ورقہ 450

8411
دو جگ دی سلطانی توڑے لبھے سبھ عمر دی
اس دم کول محمد بخشا خسخس قدر نہ دھردی
8412
جدوں شزادے ہوش سنبھالی حیرانی وچ آیا
قدرت تیری انت نہ کوئی واہ واہ بار خدایا
8413
سُتے کرم صحیح سچ جاگے یا ایہ خواب خیالوں
لدھا وصل موافق دائم اصل بدیع جمالوں
8414
عجب جمال پری دا ڈٹھیوس پاک سچا ہر عیبوں
باہر حد شمار بیانوں حسن اُتارا غیبوں
8415
نور اوہدے تھیں عالم روشن اوہ سی پاک جہانوں
کوئی تشبیہ نہ دتی جاندی اعلیٰ جُثیوں جانوں
8416
سارا آہا مِٹھا پیارا نال ملاحت بھریا
شہد شکر وچ شیریں جیویں تیویں عشقوں تریا
8417
سیف ملوک اونھوں تک پائی نویں سروں زندگانی
تاں جانی وچ جانی پیاّں جاں ملیا دل جانی
8418
شاہزادے فرمایا اس نوں ہے جندے کے آکھاں
ملن تیرے دا شکر نہ ہوندا نال زباناں لاکھاں
8419
مِلن تیرے وچ مینوں آہا قوت قدر نہ ذرہ
سورج آپ ہنیرا کھڑیا چانن ہویا مقرہ
8420
کہیا پھیر بدیع جمالے سُن توں یار پیارے
میں بھی کیونکر شکر الاواں پائے کرم نیارے
8421
جس دن نظر تیرے ول کیتی عشق تیرا گھٹ آیا
کد ملاپ ہوویگا ساڈا خوف اندر وچ پایا
8422
میں ناری سلطان ملک دی اوہ اک عاجز خاکی
کیونکر اک میرے سنگ ہوسی جے سو کرے چلاکی
8423
آہو دائم سُجھدا آہا داغ وچھوڑے والا
اِنَّ اللّٰہَ لَطِیْفٌ بِعِبَادِہکردا خُوب سنبھالا
8424
اج اسیں ہک جوڑی سُتےّ ہک کیتے رب والی
کیکر حق مُکائیے پکیّ اپھّل رُکھ دی ڈالی
8425
پر اک چنتا رہندی مینوں بُرا دلے وچ جھورا
مت توں قول قرار میرے تھیں بھج ونجیں اک بھورا
8426
کریں قبول اوہناں دی صحبت جِنھاں نوں مل آیوں
ہوگ قہر دی گھڑی میرے تے جاں ہوری انگ لایوں
8427
شاہزادے فرمایا بی بی تدھ پچھے گھر سٹے
ندیاں تے کوہ قاف لتاڑے کئی قضئیے کٹے
8428
مفت نہیں ہتھ آئییں مینوں جے میں قدر نہ جاناں
کیونکر توڑے قول سجن دے جس تن عشق سمانا
8429
بیوفائی دی ایہ تہمت کیوں توں مُڑ مُڑ لاویں
قولاں قسماں نال نہ سرچیں کہو کے ہور کراویں

لفظالی:
توڑے = بھانویں ، خسخس= خشخاش دے دانے جنی وی، بار= مخلوق دا بھلا کرن والا۔ خدا تعالیٰ، دم = ساہ لین تے لگا سماں ، لدھا = ملیا، ڈٹھوس= اوہنے ویکھیا، حسن اتارا غیبوں= غائب ولوں اتریا ہویا حسن ، خدا ؤں روپ ، ملاحت= سانولا پن، شیریں = شیر ینی ، عشقوں تریا= عشق دے ذریعے پار اُتریا، سورج= جمال دے نور نے، مقرہ = بے شک ۔ یقینا، گھٹ = دل ، ویکھ کے ، جانی = جان، کیونکر شکر الاواں =میتھوں شکر ادا نہیں ہو سکدا، پائے کرم نیارے= مینوں نویکلانصیبہ مل گیا اے، ناری= اگ دی مخلوق ، میرے سنگ= میرے نال،آہو = ہاہو۔ انھاں ڈوہنگھا تھاں ، سنبھالا= احتیاط ۔ راکھی، ان اللہ لطیف بعبادِہ= ق م سورۃ الشّورٰی :١٩۔ بے شک اللہ تعالیٰ اپنے بندیاں لئی بڑا مہربان اے، حق مُکانا= بدلہ چُکانا، اپھّل رُکھ=پھل نہ دین والا درخت ، ڈالی پکی= شاخ پکے پھل نال بھری، چنتا= فکر۔ اندیشہ، جھورا= مستقل فکر مندی، بھورا= ذرہ وی، ہوگ= ہووے گی،ہوری انگ لایوں =جے کسے ہور نوں اپنے سریر نال چھوہا یا تے، قضّےے = جھگڑے۔ مسئلےProblem، سمانا= سمایا، سرچنا= پرچنا۔ ورچایا جانا،