ورقہ 454

8487
شاہ پری نے کہیا بھینے صاعد نوں سر دھرلے
خوب جوان اوہ لائق تیرے کنت موافق کرلے
8488
اج ویاہیاں ڈولی پیاں چلئیے شہر مصر نوں
اک دوجی دے دُکھ ونڈائیے ملئیے سنجھ فجر نوں
8489
بدرہ خاتوں کہندی اگوں اے کڑئیے نادانے
ہوکے پری سِکھے تدھ کتھوں ایسے سخن دیوانے
8490
باپ تیرا سی شاہ کہاندا اوہ بھی شاہ شہاں دے
تاں ایہ ساک تساڈا ہویا ورتن نال رہاں دے
8491
باپ میرا سلطان وڈیرا سر اندیپ نگر دا
صاعد دا پیؤ نوکر چاکر میر وزیرمصر دا
8492
شان اساڈی نوںہتھ پاون کے مجال اوہناں دی
ایہ گل ہُوندی دسدی ناہیں کس عقلوں تدھ آندی
8493
پھیر جواب پری نے دتا سُن کھاں نی ہشیارے
آدم لوک تسیں کوئی ڈاڈھے کرو بلند پسارے
8494
سیف ملوک تیرے گھر آیا اک اکلا راہی
شوکت شان آہا تد کتھے نالے دولت شاہی
8495
مینوں تساں سوالیں ولیا تاں میں مکھ وکھایا
مکھ وکھایا تاں نیونہہ لایا ربّ دتا ور پایا
8496
اس دن اوہ پردیسی شوہدا عاجز سی بے مایہ
تساں پچھے میں شاہ پری نے یار اشنا بنایا
8497
صالح صاعد دا اج رتبہ بادشہاں دے جیسا
اس وٹ سٹے دا کے وٹاوٹ چڑھے کیوں ایسا
8498
بدرہ دے دل لگن گلاں مٹھیاں وانگ اناراں
اینویں مُونہوں نہ نہ کر دی پئی مکاوے واراں
8499
اندر لٹکاں وانگر کٹکاں صاعد پھٹکاں لایاں
دل شکرانے موہوں بہانے وریاں رب مُکایاں
8500
جیؤں جیؤں پری کریندی منتاں بدرہ بِھجے بھاروں
صاعد دی گل منےّ ناہیں بولے بھری ٹنگاروں
8501
کر کر تھکی جتن بتیرے بدرہ کرے نہ آرے
شاہ پری نوں خفگی آئی زرد ہوئے رخسارے
8502
اکھیں ڈل ڈل پانی آیا متھے پئی تریلی
تتیّ بول لگی فرماون توں ہیں بھلی سہیلی
8503
میں سی گل تساڈی منیّ تُدھ نہ جھلیّ کائی
ٹردی وار ازردہ ہوئیوس کے پچھلی اشنائی
8504
جدوں بدیع جمال سنایاں ایہ گلاں روہ کر کے
بدرہ دے دل خطرہ آیا کہن لگی ڈر ڈر کے
8505
اے بھینے کجھ وس نہ میرا ماں پیؤ دے ہتھ ڈوراں
کنج کواری بن کے ڈاری طور اپنا کے ٹوراں

لفظالی:
سردھرنا= سردا تاج بنالینا، موافق کرنا= خاوند منظور کر لینا۔ شادی تے رضا مند ہو جانا، سنجھ= شام، ورتن نال رہاں دے = ساریاں رسماں پوریاں کر دیاں ہویاں ، پسارے = کھلارے،ڈاڈھے= جابر، تد = تب اودوں، سوالیں ولیا= ترلے پاپا کے گھیر لیا ،سوال = منگتے دا ترلا ، ٹ ک بابا روٹی دا سوال اے، ور=پسند کیتا گبھرو، بے مایہ = پلیوں خالی، وٹ سٹا= تبادلے دا رشتہ ، وٹا = تبادلے وچ قبول کیتی شے، وٹ چڑھنا= غصہ چڑھنا، وار مُکانا= اپنی واری لینا اپنا بدلہ لینا، کٹک = حملہ آور لشکر جہڑا راہ وچ آئے ڈنگر وچھے نوں وی وڈی ٹکی آوندااے کٹک وچ غصے دا اچھا لا شدید ہوندا اے،پھٹک = تڑپ ۔ پھڑک ، لٹک = کسے شدید جذبے دا اُچھالا ( ایتھے محبت دا اُچھالااے) بھجے بھاروں = بھاراں تے پے کے سگون پرانہہ نسدی سی، روہ= غصہ، ٹنگاروں = ٹنگار پاروں ، ٹنگار= پندار ۔ا پنے آپ نوں بہت کجھ سمجھنا ۔ جھوٹھا تکبر ، آرے کرنا= ہاں کرنا، خفگی= گھٹن ۔ ناراضگی، تریلی = کمزوری دا پسینہ، ہیں بھلی = چنگی سہیلی نہیں ، ڈل ڈل کرنا= اکھاں دا اتھرواں نال بھریا ہونا ٹ ک جھیل ڈل، ٹوراں= نواں چلاواں ،