ورقہ 452

8449
اول عرض نیاز گزاری سُنتاں فرض فجر دے
ورد وظیفے پڑھ پڑھ پھوکے نالے نفل شکردے
8450
پھر دربار پیؤ دے آیا بیٹھی مجلس ساری
اوتھے سی شاہپال بہادر حاضر سبھ درباری
8451
جاں اس کا جوں فارغ ہوئے دوئے شاہ بہادر
باغ ارم وچ مجلس لائی بیٹھے سبھ اکابر
8452
سبھناں دے دل خوشیاں ہویاں غم نہ رہیا باقی
پین شراب پیالے دیون بھر بھر سوہنے ساقی
8453
جاں خوش وقت ڈٹھے شاہ دوئے صالح ابن حمیدے
دئے دعائیں عرض گزارے نال بہوں تاکیدے
8454
سراندیپ شہر دا والی اس دم حاضر ناہا
شاہپالے نوں کہندا صالح سُن توں شاہنشاہا
8455
صاعد خذمت گار تساڈا آساوند جنابوں
بدرہ خاتوں تے ہے عاشق تتا جگر کبابوں
8456
صاعد بدرہ خاتوں والا قصہّ سبھ سنایا
سرو بانو بی سُندی آہی اس ایہ ذمہّ چایا
8457
سراندیپ نگر دا والی بی بی کول بہاکے
وانگ بجھارت رمز سنائی گلوں گل ہلاکے
8458
ٹری بدیع جمال اکلیّ پرجنسیں پردیسیں
دل دی محرم بدرہ خاتوں نال سہیلی دیسیں
8459
شاہزادہ ونج تخت بہیگا ایہ محلاں وچ ہوسی
اک اکّلی محرم باجھوں اودر اودر روسی
8460
کون اس دی گل سمجھے اوتھے کون کرے غمخواری
بدرہ نال ایہدا دل رلیا ہور نہیں کوئی کاری
8461
شاہزادے دا بھائی صاعد خاص وزیر پیارا
اس کارن ایہ ناتا دیہو مطلب اصل ہمارا
8462
بدرہ دے پیؤ کہیا اگوں عذر نہیں میں کوئی
سبھ کم ہتھ تساڈے منساں جو فرماؤ سوئی
8463
نیت نال دتا ہُن ناتا مڑساں نہیں ایمانوں
پر بیٹی دے دور ونجن دا آوے ترس اسانوں
8464
سروبانو فرمایا مڑ کے اس گلوں کے جھُرنا
دھیاں دھن نمانا ایہناں جدھر ٹورو ٹرنا
8465
دھی ساڈی تھیں دھی تساڈی ہوسی بہت لڈِکیّ
قوم اپنی تھیں باہر دتی پردیساں وچ چِکی
8466
قوم اپنی وچ دتیاں تینوں آکھ دے کھاں کے خطرہ
نال بدیع جمال ہوویگی غم نہ ہوسی قطرہ
8467
دُکھ سکھاں دی گل کریسن اک دوجے سنگ رل کے
خیر سلا دی خبر منگاساں اسیں دئیاں نوں گھل کے

لفظالی:
عرض نیاز گذاری= عاجز ی مسکینی خضوع خشوع نال نماز پڑھی، کاجوں = شادی دے کم توں، آ ساوند= اُمید وار، خوش وقت= چنگے موڈ وچ ، تتا جگر کبابوں = جگر کبابوں ودھ بھجا ہویا، ویسیں= جائے گی، کاری= کار آمد، کارن = لئی ، میں = مینوں، جھُرنا= گلہ افسوس کرنا، نمانادھن= ایسی دولت جہدے اُتے مان نہیں کیتا جا سکدا، لڈکی= لاڈلی، آکھ دے کھاں = بتا دو تمہیں کیا خطرہ ہے، اودراودر= وراگ وچھوڑے وچ اُداس اُداس، پر جنسیں=پرائی جنس وچ ۔ آدمیاں دے گھر، سنگ= صحبت وچ نال، ترس= خوف ڈر، چکی= زبردستی تراہ دتی،