ورقہ 26

450
کیسر سستا ہے کشمیرے پُچھو مُل لہوروں
میوہ تے بادام محمد سستے ملن پشوروں
451
کرے سوال فقیر محمد پڑھنے والے تائیں
رونق کھڑیں نہ شعر میرے دی نال ادا سنائیں
452
باجھ ادا آواز رسیلے لگدا شعر الونا
دُدّھ اندر جے کھنڈ رلائیے مٹھا ہوندا دُونا
453
سُٹ پُسٹا کر کے پڑھیاں لذت کجھ نہ رہندی
جس دے بیٹے نوں کوئی مارے کد اس دی جند سہندی
454
جیونکر بیٹے تساں پیارے تیویں بیت اسانوں
بیٹے نوں کوئی انگل لائے لگدے بیت تسانوں
455
دشمن وانگ دسے اوہ سانوں جے کوئی بیت تروڑے
بیٹے نازک لال سندر دے ایویں کن مروڑے
456
ربّا دئیں پناہ اوہناں تھیں جو ایسے کم کر دے
سیم سُچےّ دا ستم بناون عم دا نیں غم کر دے
457
شکر الحمد خداوند تائیں باہر حد شماروں
ایہہ فرمائش پوری ہوئی وہل لدھی سر بھاروں
458
گادی والے دے نام اُتے نسخہ ایہہ بنایا
صلہ سخن دا پایا لوڑاں ہر کوئی دیندا آیا
459
شاعر اُتے رہے ہمیشہ شاہ فرمایش کر دے
پر جاں وار صلے دی آوے دے دولت گھر بھر دے؟
460
اگلے شعر بناون والے آہے مرد آزادے
صِلہ سخن دا کسے نہ سُٹیا جو بخشن شاہزادے
461
ہک ہک سخن میرے دی قیمت پاؤ نال انصافے
دیو دُعائیں جے میں کھوٹا تراں اگے صرّافے
462
امت اپنی وچ رلائے پاک رسول بندے نوں
حضرت مرشد دمڑی والا کرے قبول بندے نوں
463
سن مقدس ہجری دساں باراں سے ست دا ہے
ست اتے دو ہور محمد اوپر اس تھیں آہے
464
ماہ رمضان مبارک اندر وقت بہار گلابی
سفر العشق مکائی مولیٰ ہووس فضل جنابی
465
عمر مصنف دی تد آہی ِتن داہے تِن یکے
بھین وڈی فرماندی ایہو پتے ربے نوں پکے
466
جہلم گھاٹوں پربت پاسے میر پورے تھیں دکھن
کھڑی ملک وچ لوڑن جہڑے طلب بندے دی رکھن
467
پڑھنے سننے والے بھائی شوق دئے رب سائیں
برا خدائی میں پر آکھو فاتحہ خیر دعائیں !
468
ہر وچ ہر دا سِرّ نیارا متے کسے دی منے
بیڑے چاڑھ نبی دے مینوں تار لگاوے بنے

لفظالی:
الونا = بے سوادا ۔ لون توں بغیر ۔ بے مزہ ۔سٹ پسٹا = موقع محل تے لفظاں دی صحیح ادائیگی دے بغیر ۔بیت = (١) شعر (٢) مارن والا بینت ۔ کین ۔ سیم۔۔۔۔۔۔ = نقطیاں دا وادھا گھاٹا کرکے کلام نوں بے معنی بنادیندے نیں ۔گادی والے = گدی والے۔ حضرت میاں بہاول بخش گدی نشیں ۔ آزادے=آزاد ۔ دنیا اتے عاقبت توں بے پرواہ ۔تراں = معیار کسوٹی تے پرکھے جاون مگروں صحیح تے کھرا۔ منیج کے قبول ہوجاواں ۔ہووس = اوہدے تے ہووے ۔لوڑن = لبھن ۔ ڈھونڈن ۔براخدائی = برائے خدا۔ اللہ واسطے ۔ہر= خدا تعالیٰ ۔سِرّ = بھیت۔، میوہ= ایتھے کشمش مراد اے،