چوبارہ، عبیر = کستوری گلاب تے صندل لاکے بنایا گیا خوشبو دار دھوڑا، عنبر= اک سمندری جانور دے فضلے توں بنی خشک جھگ جو خوشبودار ہوندی اے، عود= اگر ۔ اک لکڑی جنہوں دُھکھا کے خوشبو حاصل کیتی جاندی اے، دائی = گھر دی بڈھی ملازمہ بچے کھڈاوی، مشکاں= خوشبو واں، سنگ سہیلی= ہر ویلے نال رہن والی سکی سہیلی ، سیاں = سکھیاں ، جھب آنے= چھیتی لیاوے، پل = پلک جھمکن تے لگا سماں ، پل پل ۔۔۔۔۔۔= ہر پل پورے ورھے دے برابر بیتیا، لاکھ سراں دے مل دی= لکھ بندے قربان کراکے ایہہ رات نصیب ہوئی اے، وچولا= محرم بھیتی میل کراون والا وچلا شخص،پر = اڈن والے کھمبھ، گُجھیاں دلیلاں = دل وچ آون والے پوشیدہ خیال، صرفہ= بچت ۔ پلک جھمکن تے لگے سمے دے ضائع ہوون دا حساس، وہلا= چھیتی چھیتی، وکیلاں = وچولیاں نوں ،سُہاکے = سجا کے